ନୂଆଦିଲ୍ଲୀ,୨୯।୩ ଭାରତରେ ଡିଜିଟାଲ କରେନ୍ସି ଓ କ୍ରିପ୍ଟୋକୁ ନେଇ ଅନେକ ଚର୍ଚ୍ଚା ଲାଗି ରହିଛି। କେବେ ଏହାର ପ୍ରଚଳନ ନିଷିଦ୍ଧକୁ ନେଇ ତ ଆଉ କେତେବେଳେ କ୍ରିପ୍ଟୋ ସମ୍ପର୍କରେ ସଂସଦରେ ବିଲ୍ ଆଣିବାକୁ ନେଇ। ଗତ ୨ ବର୍ଷ ମଧ୍ୟରେ ଡିଜିଟାଲ ମୁଦ୍ରାଗୁଡିକ ବାବଦରେ ସରକାର କଣ ସବୁ ପଦକ୍ଷେପ ନେଇଛନ୍ତି। ବିଶେଷ କରି ଏହି ମୁଦ୍ରା କାରବାର ସହ ଜଡିତ ଥିବା ସଂସ୍ଥାଗୁଡିକଠାରୁ ସରକାର ଟିକସ (ଜିଏସଟି) ଆକାରରେ କେତେ ପରିମାଣର ଅର୍ଥ ଏକାଠି କରିଛନ୍ତି ସେ ନେଇ ସଂସଦରେ ସରକାର ମତ ରଖନ୍ତୁ ବୋଲି ଉଭୟ ବିରୋଧୀ ଓ ଶାସକ ଦଳର ସଦସ୍ୟମାନେ ଇଚ୍ଛା ପ୍ରକାଶ କରିଥିଲେ। ଏ ନେଇ ମଧ୍ୟ ସରକାରଠାରୁ ହସ୍ତଗତ ହୋଇଥିବା ସୂଚନାକୁ ସୋମବାର ସଂସଦ ଦ୍ୱାରା ପ୍ରକାଶିତ କରାଯାଇଥିଲା। ମିଳିଥିବା ସୂଚନା ଅନୁଯାୟୀ କେନ୍ଦ୍ର ସରକାର ପ୍ରାୟ ୧୧ଟି କ୍ରିପ୍ଟୋ ଏକ୍ସଚେଞ୍ଜରୁ ସାମଗ୍ରୀ ଏବଂ ସେବା ଟିକସ (ଜିଏସଟି) ଆକାରରେ ପ୍ରାୟ ୯୬ (୯୫.୮୬) କୋଟି ଟଙ୍କାର ରାଜସ୍ବ ସଂଗ୍ରହ କରିଛନ୍ତି। ବିଶେଷ କରି ଜିଏସଟି ପକ୍ଷରୁ ତନାଘନା କରିବା ସହ ଏହାର ଏକ ତଦନ୍ତ ୟୁନିଟ କ୍ରିପ୍ଟୋ ଏକ୍ସଚେଞ୍ଜଗୁଡିକ ଉପରେ ଚଢ଼ାଉ କରିବା ଫଳରେ ମୋଟ ୮୨ (୮୧.୫୪) କୋଟି ଟଙ୍କାର ଟିକସ ଓ ଜରିମାନା ବାବଦକୁ ଅର୍ଥ ଦେଇନଥିବା ଜଣାପଡିଥିଲା। ଜିଏସଟିର ତଦନ୍ତକାରୀ ୟୁନିଟ ପକ୍ଷରୁ ଚିହ୍ନଟ କରାଯାଇଥିବା ସଂସ୍ଥା ମଧ୍ୟରେ ୱାଜିରକ୍ସ, ମୁଦ୍ରା ଡିସିଏକ୍ସ ଏବଂ କଏନ୍ ସ୍ବିଚ୍ କୁବେର ଭଳି ପ୍ରମୁଖ ଏକ୍ସଚେଞ୍ଚ ପଏଣ୍ଟ ଅନ୍ତର୍ଭୁକ୍ତ ରହିଛି ବୋଲି ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌଧୁରୀ ଏକ ଲିଖିତ ପ୍ରଶ୍ନର ଉତ୍ତରରେ ଏଭଳି କିଛି ସୂଚନା ପ୍ରଦାନ କରିଛନ୍ତି। ସେହିଭଳି ଜିଏସଟି ବିଭାଗ ପକ୍ଷରୁ ମିଳିଥିବା ତଥ୍ୟକୁ ଆଧାର କରି ମନ୍ତ୍ରୀ କହିଛନ୍ତି ଯେ ୱାଜିରକ୍ସ ବ୍ରାଣ୍ଡ ଭାବରେ କାର୍ଯ୍ୟ କରୁଥିବା ଜାନମାଇ ଲାବ ୪୦.୫ କୋଟି ଟଙ୍କା ପାଙ୍କିଥିବା ବେଳେ ୱାଜିରକ୍ସ ଏକ୍ସଚେଞ୍ଜ ଜାନମାଇ ଲାବ ଦ୍ୱାରା ପରିଚାଳିତ ଏବଂ କ୍ରିପ୍ଟୋକରେନ୍ସି ଡବ୍ଲୁଆରଏକ୍ସ ବିନାନ୍ସ ଇନଭେଷ୍ଟମେଣ୍ଟ କୋ ଲିମିଟେଡ୍, ସେଚେଲସ୍ ବିନିମୟରୁ ମୋଟ ଉପରେ ୫୦ କୋଟି ଟଙ୍କା ଟିକସ ଆକାରରେ ପୁନରୁଦ୍ଧାର କରାଯାଇଥିଲା, ଯେଉଁଥିରେ ସୁଧ ଏବଂ ଜରିମାନା ଅନ୍ତର୍ଭୁକ୍ତ ରହିଛି। ଏ ସମ୍ପର୍କରେ ବିଭାଗ ଅଭିଯୋଗ କରିଛି ଯେ ଅନୁସନ୍ଧାନ ବେଳେ ଟିକସଦାତା ଆୟକରରୁ ବାଣିଜ୍ୟ ଶୁଳ୍କ, ଜମା ଶୁଳ୍କ ଏବଂ ପ୍ରତ୍ୟାହାର ଶୁଳ୍କ ସଂଗ୍ରହ କରୁଥିବା ବେଳେ ଉକ୍ତ
ଘଟଣା ଅଧିକାରୀଙ୍କ ନଜରକୁ ଆସିଥିଲା।