ଖମାର,୨ା୮(ଡି.ଏନ୍.ଏ.): ଅନୁଗୋଳ ଜିଲା ପାଲଲହଡା ବ୍ଲକ ଖମାର ଥାନା କୁଞ୍ଜାମ ପଞ୍ଚାୟତର ୩ ଜଣଙ୍କୁ ଗୁଣିଗାରେଡି ସନ୍ଦେହ ଓ ପୂର୍ବ ରାଗ ରଖି ହତ୍ୟା କରାଯାଇଛି। ହତ୍ୟାକାଣ୍ଡ ପରେ ମୃତଦେହକୁ ରଶିରେ ବାନ୍ଧି ଘୋଷାରି ନେଇ ସମାକୋଇ ନଦୀରେ ଫିଙ୍ଗାଯାଇଥିବା ସ୍ପଷ୍ଟ କରିଛି ଖମାର ପୋଲିସ। ପୋଲିସ ଘଟଣାରେ ସମ୍ପୃକ୍ତ ଥିବା ଶଙ୍କର ପୂର୍ତ୍ତି, ନିରଞ୍ଜନ ଚାମ୍ପିଆ, ଚନ୍ଦ୍ର ଡଙ୍ଗ, ଟିଟୁ ଡଙ୍ଗ ଓ ଅନ୍ୟ ୨ ନାବାଳକଙ୍କ ସହ ୬ ଜଣଙ୍କୁ ଗିରଫ କରିଛି। ଗିରଫ ଶଙ୍କର ମୃତ ମୁନି ଚାତରଙ୍କ ପୁଅ ବୋଲି ଜଣାପଡ଼ିଛି। ଅଭିଯୁକ୍ତମାନେ ଗତ ଶୁକ୍ରବାର ସଂଘବଦ୍ଧ ଭାବେ ୩ ଜଣଙ୍କୁ ପିଟି ପିଟି ହତ୍ୟା କରିଥିବା ପୋଲିସ କହିଛି। ରବିବାର ନଦୀରୁ ନିଖୋଜ ଜିତମୁଣ୍ଡା କୋଲହ ସାହିର ବୁଧୁ ଚାତର(୫୫)ଙ୍କ ମୃତଦେହ ଜବତ ହୋଇଥିବା ବେଳେ ସୋମବାର କୁଞ୍ଜାମ ଢିପା ସାହିର ମତେଇ ଗାଗରାଇ (୪୮)ଙ୍କ ମୃତଦେହ ମିଳିଛି। ଅନ୍ୟ ନିଖୋଜ ବୁଧୁଙ୍କ ସ୍ତ୍ରୀ ମୁନି ଚାତରଙ୍କ ମୃତଦେହ ଏଯାଏ ଜବତ କରାଯାଇ ନାହିଁ।