ନୂଆଦିଲ୍ଲୀ,୨୯ା୯ – ସାମଗ୍ରୀ ଓ ସେବା ଟିକସ (ଜିଏସ୍ଟି) ଲାଗୁ ହେବା ପରେ ଟିକସ ଠକେଇ ମାମଲା ସାମ୍ନାକୁ ଆସୁଛି। ଏହି ମାମଲାଗୁଡିକରେ ବୃହତ୍ ପରିମାଣର ରାଜସ୍ବ ସରକାରଙ୍କୁ ହରାଇବାକୁ ପଡୁଛି। ଏହାକୁ ନଜରରେ ରଖି ସରକାର ଜିଏସ୍ଟି ଠକେଇ ରୋକିବା ଲାଗି ୨ଟି କମିଟି ଗଠନ କରିଛନ୍ତି। ଅର୍ଥ ମନ୍ତ୍ରଣାଳୟ ପକ୍ଷରୁ ଟିକସ ଚୋରିକୁ ରୋକିବା ଦିଗରେ ପଦକ୍ଷେପ ଗ୍ରହଣ କରାଯାଇଛି। ଜିଏସ୍ଟି ଛାଡ଼ ହେଉଥିବା ସାମଗ୍ରୀଗୁଡିକ ଉପରେ ସମୀକ୍ଷା କରିବା, ଟିକସ ଢାଞ୍ଚାର ପରିବର୍ତ୍ତନ ଉପରେ ପ୍ରସ୍ତାବ ଦେବା ଲାଗି ରାଜ୍ୟ ଅର୍ଥମନ୍ତ୍ରୀଙ୍କ ଏକ କମିଟି ଗଠନ କରାଯାଇଛି। କମିଟି ଏହାର ରିପୋର୍ଟ ୨ ମାସରେ ପ୍ରଦାନ କରିବ ବୋଲି ଜଣାପଡିଛି। ଜିଏସ୍ଟିରେ ବର୍ତ୍ତମାନ ୦%, ୫%, ୧୨%, ୧୮% ଏବଂ ୨୮% ଭଳି ୫ଟି ଟିକସ ସ୍ଲାବ୍ ରହିଛି।
ସ୍ଲାବ୍କୁ ୩କୁ ଖସାଯାଇପାରେ। ଟିକସର ଏଭଳି ହାରକୁ ତର୍କ ସଙ୍ଗତ ବନାଇବା ଲାଗି ମନ୍ତ୍ରୀ ଗୋଷ୍ଠୀ ଟିକସ ଢାଞ୍ଚାରେ ମଧ୍ୟ ପରିବର୍ତ୍ତନ କରିବ ବୋଲି କୁହାଯାଉଛି। ଟିକସ ସ୍ଲାବ୍ ଏବଂ ଢାଞ୍ଚାରେ ପରିବର୍ତ୍ତନ ହେବାକୁ ଯାଉଥିବାରୁ ଜିଏସ୍ଟି ବାହାରେ ଥିବା କିଛି ସାମଗ୍ରୀ ଟିକସ ପରିସରଭୁକ୍ତ ହୋଇପାରେ। ସେହିଭଳି କିଛି ସାମଗ୍ରୀ ଉପରେ ଟିକସ ହାର ବଢ଼ିପାରେ। ସେହିଭଳି କିଛି ନୂଆ ସାମଗ୍ରୀ ଉପରେ ଟିକସ ଛାଡ଼ ତାଲିକାରେ ମଧ୍ୟ ସ୍ଥାନିତ ହୋଇପାରେ।
କମିଟି କର୍ନାଟକ ମୁଖ୍ୟମନ୍ତ୍ରୀ ବାସବରାଜ ବୋମାଇଙ୍କ ଅଧ୍ୟକ୍ଷତାରେ ପ୍ରସ୍ତୁତ କରାଯାଇଛି। ଉକ୍ତ କମିଟିରେ ପଶ୍ଚିମବଙ୍ଗ ଅର୍ଥମନ୍ତ୍ରୀ ଅମିତ ମିତ୍ର, କେରଳ ଅର୍ଥ ମନ୍ତ୍ରୀ କେ.ଏନ୍.ବାଲଗୋପାଳ, ବିହାର ଉପମୁଖ୍ୟମନ୍ତ୍ରୀ ତାରକିଶୋର ପ୍ରସାଦ ଏବଂ ଅନ୍ୟମାନେ ରହିଛନ୍ତି। ଟିକସର ଆଧାର ବୃଦ୍ଧି, ଇନ୍ପୁଟ ଟିକସ କ୍ରେଡିଟ ଏବଂ ଜିଏସ୍ଟିରୁ ଛାଡ ପାଇଥିବା ବିଭିନ୍ନ ସାମଗ୍ରୀ ଉପରେ ଏହି କମିଟି ସମୀକ୍ଷା କରିବ। ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାଓ୍ବାରଙ୍କ ନେତୃତ୍ୱରେ ଦ୍ୱିତୀୟ କମିଟି ଗଠନ କରାଯାଇଛି। ଉକ୍ତ କମିଟିରେ ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ, ତାମିଲନାଡୁ ଅର୍ଥମନ୍ତ୍ରୀ ପି.ଟି.ରାଜନ, ଛତିଶଗଡ଼ ଅର୍ଥମନ୍ତ୍ରୀ ଟି.ଏସ୍.ସିଂ ଦେଓ ଏବଂ ଅନ୍ୟମାନେ ସ୍ଥାନିତ ହୋଇଛନ୍ତି। ଟିକସ ଚୋରିର ସ୍ରୋତ ସମ୍ପର୍କରେ ପତ୍ତା ଲଗାଇବା, ରାଜସ୍ବ ହ୍ରାସ ରୋକିବା ନେଇ ବିଭିନ୍ନ ପ୍ରସ୍ତାବ ଏହି କମିଟି ଦେବ।