ଅହମଦାବାଦ,୧୫।୧୧: ଗୁଜରାଟରୁ ପୁଣି ଜବତ ହୋଇଛି ୧୨୦ କେଜି ଡ୍ରଗ୍ସ। ଗୁଜରାଟ ଆତଙ୍କବାଦ ନିରୋଧ ସ୍କ୍ବାଡ(ଏଟିଏସ୍) ମୋରବି ଜିଲା ଝିନଜୁଦା ଗ୍ରାମରୁ ଏହି ବିପୁଳ ପରିମାଣର ଡ୍ରଗ୍ସ ଜବତ କରିଛି। ଜବତ ଡ୍ରଗ୍ସର ବଜାର ମୂଲ୍ୟ ୬୦୦ କୋଟି ଟଙ୍କା ହେବ ବୋଲି ଏଟିଏସ୍ ପକ୍ଷରୁ ସୋମବାର ସୂଚନା ଦିଆଯାଇଛି। ଘଟଣାରେ ସମ୍ପୃକ୍ତ ୩ ଜଣଙ୍କୁ ଗିରଫ କରାଯାଇଛି। ଗିରଫ ଅଭିଯୁକ୍ତମାନେ ହେଲେ ମୁକ୍ତାର ହୁସେନ ଓରଫ ଜବ୍ବର ଜୋଡିୟା, ଶାମସୁଦ୍ଦିନ ହୁସେନ ଓ ଗୁଲାମ ହୁସେନ।
ହେରୋଇନ କାରବାର ସମ୍ପର୍କରେ ସ୍ଥାନୀୟ ପୋଲିସକୁ ସୂଚନା ମିଳିଥିଲା। ଏନେଇ ପୋଲିସ ଏବଂ ଏଟିଏସ୍ କର୍ମଚାରୀ ମିଳିତ ଭାବେ ଏହି ଅପରେଶନ କରିଥିଲେ। ଅପରେଶନ ବେଳେ ଅଭିଯୁକ୍ତଙ୍କଠାରୁ ବିପୁର ପରିମାଣର ଡ୍ରଗ୍ସ ଜବତ କରିଥିଲେ। ପ୍ରାଥମିକ ତଦନ୍ତ ପରେ ଗୁଜରାଟ ଏଟିଏସ୍ ଏକ ବିବୃତିରେ ଜାରି କରିଛି। ପାକିସ୍ତାନର ଏକ ବୋଟ ଯୋଗେ ସମୁଦ୍ର ପଥ ଦେଇ ହେରୋଇନ ଗୁଜୁରାଟକୁ ଆସିଛି। ଏହାକୁ ମୁକ୍ତାର ଓ ଗୁଲାମ ରିସିଭ କରିଥିଲେ। ଏହାକୁ ପାକିସ୍ତାନରେ ରହୁଥିବା ଜାହିଦ ବାସିର ବାଲୋଚ ପଠାଇଥିଲେ। ୨୦୧୯ରେ ୨୭୭ କେଜି ହେରୋଇନ ଜବତ ହେବା ଘଟଣାରେ ସେ ଅଭିଯୁକ୍ତ। ତାଙ୍କୁ ଧରିବା ପାଇଁ ପ୍ରୟାସ ଚାଲିଥିବା ବେଳେ ସେ ପାକିସ୍ତାନରେ ରହିଥିବା ଜଣାପଡିଛି।
ଉଲ୍ଲେଖ ଯୋଗ୍ୟ, ୨ ମାସ ତଳେ ଅଡାନୀ ଗ୍ରୁପ୍ ଦ୍ୱାରା ପରିଚାଳିତ ଗୁଜରାଟର ମାନ୍ଦ୍ରା ବନ୍ଦରରୁ ଏକ ଡ୍ରଗ୍ସ ଭର୍ତ୍ତି କଣ୍ଟେନର ଜବତ ହୋଇଥିଲା। ଏଥିରୁ ୩ ହଜାର କେଜି ଡ୍ରଗ୍ସ ମିଳିଥିଲା। ଏହାର ବଜାର ମୂଲ୍ୟ ୨୧ହଜାର କୋଟି ଟଙ୍କା ହେବ ବୋଲି ଏଟିଏସ୍ ଆକଳନ କରିଥିଲା।