ରାୟଗଡ଼ା, ୨୧।୯(ଆଶିଷ ରଞ୍ଜନ ପଣ୍ଡା): ପ୍ରଶାସନ ଶୁଣିଲାନି କି କୌଣସି ପଦକ୍ଷେପ ନେଲା ନାହିଁ। ଶେଷରେ ନିଜ ପାଖରେ ଥିବା ଟଙ୍କା ଓ ସ୍ତ୍ରୀଙ୍କ ସୁନାଗହଣା ବିକ୍ରି କରି ଜଣେ ଯୁବକ ନାଳ ଉପରେ ଗତବର୍ଷ କାଠ ପୋଲ ନିର୍ମାଣ କରିଥିଲେ। ହେଲେ ଚଳିତ ବର୍ଷ ବର୍ଷାରେ ତାହା ସମ୍ପୂର୍ଣ୍ଣ ଧୋଇଯାଇଛି। ୩ ଜିଲାକୁ ଯାତାୟତ କରିବାର ବନ୍ଦ ହୋଇଯାଇଛି। ରାୟଗଡ଼ା ଜିଲା କାଶୀପୁର ବ୍ଲକ ଡଙ୍ଗାସିଲ ପଞ୍ଚାୟତ ଗୁଞ୍ଜରାମ ପଞ୍ଜରା ଗ୍ରାମର ରଞ୍ଜିତ ନାଏକ ଗତବର୍ଷ ନିକଟସ୍ଥ ନାଳ ଉପରେ କାଠ ପୋଲ ନିର୍ମାଣ କରିଥିଲେ। ଏହି ପୋଲ ନିର୍ମାଣ ପାଇଁ ସେ ନିଜ ପାଖେ ଥିବା ଟଙ୍କା ଓ ସ୍ତ୍ରୀଙ୍କ ସୁନା ଗହଣା ବିକ୍ରି କରି ପ୍ରାୟ ୭୦ହଜାର ବ୍ୟୟ କରିଥିଲେ। ପୋଲ ନିର୍ମାଣ ପାଇଁ ଜିଲା କିମ୍ବା ପ୍ରଶାସନ କେହି ହେଲେ ସହଯୋଗ କଲେ ନାହିଁ। ଏହି ପୋଲ ନିର୍ମାଣ ପରେ ଗୁଞ୍ଜରାମପଞ୍ଜରା ଗ୍ରାମ କାଶୀପୁର, ରାୟଗଡ଼ା ସମେତ ପଡ଼ୋଶୀ କଳାହାଣ୍ଡି ଓ ନବରଙ୍ଗପୁର ଜିଲା ସହିତ ଯୋଡ଼ି ହୋଇଥିଲା। ତେବେ ବର୍ତ୍ତମାନ ପୋଲ ଭାସିଯିବା ପରେ ଏହା ଅଞ୍ଚଳବାସୀଙ୍କ ଜୀବନଜୀବିକା ଉପରେ ବିଶେଷ ପ୍ରଭାବ ପକାଇବ ବୋଲି ରଞ୍ଜିତ କହିଛନ୍ତି। ପ୍ରଶାସନ ଏଥିପ୍ରତି ଦୃଷ୍ଟିଦେଇ ସେଠାରେ ସ୍ଥାୟୀ ପୋଲ ନିର୍ମାଣ କଲେ ଅଞ୍ଚଳବାସୀ ଉପକୃତ ହେବେ ବୋଲି ସେ କହିଛନ୍ତି।