ଭୁବନେଶ୍ୱର,୨୧ା୪ (ବ୍ୟୁରୋ): ଉତ୍ତରପ୍ରଦେଶ ପ୍ରୟାଗରାଜର ଆଇନଜୀବୀ ଉମେଶ ପାଲଙ୍କ ହତ୍ୟା ଘଟଣାର ଅଭିଯୁକ୍ତ ତଥା ଗୁଳିମାଡ଼ରେ ମୃତ ଗ୍ୟାଙ୍ଗଷ୍ଟର ଅତିକ ଅହମ୍ମଦଙ୍କ ସହଯୋଗୀ ଗୁଡ୍ଡୁ ମୁସଲିମ୍ ଦୀର୍ଘଦିନ ହେବ ଫେରାର ଅଛନ୍ତି। ଉତ୍ତରପ୍ରଦେଶ ପୋଲିସର ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍) ବିଭିନ୍ନ ରାଜ୍ୟରେ ଖୋଜାଖୋଜି କରି ଗୁଡ୍ଡୁଙ୍କୁ ଧରିବାକୁ ଚେଷ୍ଟା ଜାରି ରଖିଛି। ଏଭଳିସ୍ଥିତିରେ ପୋଲିସର ଗିରଫଦାରି କିମ୍ବା ଏନକାଉଣ୍ଟର ଭୟରେ ଗୁଡ୍ଡୁ ଓଡ଼ିଶାର ପୁରୀକୁ ଆସି ଆଶ୍ରୟ ନେଇଥିବା ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି। ଏପରିକି ପୁରୀ ପୂର୍ବରୁ ତାଙ୍କ ଶେଷ ଲୋକେଶନ୍ କର୍ନାଟକ ଥିବା ମଧ୍ୟ କୁହାଯାଉଛି। ତେବେ ଗୁଡ୍ଡୁଙ୍କ ଲୋକେଶନ୍ ପୁରୀ ଥିବା ଜଣାପଡ଼ିବା ପରେ ତାଙ୍କୁ ଧରିବାକୁ ଉତ୍ତରପ୍ରଦେଶ ଏସ୍ଟିଏଫ୍ ଟିମ୍ ଏଠାକୁ ଆସିଥିଲା। ହେଲେ ତାହା ପୂର୍ବରୁ ଅଭିଯୁକ୍ତ ଗୁଡ୍ଡୁ ଏଠାରୁ ଖସି ପଳାଇଥିଲେ ବୋଲି ଗଣମାଧ୍ୟମରେ କୁହାଯାଉଛି। ତେବେ ୱାଣ୍ଟେଡ ଗୁଡ୍ଡୁଙ୍କୁ ଉତ୍ତରପ୍ରଦେଶ ପୋଲିସ ଖୋଜାଖୋଜି କରୁଥିବା ବେଳେ ସେ ପୁରୀରେ ଲୁଚିଥିବା ଘଟଣାକୁ ନେଇ ଚାରିଆଡ଼େ ନାନା ପ୍ରଶ୍ନ ଉଠିଛି। ଗୁଡ୍ଡୁ ଓଡ଼ିଶାକୁ କେବେ ଆସିଥିଲେ, କାହା ସହ ରହିଥିଲେ, ସେ ଲୁଚିବାକୁ ପୁରୀ କାହିଁକି ବାଛିଲେ ଆଦି ଦିଗକୁ ନେଇ ପ୍ରଶ୍ନ ସୃଷ୍ଟି ହୋଇଛି। ଏସବୁ ପ୍ରଶ୍ନ ମଧ୍ୟରେ ଆଉ ଏକ ଦିଗ ମଧ୍ୟ ସାମ୍ନାକୁ ଆସୁଛି। ଗୁଡ୍ଡୁଙ୍କୁ ପୁରୀରେ ଆଶ୍ରା ଦେବା ପାଇଁ କେହି ବ୍ୟକ୍ତି ରହିଥିବା ମଧ୍ୟ ସନ୍ଦେହ ସୃଷ୍ଟି ହୋଇଛି। ତେବେ ଗୁଡ୍ଡୁଙ୍କ ପୁରୀ ଆସିବା ଓ ଏହା ପରେ ଏସ୍ଟିଏଫ୍ ଟିମ ଆସିବା ସଂକ୍ରାନ୍ତରେ କୌଣସି ଖବର ନ ଥିବା ପୁରୀ ଏସ୍ପି କନୱାର ବିଶାଲ ସିଂ କହିଛନ୍ତି। ଅପରପକ୍ଷରେ ପୁରୀ ଏକ ହିନ୍ଦୁ ପୀଠସ୍ଥଳୀ ହୋଇଥିବା ବେଳେ ଏଠାକୁ ସୁରକ୍ଷିତ ସ୍ଥାନ ଭାବି ମୁସଲମାନ ଧର୍ମାବଲମ୍ବୀ ଗୁଡ୍ଡୁ ଆସିଥିବା କୁହାଯାଉଛି। ତେବେ ଏନେଇ ଉତ୍ତରପ୍ରଦେଶ ଏସ୍ଟିଏଫ୍ ମୁଖ୍ୟ ଏଡିଜି ଅମିତାଭ ୟଶ କହିଛନ୍ତି, ଗୁଡ୍ଡୁ ଜଣେ ପେଷାଦାର ଅପରଧି। ସେ ବହୁଦିନ ଧରି ଏସ୍ଟିଏଫ୍ ତାଙ୍କୁ ଧରିବାକୁ ଖୋଜାଖୋଜି କରୁଛି। ଗୁଡ୍ଡୁ ଖୁବଶ୍ରୀଘ୍ର ଧରାପଡ଼ିବା ନେଇ ଆଶା ରଖାଯାଇଥିବା ଏଡିଜି ୟଶ କହିଛନ୍ତି।
୧୯୯୬ରେ ଜଣେ ଠିକାଦାର ଓ ୧୯୯୭ରେ ଜଣେ କ୍ରୀଡ଼ା ଶିକ୍ଷଙ୍କୁ ନିର୍ମମ ହତ୍ୟା କରିଥିଲେ ଅଭିଯୁକ୍ତ ଗୁଡ୍ଡୁ। ଏହାପରେ ଗୁଡ୍ଡୁ ଚର୍ଚ୍ଚାକୁ ଆସିଥିଲେ। ପରେ ସେ ଜେଲରେ ଥିବ ବେଳେ ଅତିକ ତାଙ୍କୁ ବେଲ୍ରେ ମୁକୁଳାଇଥିଲେ। ପରେ ଅତିକଙ୍କ ଗ୍ୟାଙ୍ଗ ସହ ଗୁଡ୍ଡୁ ୧୦ ବର୍ଷ ହେଲା କାମ କରୁଥିଲେ। ବୋମା ତିଆରି କରିବା ଏହାକୁ ଫୋପାଡ଼ି ଆତଙ୍କ ସୃଷ୍ଟି କରିବାରେ ଗୁଡ୍ଡୁ ମୁଖ୍ୟ ଥିଲେ। ଫେବୃୟାରୀ ୨୪ରେ ଉମେଶଙ୍କୁ ହତ୍ୟା ସମୟରେ ଗୁଡ୍ଡୁ ବହୁ ବୋମା ମାଡ଼ କରିଥିଲେ। ଏହି ମାମଲାରେ ଅତିକ ଅହମ୍ମଦ ଓ ତାଙ୍କ ଭାଇ ଅଶ୍ରଫଙ୍କୁ ଗିରଫ କରାଯାଇଥିଲା। ପରେ ଅତିକଙ୍କ ପୁଅ ଅସଦ୍ ଓ ସୁଟର ଗୁଲାମଙ୍କୁ ମେ’ ୧୩ରେ ଏସ୍ଟିଏଫ୍ ଏନ୍କାଣ୍ଟର କରି ହତ୍ୟା କରିଥିଲା। ଶନିବାର ରାତିରେ ଅତିକ ଓ ଭାଇ ଅଶ୍ରଫଙ୍କୁ ହ୍ୟାଣ୍ଡକପ୍ ଦେଇ ସ୍ବାସ୍ଥ୍ୟପରୀକ୍ଷା ପାଇଁ ମେଡିକାଲ ନିଆଯାଉଥିବା ବେଳେ ୩ ଅଭିଯୁକ୍ତ ଖବରଦାତା ବେଶରେ ଆସି ଉଭୟଙ୍କୁ ଗୁଳି ମାଡ଼ କରିଥିଲେ। ଏପରିକି ଗୁଳିମାଡ଼ର କିଛି ସମୟ ପୂର୍ବରୁ ଅତିକ ଗଣମାଧ୍ୟମରେ ମଧ୍ୟ ଗୁଡ୍ଡୁଙ୍କ ନାଁ ନେଇଥିଲେ।