ବଦୋଦରା, ୧୪।୨ : ଗୁଜରାଟ ମୁଖ୍ୟମନ୍ତ୍ରୀ ବିଜୟ ରୂପାନି ବଦୋଦରାର ନିଜାମପୂରା ସ୍ଥିତ ମେହସାନାନଗରରେ ରବିବାର ସନ୍ଧ୍ୟାରେ ଏକ ଜନ ସମାବେଶକୁ ସମ୍ବୋଧିତ କଲା ବେଳେ ଚେତାଶୂନ୍ୟ ହୋଇପଡ଼ଥିଲେ। ଆସନ୍ତା ୨୧ ତାରିଖରେ ଏହି ରାଜ୍ୟରେ ହେବାକୁ ଯାଉଛି ମ୍ୟୁନିସିପାଲଟି ନିର୍ବାଚନ। ଏହାକୁ ଦୃଷ୍ଟିରେ ରଖି ତାର୍ସାଲି ଓ କରେଲିବାଗ ପରେ ମେହସାନାନଗର ନିର୍ବାଚନ ରାଲି ଯୋଗଦେଇଥିଲେ ମୁଖ୍ୟମନ୍ତ୍ରୀ ରୂପାନି।
ଭାଷଣା ଦେଉଥିବାବେଳେ ରୂପାନି ଚେତା ହରାଇ ତଳେ ପଡ଼ି ଯାଇଥିଲେ। ତାଙ୍କୁ ଧରିବାକୁ ବିଫଳ ଉଦ୍ୟମ କରିଥିଲେ ପଛରେ ଛିଡ଼ା ହୋଇଥିବା ତାଙ୍କ ସୁରକ୍ଷାକର୍ମୀ। ମୁଖ୍ୟମନ୍ତ୍ରୀ ରୂପାନି ପଡ଼ିଯିବା ପରେ ସାହାଯ୍ୟ ପାଇଁ ଦୌଡ଼ି ଆସିଥିଲେ ମଞ୍ଚ ଉପରେ ଥିବା ଅନ୍ୟ ନେତା। ” ବଦୋଦରାରେ ପ୍ରଚାରବେଳେ ମୁଖ୍ୟମନ୍ତ୍ରୀ ଅସୁସ୍ଥତା କାରଣରୁ ତଳେ ପଡ଼ିଯାଇଛନ୍ତି। ସେ ଏବେ ସୁସ୍ଥ ଅଛନ୍ତି। ଅତ୍ୟନ୍ତ ଥକି ପଡ଼ିବାରୁ ଏଭଳି ହୋଇଥାଇପାରେ। ଡାକ୍ତରମାନେ ତାଙ୍କ ସ୍ବାସ୍ଥ୍ୟବସ୍ଥା ଯାଞ୍ଚ କରୁଛନ୍ତି। ତେବେ ଚିନ୍ତା କରିବାର କିଛି କାରଣ ନାହିଁ “ ବୋଲି ଉପ ମୁଖ୍ୟମନ୍ତ୍ରୀ ନୀତିନ ପଟେଲ କହିଛନ୍ତି।