କେନ୍ଦୁଝର,୪।୫(ସ୍ବ.ପ୍ର.): କେନ୍ଦୁଝର ଜିଲାପାଳ ଆଶିଷ ଥାକରେ ମଙ୍ଗଳବାର ଖବରଦାତା ସମ୍ମିଳନୀରେ ଆସନ୍ତାକାଲି ଅର୍ଥାତ୍ ୫ ତାରିଖରୁ ରାଜ୍ୟ ସରକାର ଘୋଷଣା କରିଥିବା ଲକ୍ଡାଉନ୍ ପାଇଁ ଜିଲା ଗାଇଡଲାଇନ ଉପସ୍ଥାପନ କରିଛନ୍ତି। ଏହା ୧୯ ମେ ପର୍ଯ୍ୟନ୍ତ ବଳବତ୍ତର ରହିବ। ଏହା ସହିତ ସପ୍ତାହାନ୍ତ ଶଟ୍ଡାଉନ ରହିବ। ସମସ୍ତ ଧାର୍ମିକ ଅନୁଷ୍ଠାନରେ ସର୍ବସାଧାରଣ ପ୍ରବେଶ ବନ୍ଦ ରହିବ। ପୂଜକମାନେ ରୀତିନୀତି ଭିତରେ ରହି ପୂଜା କରିପାରିବେ। ସଭାସମିତି, ଧାର୍ମିକ ସମାବେଶ ଆଦି ବନ୍ଦ କରାଯାଇଛି। ମେଡିକାଲ ବ୍ୟତୀତ ଅନ୍ୟ କାରଣ ପାଇଁ ଯାତାୟାତକୁ ସମ୍ପୂର୍ଣ୍ଣ ବାରଣ କରାଯାଇଛି। ବିଶେଷକରି ଲୋକଙ୍କ ଚଳାଚଳକୁ ନିୟନ୍ତ୍ରଣ କରିବା ଏହି ଲକ୍ଡାଉନର ମୁଖ୍ୟ ଉଦ୍ଦେଶ୍ୟ ବୋଲି କହିଥିଲେ। ଅର୍ଥନୈତିକ ଚଳାଚଳ ପାଇଁ ସାମଗ୍ରୀ ଓ ସେବା ପରିବହନକୁ ଅନୁମତି ଦିଆଯାଇଛି। ସ୍ବାସ୍ଥ୍ୟସେବା, ବ୍ୟାଙ୍କ, ଏଟିଏମ୍ ଆଦି ସେବା ଚାଲୁ ରହିବ। ଗ୍ରୋସରୀ, ପରିବା, ଅଣ୍ଡା, କ୍ଷୀର, ମାଛମାଂସ ଦୋକାନ ଆଦି ସକାଳ ୬ରୁ ମଧ୍ୟାହ୍ନ ୧୨ ଟା ଯାଏ ଖୋଲା ରହିବ ବୋଲି କହିଛନ୍ତି। ହୋମ୍ ଡେଲିଭେରୀକୁ ପ୍ରୋତ୍ସାହନ କରାଯାଉଛି। ସମସ୍ତେ ନିଜନିଜ ସଂସ୍ଥାର ପରିଚୟପତ୍ର ଦେଖାଇ କାମ କରିପାରିବେ। ସାପ୍ତାହିକ ହାଟ ବନ୍ଦ ରହିଥିବା ବେଳେ ହୋଟେଲ, ରେଷ୍ଟୁରାଣ୍ଟରେ ପାର୍ଶଲ ବ୍ୟବସ୍ଥା ରହିବ।
ଚାଷ ଓ ଉଦ୍ୟାନ ଚାଷ, ବନୀକରଣ, ନିର୍ମାଣ ଆଦି କାର୍ଯ୍ୟକ୍ରମ ଚାଲି ପାରିବ। ଜୀବନ ଜୀବିକାକୁ ବଞ୍ଚାଇ ଲକ୍ଡାଉନ କରିବା ପାଇଁ ପ୍ରାଧାନ୍ୟ ଦିଆଯାଉଛି। ଶିଳ୍ପ ସଂସ୍ଥା ଚାଲିପାରିବ। ଆବଶ୍ୟକ ଶ୍ରମିକରେ କାମ କରିପାରିବେ। ସବୁ କିଛି କୋଭିଡ-୧୯ ଗାଇଡ୍ଲାଇନ୍ ଅନୁଯାୟୀ କରିବାକୁ କୁହାଯାଇଛି। ସହରାଞ୍ଚଳ ଓ ଗ୍ରାମାଞ୍ଚଳର ସମ୍ବେଦନଶୀଳ ସ୍ଥାନରେ ମାଇକ୍ରୋ କଣ୍ଟେନମେଣ୍ଟ୍ ଲାଗୁ କରାଯାଇଛି। ଅନ୍ୟଥା ସମାଗମକୁ ବାରଣ କରାଯାଇଛି। ବାହାଘର ପାଇଁ ମୋଟ୍ ୫୦ ଜଣ ଓ ଶୁଦ୍ଧିକ୍ରିୟା ପାଇଁ ୨୦ଜଣଙ୍କୁ ଅନୁମତି ମିଳିବ। ଏଥିପାଇଁ ସ୍ଥାନୀୟ ତହସିଲ ବା ପୌରପାଳିକାଠାରୁ ଅନୁମତି ନେଇ ପୋଲିସକୁ ଜଣାଇବା ପାଇଁ ପଡ଼ିବ ବୋଲି ଜିଲାପାଳ କହିଛନ୍ତି। ଚଳିତବର୍ଷ ପାସ ବ୍ୟବସ୍ଥା ନାହିଁ। ହୋଡିଂ ପାଇଁ ସ୍କ୍ବାଡ ରହି ତଦାରଖ କରାଯିବ।