ଅହମ୍ମଦାବାଦ୍,୬।୧୧: ଗୁଜରାଟ ବିଧାନସଭା ନିର୍ବାଚନ ୨୦୨୨ ଘୋଷଣା ପରେ ରାଜ୍ୟରେ ରାଜନୀତି ସରଗରମ ହୋଇଛି। ବିଭିନ୍ନ ଦଳ ପକ୍ଷରୁ ପ୍ରଚାର ଆରମ୍ଭ ହୋଇଯାଛି। ଏହି କ୍ରମରେ ରବିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁଜରାଟର ଭାଲସାଦ ଜିଲାରେ ପହଞ୍ଚିଥିଲେ। ଏଠାରେ ଏକ ନିର୍ବାଚନୀ ସଭାକୁ ଗୁଜରାଟୀ ଭାଷାରେ ସମ୍ବୋଧିତ କରି ମୋଦି କହିଛନ୍ତି, ଗୁଜରାଟର ବିକାଶ ପାଇଁ ଆମେ ନିରନ୍ତର କାର୍ଯ୍ୟ କରୁଛୁ। ପ୍ରତ୍ୟେକ ଗୁଜୁରାଟୀ ଆତ୍ମବିଶ୍ୱାସରେ ପରିପୂର୍ଣ୍ଣ। ମୁଁ ମୋର ଆଦିବାସୀ ଭାଇ ଓ ଭଉଣୀଙ୍କ ଆଶୀର୍ବାଦ ପାଇବାକୁ ଭାଲସାଦକୁ ଆସିଛି। ଏଥର ଆପଣମାନେ ବିଜୟ ରେକର୍ଡ ଭାଙ୍ଗି ଦେଖାନ୍ତୁ। ଗୁଜରାଟର ଲୋକମାନେ କେବଳ ଭାଜପାକୁ ହିଁ ନିର୍ବାଚନ ଜିତାଇବେ। ବିଧାନସଭା ନିର୍ବାଚନ ଘୋଷଣା ପରେ ଏହା ହେଉଛି ପ୍ରଧାନମନ୍ତ୍ରୀ ମୋଦିଙ୍କ ପ୍ରଥମ ଗୁଜରାଟ ଗସ୍ତ।
ସୂଚନାଯୋଗ୍ୟ, ଗୁଜରାଟର ୧୮୨ ଆସନ ବିଶିଷ୍ଟ ବିଧାନସଭା ପାଇଁ ଦୁଇଟି ପର୍ଯ୍ୟାୟରେ ମତଦାନ ଅନୁଷ୍ଠିତ ହେବ। ପ୍ରଥମ ପର୍ଯ୍ୟାୟ ଭୋଟ ଡିସେମ୍ବର ୧ରେ ଏବଂ ଦ୍ୱିତୀୟ ପର୍ଯ୍ୟାୟ ଡିସେମ୍ବର ୫ରେ ଅନୁଷ୍ଠିତ ହେବ। ଡିସେମ୍ବର ୮ରେ ଭୋଟ ଗଣନା କରାଯିବ।