ଘରୋଇ ବଜାରରେ ଫୁଡ୍‌ ଷ୍ଟାର୍ଟଅପର ଚାହିଦା ବୃଦ୍ଧି, ଗୁଣାତ୍ମକ ଖାଦ୍ୟକୁ ଅପମ୍‌ ସେଣ୍ଟ୍ରାଲର ଗୁରୁତ୍ୱ

ଭୁବନେଶ୍ୱର,୧।୪: ଗତ କିଛି ବର୍ଷ ମଧ୍ୟରେ ଘରୋଇ ବଜାରରେ ଫୁଡ୍‌ ଷ୍ଟାର୍ଟଅପର ଚାହିଦା ବୃଦ୍ଧି ପାଇଛି। ଏପରିକି କେନ୍ଦ୍ର ସରକାରଙ୍କ ଷ୍ଟାର୍ଟଅପ୍‌ ପଲିସି ଓ ଅନ୍ୟାନ୍ୟ ଯୋଜନା ସହିତ ବ୍ୟାଙ୍କଗୁଡ଼ିକ ପକ୍ଷରୁ ବିଭିନ୍ନ ପର୍ଯ୍ୟାୟରେ ଆର୍ଥିକ ସହାୟତା ଆଦି ବଳରେ ଆଶାୟୀ ଯୁବ ଉଦ୍ୟୋଗୀମାନେ ଷ୍ଟାର୍ଟଅପ ପ୍ରତି ଆଗ୍ରହ ପ୍ରକାଶ କରୁଥିବାରୁ ଘରୋଇ ବଜାରରେ ଫୁଡ୍‌ ଷ୍ଟାର୍ଟଅପ ଶିଳ୍ପରେ ମଧ୍ୟ ଉଲ୍ଲେଖନୀୟ ଅଭିବୃଦ୍ଧି ଘଟିଛି। ବିଶେଷକରି ସାରା ଦେଶରେ ବେକାରି ଏକ ବଡ଼ ସମସ୍ୟା ହୋଇଥିଲାବେଳେ ବୃତ୍ତିଗତ ନିଯୁକ୍ତିରେ ମଧ୍ୟ ଅନେକ ପ୍ରକାର ସମସ୍ୟା ରହିଛି। ଫଳରେ ଯୁବବର୍ଗ ନିଯୁକ୍ତି ପଛରେ ନ ଗୋଡ଼ାଇ ଛୋଟଠାରୁ ମଧ୍ୟମ ବର୍ଗର ଫୁଡ୍‌ ଷ୍ଟାର୍ଟଅପ ବସାଇବାକୁ ପସନ୍ଦ କରୁଛନ୍ତି।

ସେହିଭଳି ଦେଶର ପ୍ରମୁଖ ଫୁଡ୍‌ ଷ୍ଟାର୍ଟଅପ ଯଥା ଜମାଟୋ, ସ୍ବିଗୀ, ବିରିଆୟନି ବାଇ କିଲୋ, ଇନର ସେଫ, ହଙ୍ଗର ବକ୍ସ ଓ ଜାଏ ପଏଣ୍ଟ ଭଳି ୧୦୦ରୁ ଅଧିକ ପ୍ରମୁଖ ଫୁଡ୍‌ ଷ୍ଟାର୍ଟଅପ ବର୍ତ୍ତମାନ ସମୟରେ ମାର୍କେଟ ଲିଡର ସହ ଫୁଡ୍‌ଚେନର ମାନ୍ୟତା ହାସଲ କରିଛନ୍ତି। ଅପରପକ୍ଷରେ ସ୍ବଳ୍ପ ପୁଞ୍ଜିରୁ ଆରମ୍ଭ କରାଯାଇପାରୁଥିବାରୁ ଫୁଡ ଷ୍ଟାର୍ଟଅପ ପ୍ରତି ଉଭୟ ଆଶାୟୀ ଓ ଉତ୍ସାହୀ ଯୁବବର୍ଗ ଏ କ୍ଷେତ୍ରରେ ପୁଞ୍ଜି ବିନିଯୋଗ ଓ ଷ୍ଟାର୍ଟଅପ ପ୍ରତିଷ୍ଠା ସହ ଭଲ ବ୍ୟବସାୟ ମଧ୍ୟ କରୁଛନ୍ତି। ଏପରିକି ଫୁଡ୍‌ ଷ୍ଟାର୍ଟଅପଗୁଡିକ ଦୈନିକ ୧୦,୦୦୦ରୁ ୧୦,୦୦,୦୦୦ ଟଙ୍କାର କାରବାର ସହିତ ବାର୍ଷିକ ୫ କୋଟିରୁ ୨୦୦କୋଟି ଟଙ୍କାର କାରବାର କରୁଛନ୍ତି। ସେହିପରି ଫୁଡ ଷ୍ଟାର୍ଟଅପ ଜରିଆରେ ମଧ୍ୟ ଯୁବୋଦ୍ୟୋଗୀମାନେ ବେକାରି ସମସ୍ୟାରୁ ମୁକୁଳିବା ସହିତ ୫ରୁ ୫୦ ଜଣଙ୍କୁ ପ୍ରତି ଷ୍ଟାର୍ଟଅପରେ ନିଯୁକ୍ତି ଯୋଗାଇ ପାରୁଛନ୍ତି।

