ବାସୁଦେବପୁର,୪।୨(ଡି.ଏନ.ଏ.): ୧୦ ମାସର ବକେୟା ଦରମା ନ ମିଳିବାରୁ ପ୍ରତିବାଦରେ ଜଣେ ଜିଆର୍ଏସ୍ ଓ ତାଙ୍କ ସ୍ତ୍ରୀ ବିଡିଓଙ୍କ କାର୍ଯ୍ୟାଳୟ ପରିସରରେ ଆତ୍ମାହୁତି ଉଦ୍ୟମ କରିଛନ୍ତି। ଗୁରୁବାର ପୂର୍ବାହ୍ନରେ ଭଦ୍ରକ ଜିଲା ବାସୁଦେବପୁର ବିଡିଓଙ୍କ କାର୍ଯ୍ୟାଳୟ ପରିସରରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି। ଉତ୍କଳ ମଳିକ ନାମକ ଜଣେ ଜିଆର୍ଏସ୍ ତାଙ୍କର ୧୦ ମାସର ବକେୟା ଦରମା ପ୍ରଦାନ କରାଯାଇ ନ ଥିବା ଅଭିଯୋଗ କରିଥିଲେ। ପୂର୍ବାହ୍ନ ୧୧ଟା ବେଳେ ସେ ଓ ତାଙ୍କ ସ୍ତ୍ରୀ ମିନତି ଦେହରେ କିରୋସିନ ଢାଳି ଆତ୍ମାହୁତି ଉଦ୍ୟମ କରିଥିବା ବେଳେ ବ୍ଲକ କର୍ମଚାରୀମାନେ ଅଟକାଇ ଥିଲେ। ଫଳରେ ଦୁଇଜଣ ନିଜ ଦେହରେ କିରୋସିନ ଢାଳି ଦେଇଥିବା ବେଳେ ନିଅଁା ଲଗାଇ ପାରି ନ ଥିଲେ। ସେମାନେ ବିଡିଓଙ୍କୁ ତାଙ୍କ ଅଫିସରେ ଗାଳିଗୁଲଜ କରିବା ସହ ବକେୟା ଦରମା ଦେବାକୁ ଦାବି କରିଥିଲେ। ଉଚ୍ଚ ବିଭାଗୀୟ ଅଧିକାରୀଙ୍କ ନିର୍ଦ୍ଦେଶ ସତ୍ତ୍ବେ ବିଡିଓ ତାଙ୍କୁ ଦରମା ଦେଉନାହାନ୍ତି ବୋଲି ଅଭିଯୋଗ କରିଥିଲେ। ବାସୁଦେବପୁର ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ଏ ସମ୍ପର୍କରେ ବିଡିଓ ପ୍ରଣବ କୁମାର ବେହେରାଙ୍କୁ ପଚାରିବାରୁ ସମ୍ପୃକ୍ତ ଜିଆର୍ଏସ୍ଙ୍କର ୨ ମାସର ଦରମା ରିଲିଜ୍ କରାଯାଇଥିବା କହିଛନ୍ତି।