ଲକ୍ଷ୍ନୌ,୨୨।୪: ଭରତ ରତ୍ନ ଅଟଳ ବିହାରୀ ବାଜପେୟୀ ଏକାନା କ୍ରିକେଟ ଷ୍ଟାଡିୟମରେ ଶନିବାର ଖେଳାଯାଇଥିବା ଆଇପିଏଲ୍ର ୩୦ତମ ମ୍ୟାଚ୍ରେ ଗୁଜରାଟ ଟାଇଟନ୍ସ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲେ। ଅଧିନାୟକ ପାଣ୍ଡ୍ୟାଙ୍କ ଗୁରୁତ୍ୱପୂର୍ଣ୍ଣ ଅର୍ଦ୍ଧଶତକ ବଳରେ ଗୁଜରାଟ ନିର୍ଦ୍ଧାରିତ ୨୦ ଓଭରରେ ୬ ଉଇକେଟ ହରାଇ ୧୩୫ ରନ୍ କରିଥିଲା। ଫଳରେ ଲକ୍ଷ୍ନୌ ସୁପର ଜାଏଣ୍ଟ୍ସ ଆଗରେ ୧୩୬ ରନ୍ ଟାର୍ଗେଟ ରଖିଛି ଗୁଜରାଟ।
ଗୁଜରାଟର ଦୁଇ ଓପନର ରିଦ୍ଧିମାନ ସାହା ଏବଂ ଶୁଭମାନ୍ ଗିଲ ବ୍ୟାଟିଂ କରିବାକୁ ପଡ଼ିଆକୁ ଓହ୍ଲାଇଥିଲେ। ହେଲେ ଦଳକୁ ପ୍ରାରମ୍ଭିକ ଝଟ୍କା ଲାଗିଥିଲା। ଦଳୀୟ ସ୍କୋର ୪ ରନ୍ ହୋଇଥିବା ବେଳେ ଶୁଭମାନ୍ ଖାତା ଖୋଲି ନ ପାରି ଆଉଟ୍ ହୋଇଯାଇଥିଲେ। ହେଲେ ଦ୍ୱିତୀୟ ନମ୍ବରରେ ଅଧିନାୟକ ପାଣ୍ଡ୍ୟା ବ୍ୟାଟିଂ କରିବାକୁ ଆସି ୫୦ ବଲ୍ରେ ୬୬ ରନର୍(୨ ଚୌକା ଏବଂ ୪ ଛକ୍କା) ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିଲେ। ସେହିପରି ରିଦ୍ଧିମାନ ସାହା ଉପଯୋଗୀ ୪୭ ରନ୍ କରିଥିବା ବେଳେ ଅଭିନାଭ ମନୋହର ୩ ରନ୍ କରି ବିଫଳ ହୋଇଥିଲେ। ବିଜୟ ଶଙ୍କର ୧୦ ରନ୍ କରିଥିବା ବେଳେ ଡେଭିଡ୍ ମିଲର ୬ରନ୍ କରିବାରେ ସକ୍ଷମ ହୋଇଥିଲେ। ରାହୁଲ ତେୱାଟିଆ ୨ ରନ୍ କରି ନଟ୍ ଆଉଟ ରହିଥିଲେ। ଫଳରେ ଗୁଜରାଟ ୧୩୫ରନ୍ କରିବାରେ ସକ୍ଷମ ହୋଇଥିଲା। ଲକ୍ଷ୍ନୌର କ୍ରୁନାଲ ପାଣ୍ଡ୍ୟା ଏବଂ ମାର୍କସ ଷ୍ଟୋଇନିସ ୨ଟି ଲେଖାଏ ଉଇକେଟ ନେଇଥିବା ବେଳେ ନବୀନ-ଉଲ୍-ହକ ଓ ଅମିତ ମିଶ୍ର ଗୋଟିଏ ଲେଖାଏ ଉଇକେଟ ନେବାରେ ସଫଳ ହୋଇଥିଲେ।