ସୋନପୁର,୧୬।୬(ମୃତ୍ୟୁଞ୍ଜୟ ଶତପଥୀ): ଆସନ୍ତା ୨୦ ତାରିଖ ପବିତ୍ର ରଥଯାତ୍ରା। ଏଥିପାଇଁ ସୁବର୍ଣ୍ଣପୁର ସମେତ ସାରା ଓଡିଶା ଉତ୍ସବ ମୁଖର ହୋଇଉଠିଛି। ବିଭିନ୍ନ ସ୍ଥାନରେ ଜଗନ୍ନାଥ ମନ୍ଦିର ଓ ଗୁଣ୍ଡିଚା ମନ୍ଦିରକୁ ରଙ୍ଗ କରାଯାଉଛି। ହେଲେ ସୁବର୍ଣ୍ଣପୁରର ସ୍ଥିତି ଭିନ୍ନ। ମନ୍ଦିରମାଳିନୀ ଏହି ସହରରେ ପୁରାତନ ମନ୍ଦିରଗୁଡିକୁ ଅଣଦେଖା କରାଯାଉଛି। ବଡବଜାରସ୍ଥିତ ଗୁଣ୍ଡିଚା ମନ୍ଦିର କାନ୍ଥରେ ଛୋଟ ଛୋଟ ବରଗଛ ଭର୍ତ୍ତି ହୋଇରହିଛି। ଗଛ ଚେର ମନ୍ଦିର ଭିତରକୁ ପ୍ରବେଶ କଲାଣି। ସେଗୁଡିକୁ ଓପଡା ଯାଉନି। ଏହା ମନ୍ଦିର ପ୍ରତି ବିପଦ ସୃଷ୍ଟି କରୁଛି। ଜିଲା ପ୍ରଶାସନ ଓ ଦେବୋତ୍ତର ବିଭାଗର ଏଥିପ୍ରତି ଦୃଷ୍ଟି ନାହିଁ। ସୋନପୁରର ରାଣୀ ଗୁଣ୍ଡିଚା ଦେବୀ ୧୮୩୭ରେ ଏହି ମନ୍ଦିର ନିର୍ମାଣ କରିଥିଲେ। ଏହି ମନ୍ଦିର ବଡ ମନ୍ଦିର ଭାବେ ପରିଗଣିତ ହେଉଥିଲା। ମନ୍ଦିର ଓ ନାଟ ମଣ୍ଡପର କାମ ବହୁତ ଉଚ୍ଚକୋଟୀର। କାରୁକାର୍ଯ୍ୟପୂର୍ଣ୍ଣ ଏହି ମନ୍ଦିରରେ ସମସ୍ତ ପୂଜା ପାର୍ବଣରେ ଶ୍ରଦ୍ଧାଳୁମାନେ ସମବେତ ହୋଇ ପୂଜା କରନ୍ତି। ପ୍ରଭୁ ନୃସିଂହ ଏଠାରେ ପୂଜା ପାଆନ୍ତି। ରଥଯାତ୍ରା ସମୟରେ ତିନି ଠାକୁର ମାଉସୀ ମା’ ମନ୍ଦିରରେ ବିଜେ ହୁଅନ୍ତି। ବେଶ ଧାରଣ ସମୟରେ ଏଠାରେ ଶ୍ରଦ୍ଧାଳୁଙ୍କ ଭିଡ ପରିଲକ୍ଷିତ ହୁଏ। ତେବେ ମନ୍ଦିର ଚୂଳରେ ୧୦ ରୁ ୧୨ଟି ବର ଓ ଅଶ୍ୱତଥ୍ ଗଛ ଉଠିଥିବା ବେଳେ କାହାରି ଦୃଷ୍ଟି ନାହିଁ। ମନ୍ଦିରରେ ରଙ୍ଗ ଦିଆଯାଉନି। ସହରର ଏହି ପ୍ରମୁଖ ମନ୍ଦିର ପ୍ରତି ପ୍ରଶାସନର ଅବହେଳା ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ତେଣୁ ରଥଯାତ୍ରା ପୂର୍ବରୁ ଗଛ ସଫା କରିବା ସହ ମନ୍ଦିରରେ ରଙ୍ଗ ଦେବା ପାଇଁ ଶ୍ରଦ୍ଧାଳୁମାନେ ଦାବି କରିଛନ୍ତି।