ଚଣ୍ଡିଖୋଲ/ଛତିଆ/ବଡଚଣା,୧ା୩: ଯାଜପୁର ଜିଲା ବୈରୀ ଥାନା ଅଧୀନ ୧୬ ନଂ. ଜାତୀୟ ରାଜପଥର ନେଳିଆ ଛକ ନିକଟରେ ସୋମବାର ଏକ ବଡ଼ ଧରଣର ଲୁଟ୍ ଉଦ୍ୟମ ବିଫଳ ହୋଇଛି। ସ୍ଥାନୀୟ ପେଟ୍ରୋଲ ପମ୍ପର ୨ କର୍ମଚାରୀ ୫ଲକ୍ଷରୁ ଊର୍ଦ୍ଧ୍ୱ ଟଙ୍କା ନେଇ ଏକ କାର୍ରେ ଛତିଆ କାନାଡ଼ା ବ୍ୟାଙ୍କ ଶାଖାକୁ ଡିପୋଜିଟ୍ ପାଇଁ ଯାଉଥିଲେ। ଦୁର୍ବୃତ୍ତମାନେ ତାଙ୍କୁ ଗୁଳିମାଡ଼ କରି ଟଙ୍କା ଲୁଟ୍ ପାଇଁ ଉଦ୍ୟମ କରିଥିଲେ। ଗୁଳିମାଡ଼ରେ ନେଳିଆ ଇଣ୍ଡିଆନ୍ ଅଏଲ ପେଟ୍ରୋଲ ପମ୍ପର କର୍ମଚାରୀ ଦୁଷ୍ମନ୍ତ ନାୟକ ଓ ଜୟନ୍ତ ନାୟକ ଆହତ ହୋଇଛନ୍ତି। ସେମାନଙ୍କୁ କଟକ ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଛି। ପୋଲିସ ଏହି ଘଟଣାରେ ତନାଘନା ଚଳାଇଛି। ସୂଚନା ଅନୁଯାୟୀ, ସୋମବାର ୧୬ନଂ. ଜାତୀୟ ରାଜପଥ ପାର୍ଶ୍ୱରେ ଥିବା ନେଳିଆସ୍ଥିତ ଇଣ୍ଡିଆନ୍ ଅଏଲ ପେଟ୍ରୋଲ ପମ୍ପର କର୍ମଚାରୀ ଦୁଷ୍ମନ୍ତ ଓ ଜୟନ୍ତ ଏକ କାର(ନଂ.ଓଆର୦୨ଏ.ଡ଼ବ୍ଲ୍ୟୁ.୭୭୦୭)ରେ ୫ଲକ୍ଷରୁ ଊର୍ଦ୍ଧ୍ୱ ଟଙ୍କା ନେଇ ଡିପୋଜିଟ୍ ପାଇଁ ଯାଉଥିଲେ। ନେଳିଆ ଛକ ନିକଟରେ ପୂର୍ବରୁ ଛକି ରହିଥିବା ଦୁର୍ବୃତ୍ତମାନେ କାରକୁ ଲକ୍ଷ୍ୟ କରି ୨ରାଉଣ୍ଡ ଗୁଳି ଚଳାଇଥିଲେ। ଗୁଳି ଦୁଷ୍ମନ୍ତ ଓ ଜୟନ୍ତଙ୍କ ଦେହରେ ବାଜିଥିଲା। କାର ଚାଳକ ଭୟରେ ଗାଡିକୁ ଅଟକାଇ ଦେଇଥିଲେ। ଏହି ସୁଯୋଗରେ ଦୁର୍ବୃତ୍ତମାନେ ଆହତ କର୍ମଚାରୀଙ୍କ ହାତରୁ ବ୍ୟାଗ୍ ଛଡ଼ାଇନେଇ ଫେରାର ହୋଇଯାଇଥିଲେ। ତେବେ ବ୍ୟାଗ୍ରେ କିଛି କାଗଜପତ୍ର ଥିଲା ା ଟଙ୍କା ନ ଥିଲା ବୋଲି କର୍ମଚାରୀମାନେ କହିଛନ୍ତି। କର୍ମଚାରୀମାନେ ପ୍ୟାଣ୍ଟ୍ ପକେଟ୍ ଓ ଗାଡ଼ିରେ ଟଙ୍କା ରଖିଥିଲେ। ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ ୩ ଦୁର୍ବୃତ୍ତ ଗୁଳିମାଡ଼ କରି ଏକ ବାଇକ୍ରେ କଟକ ଅଭିମୁଖେ ପଳାଇ ଯାଇଥିଲେ। ଖବର ପାଇ ପୋଲିସ ଘଟଣାସ୍ଥଳରେ ଲାଗିଥିବା ସିସିଟିଭି ଯାଞ୍ଚ କରୁଛି। ଏସ୍ଡିପିଓ ଚିନ୍ମୟ ନାୟକ ଦୁଇ ଟିମ୍ ଗଠନ କରି ତଦନ୍ତ ଜାରି ରଖିଛନ୍ତି। ସୂଚନାଯୋଗ୍ୟ, ଗତ କିଛିଦିନ ତଳେ ବୈରୀ ଥାନା ନିକଟରେ ଥିବା ଏକ ପେଟ୍ରୋଲ ପମ୍ପ୍ରେ ଦୁର୍ବୃତ୍ତମାନେ ବୋମା ମାଡ଼ କରି ଫେରାର ହୋଇଯାଇଥିଲେ।