ସାକ୍ଷୀଗୋପାଳ,୨୨ା୪(ଡି.ଏନ୍.ଏ.): ପୁରୀ ଜିଲା ସତ୍ୟବାଦୀ ବ୍ଲକ ଖଣ୍ଡାୟତ ସାହିର ପୁଅ ତଥା ଯବାନ ଦେବାଶିଷ ବିଶ୍ୱାଳଙ୍କ ପାର୍ଥିବ ଶରୀର ପଞ୍ଚଭୂତରେ ଲୀନ ହୋଇଛି। ଗାଁ ଶ୍ମଶାନରେ ଶନିବାର ତାଙ୍କର ଶେଷକୃତ୍ୟ ସମ୍ପନ୍ନ କରାଯାଇଛି। ପ୍ରଶାସନ ପକ୍ଷରୁ ଶହୀଦ ଦେବାଶିଷଙ୍କୁ ଗାର୍ଡ ଅଫ୍ ଅନର ପ୍ରଦାନ କରାଯିବା ପରେ ଶେଷକୃତ୍ୟ କରାଯାଇଥିଲା। ଦେବାଶିଷଙ୍କ ସାନ ଭାଇ ଦେବୀ ପ୍ରସାଦ ମୁଖାଗ୍ନି ଦେଇଥିଲେ।
ଏନେଇ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା। ଭୁବନେଶ୍ୱରରୁ ତାଙ୍କର ପାର୍ଥିବ ଶରୀର ସତ୍ୟବାଦୀ ଅଣାଯାଇଥିଲା। ଆସିବା ବେଳେ ବାଟରେ ଦେବାଶିଷଙ୍କ ଦର୍ଶନ ପାଇଁ ହଜାର ହଜାର ଲୋକ ଠିଆ ହୋଇଥିଲେ।
ସୂଚନାଯୋଗ୍ୟ, ଦେବାଶିଷ ଭାରତୀୟ ସେନାର ୫ ରାଷ୍ଟ୍ରୀୟ ରାଇଫଲ୍ସରେ ନିଯୁକ୍ତି ପାଇଥିଲେ। ସେ ଜମ୍ମୁ-କଶ୍ମୀର ପୁଞ୍ଚରେ ନିଯୁକ୍ତି ପାଇଥିଲେ। ଗୁରୁବାର ଆତଙ୍କବାଦୀ ଆକ୍ରମଣରେ ସେ ପ୍ରାଣ ହରାଇଥିଲେ। ୨୦୨୧ ପବିତ୍ର ଅକ୍ଷୟ ତୃତୀୟାରେ ସଙ୍ଗୀତାଙ୍କ ସହ ବିବାହ ହୋଇଥିଲା। ତାଙ୍କର ଏବେ ୭ ମାସର ଏକ କନ୍ୟାସନ୍ତାନ ରହିଛି।
