ଭୁବନେଶ୍ୱର,୧୩।୫(ବ୍ୟୁରୋ): ୱାର୍ଡ ନମ୍ବର ୫୯ରେ ଶୁକ୍ରବାର ‘ୱାର୍ଡରେ ଦିନେ’ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ମେୟର ସୁଲୋଚନା ଦାସଙ୍କ ଅଧ୍ୟକ୍ଷତାରେ ସାମନ୍ତରାପୁର ସରସ୍ବତୀ ମଣ୍ଡପରେ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା। କାର୍ଯ୍ୟକ୍ରମରେ କମିଶନର ବିଜୟ ଅମୃତା କୁଲାଙ୍ଗେ ଯୋଗଦେଇ, ଗଙ୍ଗୁଆ ନାଳ ନିକଟରେ ଲୋକମାନେ ଗୃହପାଳିତ ପଶୁପକ୍ଷୀଙ୍କ ମୃତଦେହ ଫୋପାଡି ଦେଉଥିବାରୁ ସେ ଅଞ୍ଚଳରେ ଦୁର୍ଗନ୍ଧ ସହ ପରିବେଶ ନଷ୍ଟ ହେଉଛି। ଗୃହପାଳିତ ପଶୁପକ୍ଷୀଙ୍କ ମୃତଦେହ ଏଣେତେଣେ ନ ଫିଙ୍ଗି ବିଏମ୍ସିକୁ ଜଣାଇଲେ ତାହାକୁ ବିଏମ୍ସି ଉଠାଇ ନେବ ବୋଲି କମିଶନର କହିଥିଲେ। ଏଥିସହ ପରିମଳର ୨ଟି ମନ୍ତ୍ର ରାସ୍ତାରେ ଅଳିଆ ନ ପକାଇବା ଏବଂ ନିଜର ଅଳିଆକୁ ଓଦା ଶୁଖିଲା ଭାବେ ଅଲଗା କରି ବିଏମ୍ସି ସଫେଇ ଗାଡିକୁ ଦେବା ପାଇଁ ଲୋକଙ୍କୁ ବୁଝାଇଥିଲେ। ଏହି ଅବସରରେ ଶ୍ରୀରାମ ନଗରରେ ଦୟା ୱେଷ୍ଟ କେନାଲର ଉନ୍ନତିକରଣ, ଶ୍ରୀରାମ ନଗରକୁ ମୋ ବସ୍ ଚଳାଚଳ, ଶ୍ରୀରାମ ନଗର ୨, ୩ ଓ ୪ ନମ୍ବର ଲେନ୍ ରାସ୍ତାର ଉନ୍ନତିକରଣ, ନିଗମ ବିହାରରେ ରାସ୍ତା ଓ ଡ୍ରେନର ଉନ୍ନତିକରଣ, ଗ୍ୟାରେଜ ଛକ ଅଞ୍ଚଳରେ ସ୍ବେରେଜ ବ୍ୟବସ୍ଥା, ପୁରୁଣା ଭୁବନେଶ୍ୱର ଓ କ୍ୟାପିଟାଲ ଭିତରେ ରହୁଥିବା ତାରତମ୍ୟକୁ ହ୍ରାସ କରିବା, ଗ୍ୟାରେଜ ଛକରୁ ମନ୍ଦିର ରାସ୍ତା ଚଉଡା କରିବା, ଗ୍ୟାରେଜ ଛକ ଅଞ୍ଚଳରେ ପାର୍କ କରିବା, ବରିଷ୍ଠ ନାଗରିକଙ୍କ ପାଇଁ କମ୍ୟୁନିଟି ସେଣ୍ଟର କରିବା ଆଦି ବିଭିନ୍ନ ଦାବିକୁ ଓ୍ବାର୍ଡବାସୀ ଉପସ୍ଥାପନା କରାଯାଇଥିଲା। ସେହିପରି ଗୋଟିଏ ବର୍ଷ ମଧ୍ୟରେ ବିଏମ୍ସି ପକ୍ଷରୁ ହୋଇଥିବା ବିଭିନ୍ନ ଉନ୍ନୟନମୂଳକ କାର୍ଯ୍ୟ ଯଥା କାସା ଲିଭିଂରୁ ଶ୍ରୀରାମ ନଗର, ଶ୍ରୀରାମ ନଗର ଲେନ୍-୫, ଗାୟତ୍ରୀ ବସ୍ତି, ରବି ଟକିଜ୍ ଛକ ସାମନ୍ତରା କଲୋନୀ ଆଦିରେ ପେଭର ବ୍ଲକ ରାସ୍ତା ନିର୍ମାଣ ବିଭିନ୍ନ କାର୍ଯ୍ୟର ଚିଠା ପ୍ରଦାନ କରାଯାଇଥିଲା।
କାର୍ଯ୍ୟକ୍ରମରେ ସ୍ଥାନୀୟ କର୍ପୋରେଟର ତଥା ବିଏମ୍ସି ପରିମଳ ଏବଂ ଜନସ୍ବାସ୍ଥ୍ୟ ଷ୍ଟାଣ୍ଡିଂ କମିଟି ଅଧ୍ୟକ୍ଷ ବିରଞ୍ଚତ୍ ନାରାୟଣ ମହାସୂପକାର, ଜୋନାଲ ଡେପୁଟି କମିଶନର ପ୍ରିୟବ୍ରତ ପାଢୀ, କାର୍ଯ୍ୟନର୍ବାହୀ ଯନ୍ତ୍ରୀ ରାମେଶ୍ୱରୀ ଦାସ, ସହକାରୀ କାର୍ଯ୍ୟନିର୍ବାହୀ ଯନ୍ତ୍ରୀ ସୁରଥ ସାହୁ ପ୍ରମୁଖ ଯୋଗଦେଇଥିଲେ। ବୈଠକରେ ଶ୍ରୀରାମ ନଗର, ଗ୍ୟାରେଜ ଛକ, ନିଗମ ବିହାର, ଶାରଦା ମଠ, ସାମନ୍ତରାୟ କଲୋନୀ, ନୂଆଗାଁ, ଗୌରୀ ନଗର, କୋଟି ତୀର୍ଥ ଲେନ୍, ଅନନ୍ତ ବାସୁଦେବ, ସାମନ୍ତରା ପୁର ଆଦି ଅଞ୍ଚଳର ପ୍ରତିନିଧିଙ୍କ ସହ ବିଭିନ୍ନ ସାମାଜିକ ସଂଗଠନ ଓ ଏସ୍ଏଚ୍ଜି ଗ୍ରୁପର କମକର୍ତ୍ତା ଯୋଗଦେଇଥିଲେ।