ଅହମ୍ମଦାବାଦ,୨୧।୭: ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆମ ଆଦମୀ ପାର୍ଟି ମୁଖ୍ୟ ଅରବିନ୍ଦ କେଜ୍ରିୱାଲ ଗୁରୁବାର ଗୁଜରାଟରେ ପହଞ୍ଚିଛନ୍ତି। ଏଠାରେ ସେ ଗୁଜରାଟବାସୀଙ୍କୁ ଅନେକ ପ୍ରତିଶ୍ରୁତି ଦେଇନ୍ତି।
ଅରବିନ୍ଦ କେଜ୍ରିୱାଲ ତାଙ୍କ ଗସ୍ତ ସମୟରେ ଗୁଜରାଟର ସୁରଟରେ ପହଞ୍ଚିଥିଲେ। ସେଠାରେ କେଜ୍ରିୱାଲ କହିଛନ୍ତି, ଗୁଜରାଟରେ ସମସ୍ତଙ୍କୁ ଭୟଭୀତ କରାଯାଇଛି। ୨୭ ବର୍ଷ ଧରି କେବଳ ଗୋଟିଏ ଦଳ ଶାସନ କରିଛନ୍ତି, ତେଣୁ ଅହଂକାର ଆସିଯାଇଛି। ବର୍ତ୍ତମାନ ମୁଁ ଗୁଜରାଟକୁ ପରିବର୍ତ୍ତନ ଚାହୁଁଛି। ଦେଶରେ ଦର୍ଦାମ ସହ ବିଦ୍ୟୁତ ଦର ମଧ୍ୟ ବୃଦ୍ଧି ପାଉଛି। ପଞ୍ଜାବ ଏବଂ ଦିଲ୍ଲୀରେ ଭଳି ଗୁଜରାଟରେ ଆମ ଆଦମୀ ପାର୍ଟି ସରକାରକୁ ଆସିଲେ ମାଗଣାରେ ବିଦ୍ୟୁତ ଯୋଗାଇ ଦେବାକୁ ଚାହୁଁଛୁ। ସମସ୍ତ ଘରୋଇ ଗ୍ରାହକଙ୍କୁ ୩୦୦ ୟୁନିଟ ବିଦ୍ୟୁତ ମାଗଣାରେ ଦିଆଯିବ।
ଏଥି ସହ ପ୍ରଧାନମନ୍ତ୍ରୀ ମୋଦିଙ୍କ ରେୱଡି(ମିଠା) ମନ୍ତବ୍ୟକୁ ନେଇ ମଧ୍ୟ କେଜ୍ରିଓ୍ବାଲ୍ ଜବାବ ରଖିଛନ୍ତି। ସେ କହିଛନ୍ତି, କିଛି ଲୋକ ରେୱଡି ବିଷୟରେ କହୁଛନ୍ତି। ଯେତେବେଳେ ରେୱଡି ସର୍ବସାଧାରଣଙ୍କ ମଧ୍ୟରେ ମାଗଣାରେ ବଣ୍ଟନ ହୁଏ, ଏହାକୁ ‘ପ୍ରସାଦ’ କୁହାଯାଏ । କିନ୍ତୁ ଯେତେବେଳେ ଏହା ବନ୍ଧୁ, ମନ୍ତ୍ରୀମାନଙ୍କୁ ମାଗଣାରେ ଦିଆଯାଏ, ଏହା ହେଉଛି ପାପ। ଆମ କର୍ମୀମାନେ ଲୋକଙ୍କୁ ଯେଉଁ ରେୱଡି ବାଣ୍ଟିଛନ୍ତି, ତାହା ଭଗବାନଙ୍କ ପ୍ରସାଦ।
ଜୁଲାଇ ୧୬ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏକ କାର୍ଯ୍ୟକ୍ରମରେ କହିଥିଲେ, ଦେଶରେ ମାଗଣା ରଓ୍ବେଡି ବଣ୍ଟନ କରି ଭୋଟ ସଂଗ୍ରହ ପାଇଁ ଉଦ୍ୟମ କରାଯାଉଛି, ଯାହା ଦେଶ ପାଇଁ ଅତ୍ୟନ୍ତ ବିପଜ୍ଜନକ।
