ନାକଟିଦେଉଳ,୨୦ା୧(ଡି.ଏନ.ଏ.): ସମ୍ବଲପୁର ଜିଲା ନାକଟିଦେଉଳ ବ୍ଲକ ଗିରିଶ୍ଚନ୍ଦ୍ରପୁର ବନ ବିଭାଗ ପକ୍ଷରୁ ଚଢାଉ କରାଯାଇ ୩ ଶିକାରୀ ଓ ୨ ବନ୍ୟଜନ୍ତୁ ମାଂସ ବ୍ୟବସାୟୀଙ୍କୁ ଗିରଫ ପରେ ଗୁରୁବାର କୋର୍ଟ ଚାଲାଣ କରାଯାଇଛି। ଗିରିଶ୍ଚନ୍ଦ୍ରପୁର ବନାଞ୍ଚଳ ଲଣ୍ଡାକୋଟ ସଂରକ୍ଷିତ ଜଙ୍ଗଲରୁ ବନ୍ୟଜନ୍ତୁ ଶୀକାର କରି ଫେରୁଥିବା ବେଳେ ବଡ଼ବାହାଳ ରାସ୍ତାରେ ବନ କର୍ମଚାରୀ ସେମାନଙ୍କୁ କାବୁ କରିଥିଲେ। ଗିରଫ ୩ ଶିକାରୀ ହେଲେ ବଡ଼ବାହାଲ ଗ୍ରାମର ଧର୍ମୁ ଶବର, କାର୍ତ୍ତିକ ଶବର ଓ ରମାକାନ୍ତ ଶବର। ସେହିପରି ଗିରଫ ବ୍ୟବସାୟୀ ହେଲେ କିସିଣ୍ଡା ଥାନା ପାରଧିଆମୁଣ୍ଡାର ଇନ୍ଦ୍ର ବେହେରା ଓ ସନ୍ତୋଷ ବେହେରା। ତାଙ୍କଠାରୁ ୫କେଜି କୁଟୁରା ମାଂସ, ଗୋଟିଏ ଦେଶୀ ବନ୍ଧୁକ, ୩ ଅଫୁଟା ଗୁଳି ଜବତ ସହ ୧୪ଟି ଶୁଆ ପକ୍ଷୀ ଶାବକ ଉଦ୍ଧାର ହୋଇଛି। ଉଦ୍ଧାର ଶୁଆ ଶାବକଗୁଡ଼ିକୁ ବନ ଅଧିକାରୀଙ୍କ ଉପସ୍ଥିତିରେ ଲଣ୍ଡାକୋଟ ସଂରକ୍ଷିତ ଜଙ୍ଗଲରେ ଛାଡ଼ି ଦିଆଯାଇଛି। ଶିକାରୀମାନଙ୍କ ଠାରୁ ୨ଟି ଧନୁ ତୀର, ଗୋଟିଏ ଫାର୍ସା, ଗୋଟିଏ ବାଇକ୍, ସମ୍ବର ମୁଣ୍ଡ ସହିତ ଶିଙ୍ଘ ଜବତ କରାଯାଇଛି। ବନାଞ୍ଚଳ ଅଧିକାରୀ ସୁଶାନ୍ତ କୁମାର ବନ୍ଧଙ୍କ ନିର୍ଦ୍ଦେଶ କ୍ରମେ ବନପାଳ ସୁଜିତ କୁମାର ପ୍ରଧାନଙ୍କ ନେତୃତ୍ୱରେ ଫରେଷ୍ଟ ଗାର୍ଡ଼ ମୀନା ମୁଣ୍ଡା, ବିନୋଦ ବିହାରୀ ମେହେର, ଅନୀଲ କୁମାର ନାଏକ, ଅନନ୍ତ ମିର୍ଦ୍ଧା ଚଢାଉରେ ସାମିଲ ହୋଇଥିଲେ।