ବର୍ତ୍ତମାନ ସମୟରେ ସ୍ବାଭିମାନୀ ଯୁବବର୍ଗ ପର ପାଖରେ କାମ ନ କରି ନିଜେ କିଛି କରିବାକୁ ଅଧିକ ପସନ୍ଦ କରୁଛନ୍ତି। ଏପରିକି ଆଶାୟୀ ଓ ଉତ୍ସାହୀ ଉଚ୍ଚଶିକ୍ଷିତ ଯୁବବର୍ଗମାନେ ସରକାରୀ ଯୋଜନା ଓ ବ୍ୟାଙ୍କ ସହାୟତାରେ ଷ୍ଟାର୍ଟଅପ କରିବାକୁ ଆଗ୍ରହ ଦେଖାଉଛନ୍ତି। ଏ ପରି ଜଣେ ଉତ୍ସାହୀ ଓ ଉଚ୍ଚଶିକ୍ଷିତ ଯୁବତୀ ରାଜଶ୍ରୀ ପ୍ରିୟଦର୍ଶନୀ ଭୁବନେଶ୍ୱରର ରଥ ରୋଡଠାରେ ଅପମ ସେଣ୍ଟ୍ରାଲ ନାମରେ ଏକ ଫୁଡ୍‌ ଷ୍ଟାର୍ଟଅପ କରିଛନ୍ତି। ପ୍ରତିଦିନ ଶହ ଶହ ଲୋକ ସନ୍ଧ୍ୟା ସମୟରେ ସୁସ୍ବାଦୁ ଓ ଗୁଣାତ୍ମକ ଖାଦ୍ୟର ମଜା ନେଉଛନ୍ତି।

ବିଶେଷ କରି ସ୍ମାର୍ଟସିଟି ଭୁବନେଶ୍ୱରବାସୀଙ୍କୁ କେରଳୀ ଖାଦ୍ୟର ମଜା ଓ ସ୍ବାଦ ଚଖାଇବା ପାଇଁ ଏଭଳି ଏକ ଅଭିନବ ଫୁଡ ଷ୍ଟାର୍ଟଅପ ‘ଅପମ ସେଣ୍ଟ୍ରାଲ’ ଜରିଆରେ ସ୍ବଳ୍ପ ମୂଲ୍ୟ ଓ ଗୁଣାତ୍ମକ ଖାଦ୍ୟ ଯୋଗାଉଛନ୍ତି। ବିଶେଷ କରି ଯୁବବର୍ଗମାନେ ଅପମଠାରେ ଭିଡ ଜମାଉଛନ୍ତି। ଏ ନେଇ ଅପମ ସେଣ୍ଟ୍ରାଲର ସହପ୍ରତିଷ୍ଠାତା ତଥା ମହିଳା ଯୁବୋଦ୍ୟୋଗୀ ରାଜଶ୍ରୀ ପ୍ରିୟଦର୍ଶନୀ କହିଛନ୍ତି, ଯୁବବର୍ଗଙ୍କୁ ସୁସ୍ବାଦୁ ଓ ଗୁଣାତ୍ମକମାନର ଖାଦ୍ୟ ଯୋଗାଇବା ସହିତ ଏକ ଭିନ୍ନ ପ୍ରକାରର ଖାଦ୍ୟ (ଡିସ)ର ସ୍ବାଦ ସହରର ଯୁବବର୍ଗଙ୍କୁ ଚଖାଇବା ପାଇଁ କେରଳୀ ଖାଦ୍ୟ ବ୍ରାଣ୍ଡ୍‌ ‘ଅପମ’ ଅୟମାରମ୍ଭ କରିଛି। ସେହିଭଳି ଅପମ ସେଣ୍ଟ୍ରାଲର ସହପ୍ରତିଷ୍ଠାତା ରାକେଶ ମିଶ୍ର କହିଥିଲେ, ଆମେ ଯୁବ ବର୍ଗଙ୍କୁ ସୁଷମ ଓ ସୁସ୍ବାଦୁ ଖାଦ୍ୟ ଭିନ୍ନ ପ୍ରକାରର ପ୍ରସ୍ତୁତି ସହ ଗୁଣାତ୍ମକ ଏବଂ ସୁସ୍ଥ ପରିବେଶ ମଧ୍ୟରେ ଯୋଗାଇବାକୁ ଲକ୍ଷ୍ୟ ରଖିଛୁ। ଏପରିକି ସବୁ ବର୍ଗର ଗ୍ରାହକଙ୍କୁ ଅପମର ଖାଦ୍ୟ ଓ ସ୍ବାଦ ଚଖାଇବା ଆମର ମୂଳ ଲକ୍ଷ୍ୟ ବୋଲି ସେ ମତପ୍ରକାଶ କରିଛନ୍ତି।