ମାଲକାନଗିରି, ୨୪।୩(ଡି.ଏନ୍.ଏ.): ମାଲକାନଗିରି ଜିଲା ସୀମାନ୍ତ ଛତିଶଗଡ଼ ସୁକମା ପୋଲିସ ଓ ମାଓବାଦୀଙ୍କ ମଧ୍ୟରେ ବୁଧବାର ରାତିରେ ଗୁଳି ବିନିମୟ ହୋଇଛି। ଗୁଳି ବିନିମୟ ବେଳେ ଛତ୍ରଭଙ୍ଗ ଦେଉଥିବା ମାଓବାଦୀମାନଙ୍କ ମଧ୍ୟରୁ ପୋଲିସ ୫ ଜଣଙ୍କୁ ଗିରଫ କରିଛି। ପୋଲିସ ଗୁଳିରେ ୫ରୁ ଊର୍ଦ୍ଧ୍ୱ ମାଓବାଦୀ ମଧ୍ୟ ଆହତ ହୋଇଥିବା ସୂଚନା ମିଳିଛି। କୋଟାଲେନ୍ଦ୍ର ଜଙ୍ଗଲ ନିକଟରେ ଥାଇ ମାଓବାଦୀମାନେ କୌଣସି ଏକ ବଡ଼ଧରଣର ଅଘଟଣ ଘଟାଇବାକୁ ୩୦ ନଂ. ଜାତୀୟ ରାଜପଥରେ ଆସିବା ପାଇଁ ପ୍ରସ୍ତୁତି ଚଳାଇଥିବା ପୋଲିସକୁ ସୂଚନା ମିଳିଥିଲା। ଏହାପରେ ସୁକମା ପୋଲିସ ଅଧୀକ୍ଷକଙ୍କ ନିର୍ଦ୍ଦେଶରେ ଏରାବୋର ଥାନା ଇନଚାର୍ଜ ଇନ୍ସପେକ୍ଟର ବୀରେନ୍ଦ୍ର ସିଂ ଏବଂ କୋଣ୍ଟା ଥାନା ଇନଚାର୍ଜ ଇନ୍ସପେକ୍ଟର ଶିବାନନ୍ଦ ସିଂଙ୍କ ନେତୃତ୍ୱରେ ଉଭୟ ଥାନା ପୋଲିସ ଏବଂ ଡିଆରଜି ବାହିନୀ ପକ୍ଷରୁ କୋମ୍ବିଂ ଅପରେଶନ ହୋଇଥିଲା ।