ଅହମଦାବାଦ,୨୯ା୫: ସ୍ଥାନୀୟ ନରେନ୍ଦ୍ର ମୋଦି ଷ୍ଟାଡିୟମରେ ରବିବାର ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍)-୨୦୨୨ର ଫାଇନାଲ ମ୍ୟାଚରେ ଟସ୍ ଜିତି ରାଜସ୍ଥାନ ରୟାଲ୍ସ ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା। ହେଲେ ଦଳ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ନିର୍ଦ୍ଧାରିତ ୨୦ ଓଭରରେ ୯ ଉଇକେଟ ହରାଇ ୧୩୦ ରନ୍ କରିଛି। ଫଳରେ ଗୁଜରାଟ ଟାଇଟନ୍ସ ଆଗରେ ୧୩୧ ରନ୍ର ବିଜୟ ଟାର୍ଗେଟ୍ ରଖିଛି ରାଜସ୍ଥାନ ରୟାଲ୍ସ।
ଦୁଇ ଓପନର ଯଶସ୍ବୀ ଜୟସ୍ବାଲ ଓ ଜୋସ ବଟଲର ଭଲ ଆରମ୍ଭ କରିଥିଲେ। ମାତ୍ର ନିୟମିତ ବ୍ୟବଧାନରେ ଉଇକେଟ ପତନ ଦଳପାଇଁ ମହଙ୍ଗା ପଡ଼ିଥିଲା। ଦଳୀୟ ସ୍କୋର ୩୧ ଥିବାବେଳେ ୪ର୍ଥ ଓଭରର ଶେଷ ବଲ୍ରେ ଆଉଟ ହୋଇଥିଲେ ଜୟସ୍ବାଲ। ସେ ୧୬ ବଲ୍ରୁ ୧ ଚୌକା ଓ ୨ ଛକା ସହାୟତାରେ ୨୨ ରନ୍ କରିଥିଲେ। ଅଧିନାୟକ ସଞ୍ଜୁ ସାମସନ ୧୪ ଓ ଦେବଦତ୍ତ ପଡିକାଲ ୨ ରନ୍ରେ ଆଉଟ ହେବାରୁ ଲିଗ୍ର ସର୍ବାଧିକ ସ୍କୋରର ବଟଲରଙ୍କ ଉପରେ ଚାପ ପଡ଼ିଥିଲା। ମେଗା ଫାଇନାଲରେ ସେ କରିସ୍ମା ଦେଖାଇପାରି ନ ଥିଲେ। ୩୫ ବଲ୍ରୁ ୫ ଚୌକା ସହାୟତାରେ ୩୯ ରନ୍ କରି ବଟଲର ଆଉଟ ହେବାରୁ ରାଜସ୍ଥାନର ବଡ଼ ସ୍କୋର ଆଶା ମଉଳି ଯାଇଥିଲା। ମିଡିଲ ଅର୍ଡରରେ ଶିମରନ ହେଟମେର ମାତ୍ର ୧୧ ରନ୍ କରି ଥିଲେ। ଶେଷଭାଗରେ ରବିଚନ୍ଦ୍ରନ ଅଶ୍ୱିନ ୬, ଟ୍ରେଣ୍ଟ ବୋଲ୍ଟ ୧୧, ରିୟାନ ପରାଗ ୧୫ ଓ ଓବେଡ ମ୍ୟାକକୟ ୮ ରନ୍ କରିବାକୁ ସକ୍ଷମ ହୋଇଥିଲେ। ଗୁଜରାଟ ପକ୍ଷରୁ ଚମତ୍କାର ବୋଲିଂ କରିଥିଲେ ଅଧିନାୟକ ହାର୍ଦ୍ଦିକ ପାଣ୍ଡ୍ୟା। ସେ ନିଜ ୪ ଓଭର ସ୍ପେଲ୍ରେ ମାତ୍ର ୧୭ ରନଦେଇ ୩ଟି ଗୁରୁତ୍ୱପୂର୍ଣ୍ଣ ଉଇକେଟ ହାସଲ କରିଥିଲେ। ରବିଶ୍ରୀନିବାସନ ସାଇ କିଶୋର ୨ଟି ଏବଂ ୟାଶ ଦୟାଲ, ମହମ୍ମଦ ଶାମି ଓ ରଶିଦ ଖାଁ ଗୋଟିଏ ଲେଖାଏ ଉଇକେଟ ନେଇଥିଲେ।