ମୁମ୍ବାଇ: ବର୍ତ୍ତମାନ ପେଟ୍ରୋଲ ଏବଂ ଡିଜେଲକୁ ସାମଗ୍ରୀ ଓ ସେବା ଟିକସ(ଜିଏସ୍ ଟି) ପରିସରକୁ ଆଣିବା ସମ୍ଭବ ନୁହେଁ। ଏଥିପାଇଁ ୧୦ ବର୍ଷ ସମୟ ଲାଗିଯିବ ବୋଲି ଭାଜପା ନେତା ସୁଶୀଲ କୁମାର ମୋଦି ବୁଧବାର କହିଛନ୍ତି। ଯଦି ତେଲରେ ବର୍ତ୍ତମାନ ଜିଏସ୍ଟି ଲାଗେ ତେବେ ରାଜ୍ୟଗୁଡିକ ବାର୍ଷିକ ୨ ଲକ୍ଷ କୋଟି ଟଙ୍କାର କ୍ଷତି ସହିବେ। ପେଟ୍ରୋଲିୟମ ଉତ୍ପାଦରୁ କେନ୍ଦ୍ର ଏବଂ ରାଜ୍ୟ ମିଳିତ ଭାବେ ୫ ଲକ୍ଷ କୋଟି ଟଙ୍କା ସଂଗ୍ରହ କରୁଛନ୍ତି। ରାଜ୍ୟ ସଭାରେ ଫାଇନାନ୍ସ ବିଲ୍ ୨୦୨୧ ଆଲୋଚନାରେ ଭାଗନେଇ ସେ ଏହି ସୂଚନା ଦେଇଛନ୍ତି। ବର୍ତ୍ତମାନ ଦେଶର ବିଭିନ୍ନ ପ୍ରାନ୍ତରେ ପେଟ୍ରୋଲ ଏବଂ ଡିଜେଲ ଲିଟର ପିଛା ୧୦୦ ଟଙ୍କା ଛୁଇଁଛି। ଏଣୁ ମୋଦିଙ୍କର ଏଭଳି ଉତ୍ତରକୁ ନେଇ ବେଶ୍ ଚର୍ଚ୍ଚା ଧରିଛି। ସେ ପୁଣି କହିଛନ୍ତି, ରାଜ୍ୟଗୁଡିକ ବାର୍ଷିକ ୨ ଲକ୍ଷ କୋଟି ଟଙ୍କାର ରାଜସ୍ବ କ୍ଷତି ସହିବାକୁ ବର୍ତ୍ତମାନ ପ୍ରସ୍ତୁତ ନାହାନ୍ତି। ତେବେ ପେଟ୍ରୋଲିୟମ ପ୍ରଡକ୍ଟ ଯଦି ଜିଏସ୍ଟି ପରିସରକୁ ଆସେ ତେବେ ଏହା ଉପରେ ୨୮% ଟିକସ ଲାଗୁ ହୋଇପାରିବ; ଯାହା ସର୍ବୋଚ୍ଚ ଟିକସ ସ୍ଲାବ୍। ବର୍ତ୍ତମାନ ପେଟ୍ରୋଲିୟମ ପ୍ରଡକ୍ଟ ଉପରେ ୬୦% ଟିକସ ଲାଗୁ ହେଉଛି। ଜିଏସ୍ଟିକୁ ଆସିଲେ ଉଭୟ କେନ୍ଦ୍ର ଏବଂ ରାଜ୍ୟ ୨ରୁ ୨.୫ ଲକ୍ଷ କୋଟି ଟଙ୍କା ରାଜସ୍ବ କ୍ଷତି ସହିବେ। ତେଲରୁ ସରକାର ଯେଉଁ ଟିକସ ଆଦାୟ କରୁଛନ୍ତି ତାହା ସରକାରଙ୍କ ପକେଟକୁ ଯାଉ ନାହିଁ। ଦେଶ ବର୍ତ୍ତମାନ ଚ୍ୟାଲେଞ୍ଜିଂ ସ୍ଥିତି ଦେଇ ଗତି କରୁଥିବାରୁ ବିଭିନ୍ନ ଜନମଙ୍ଗଳ କାର୍ଯ୍ୟରେ ଏହାକୁ ବ୍ୟବହାର କରାଯାଉଛି। କେତେକେ ଜିଏସ୍ଟିକୁ ଗବର ସିଂ ଟାକ୍ସ କହୁଛନ୍ତି। ଜିଏସ୍ଟି ଢାଞ୍ଚାକୁ କୌଣସି ରାଜ୍ୟ ଜିଏସ୍ଟି ପରିଷଦ ବୈଠକରେ ବିରୋଧ କରିନାହାନ୍ତି ବୋଲି ମୋଦି ସ୍ପଷ୍ଟ କରିଛନ୍ତି।