କ୍ୱିଟୋ,୨୦।୨: ଜଣେ ରିପୋର୍ଟର ଓ ଟିଭି କ୍ରୁ ମେମ୍ବରଙ୍କୁ ବନ୍ଧୁକ ମୁନରେ ଲୁଟିଛନ୍ତି। ତାହା ପୁଣି ଲାଇଭ କ୍ୟାମେରା ଆଗରେ। ଇକ୍ୱାଡରରେ ଘଟିଥିବା ଏହି ଅବିଶ୍ୱସନୀୟ ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଯାଇଛି। ଭିଡିଓରେ ଜଣେ ଲୁଟେରା ବନ୍ଧୁକ ଦେଖାଇ ରିପୋର୍ଟର ଓ ଟିଭି କ୍ରୁ ମେମ୍ବରଙ୍କ ଠାରୁ ଟଙ୍କା ଓ ମୋବାଇଲ ଦାବି କରୁଛି। ହାତରେ ଟଙ୍କା ଓ ମୋବାଇଲ ଧରାଇ ଦେବା ପରେ ମାସ୍କ ପିନ୍ଧିଥିବା ଲୁଟେରା କାହାକୁ କ୍ଷତି ନ ପହଞ୍ଚାଇ ଘଟଣା ସ୍ଥଳରୁ ଚାଲିଯାଉଛି।
ଇକ୍ୱାଡରର ଡାଇରେକ୍ଟ ଟିଭିର ସ୍ପୋଟର୍ସ ଜର୍ନାଲିଷ୍ଟ ଡିଏଗୋ ଓର୍ଡିନୋଲା ଗୁଆକିଲସ୍ଥିତ ଇଷ୍ଟାଡିଓ ମାନୁମେଣ୍ଟାଲ ବାହାରେ ଗତ ସପ୍ତାହରେ ରିପୋର୍ଟିଂ କରୁଥିବାବେଳେ ଲୁଟେରା ସେମାନଙ୍କୁ ଅଟକାଇଥିଲା। ମୁଣ୍ଡ ଉପରେ ବନ୍ଧୁକ ରଖି ପର୍ଶ ଓ ମୋବାଇଲ ଦେବାକୁ କହିଥିଲେ। ଏହି ସମୟରେ କ୍ୟାମେରା ଚାଲୁ ରହିଥିବାରୁ ଏଥିରେ କଏଦ ହୋଇଥିଲା ପୂରା ଘଟଣା। ଏହାକୁ ଓଡିନାଲୋ ଇନ୍ଷ୍ଟାଗ୍ରାମରେ ଶେୟାର କରିଥିଲେ।