ଲାଗୋସ୍, ୨୧ା୧୨: ନାଇଜେରିଆର ଅଶାନ୍ତ ଉତ୍ତର-ପୂର୍ବ ଅଞ୍ଚଳରେ ବନ୍ଧୁକଧାରୀଙ୍କ ବର୍ବରତା ସୀମା ଟପିବାରେ ଲାଗିଛି। ମାତ୍ର ୩ ଦିନ ମଧ୍ୟରେ ଆତତାୟୀମାନେ ୪୭ ଜଣଙ୍କୁ ଗୁଳି କରି ହତ୍ୟା କଲେଣି। କେବଳ ରବିବାର ୩୮ ଜଣଙ୍କୁ ହତ୍ୟା କରାଯାଇଥିବାବେଳେ ଶୁକ୍ରବାର ୯ ଜଣଙ୍କୁ ଗୁଳି କରିଦିଆଯାଇଛି। ବହୁ ସଂଖ୍ୟାରେ ଗାଡ଼ି, ଫସଲ ସହ ଘରେ ନିଆଁ ଲଗାଇଦିଆଯାଇଛି। ତେବେ ଏଥିପାଇଁ କୌଣସି ଗୋଷ୍ଠୀ ନିଜକୁ ଦାୟୀ କରିନାହାନ୍ତି। ଡକାୟତି ଗ୍ୟାଙ୍ଗ୍ ଏପରି କରୁଥିବା କୁହାଯାଉଛି। ୟୁଏସ୍ କାଉନସିଲ ଅନ୍ ଫରେନ ରିଲେଶନ ରିପୋର୍ଟ ଅନୁସାରେ, ଉତ୍ତର-ପୂର୍ବ ସମେତ ଦେଶର ମଧ୍ୟଭାଗରେ ୨୦୨୧ ବର୍ଷରେ ବନ୍ଧୁକଧାରୀମାନେ ଏପର୍ଯ୍ୟନ୍ତ ପ୍ରାୟ ୨,୫୦୦ ଲୋକଙ୍କୁ ହତ୍ୟା କରିଲେଣି। ଗତ ୩ ମାସରେ ଏହି ସଂଖ୍ୟା ଅଧିକ ମାତ୍ରାରେ ବଢ଼ିଛି। ଏହି ସଶସ୍ତ୍ର ଗୋଷ୍ଠୀଗୁଡ଼ିକରେ ଫୁଲାନି ଜାତିର ଯୁବକମାନେ ସାମିଲ ଅଛନ୍ତି। ଜଳ ଏବଂ ଚାରଣ ଭୂମିକୁ ନେଇ ହାଉସା କୃଷକ ସମ୍ପ୍ରଦାୟ ସହ ସେମାନଙ୍କ ବିବାଦ ରହିଆସିଛି। ଘଟଣାସ୍ଥଳରେ ସୁରକ୍ଷାକର୍ମୀ ନିୟୋଜିତ ହୋଇଥିଲେ ହେଁ କାହାରିକୁ ଏ ପର୍ଯ୍ୟନ୍ତ ଗିରଫ କରାଯାଇନାହିଁ। ଦଶନ୍ଧି ଧରି ନାଇଜେରିଆ ସୈନ୍ୟ ଉତ୍ତର-ପୂର୍ବ ଅଞ୍ଚଳରେ ମୁସଲମାନ କଠୋରପନ୍ଥୀ ଗୋଷ୍ଠୀଙ୍କ ବିରୋଧରେ ଲଢ଼େଇ ଜାରି ରଖିଛନ୍ତି। ବୋକୋ ହାରାମ, ଇସ୍ଲାମିକ୍ ଷ୍ଟେଟ୍ ଭଳି ଆତଙ୍କବାଦୀ ସଙ୍ଗଠନ ନିଜ ପ୍ରଭାବ ବିସ୍ତାର କରିବାକୁ ଡକାୟତ ଗୋଷ୍ଠୀକୁ ଅସ୍ତ୍ରଶସ୍ତ୍ର ଯୋଗାଉଛନ୍ତି।