ଲହୁଣୀପଡ଼ା,୨୦।୬(ଡି.ଏନ୍.ଏ.): ସୁନ୍ଦରଗଡ଼ ଜିଲା ଲହୁଣୀପଡ଼ା ଥାନା ଅଧୀନ ରାଜାମୁଣ୍ଡା ପଞ୍ଚାୟତ ଗମଲେଇ ସାପ୍ତାହିକ ହାଟରେ ବନ୍ଧୁକ ଦେଖାଇ ଡକାୟତି କରୁଥିବା ଅଭିଯୋଗରେ ପୋଲିସ ୩ ଜଣଙ୍କୁ ଗିରଫ କରିଛି। ପୋଲିସ ତାଙ୍କ ପାଖରୁ ଗୋଟିଏ ପିସ୍ତଲ, ୬ଟି ଜୀବନ୍ତ ଗୁଳି, ଗୋଟିଏ ଖୋଖା, ୪ଟି ମୋବାଇଲ, ନଗଦ ୬ ହଜାର ଟଙ୍କା, ଗୋଟିଏ ସ୍କର୍ପିଓ ଗାଡି ଜବତ କରିଛି।
ମିଳିଥିବା ସୂଚନା ମୁତାବକ, ଲହୁଣୀପଡ଼ାର ମହମ୍ମଦ ତାଲିବ ୧୧ ତାରିଖରେ ବାଇକ୍ ଯୋଗେ ସାପ୍ତାହିକ ହାଟ ଗମଲେଇକୁ ଯାଇଥିବା ବେଳେ ବିଶ୍ରା ଅଞ୍ଚଳର କିଛି ଯୁବକ ଉକ୍ତ ହାଟକୁ ଆସିଥିଲେ। ହାଟରେ ବିଶ୍ରା ଅଞ୍ଚଳର ଯୁବକଙ୍କ ବାଇକ ସହିତ ମହମ୍ମଦ ତାଲିବଙ୍କ ବାଇକ୍ ଧକ୍କା ଦେଇଥିଲା। ଏନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। କିନ୍ତୁ ଏହା ସେତିକିରେ ସୀମିତ ନ ରହି ଶନିବାର ଗମଲେଇ ସାପ୍ତାହିକ ହାଟରେ ଏହା ଉଗ୍ର ରୂପ ନେଇଥିଲା।
ବିଶ୍ରା ଥାନା ଅନ୍ତର୍ଗତ ଗୁଡୁଗୁଡ଼ଜୋର ଗ୍ରାମର ମଜମିଲ ଆନ୍ସାରି(୨୭), ମହମ୍ମଦ ଆନ୍ସାରି(୨୬), ବିଶ୍ରା ବ୍ଲକ ରୋଡ଼ର ସାହିଲ ଖାନ ଓରଫ ସାନୁ (୨୫)ଏକ ସ୍କର୍ପିଓ ଓଆର-୨୩ଡ଼ି-୯୬୩୬ରେ ଆସି ମହମ୍ମଦ ତାଲିବଙ୍କୁ ଖୋଜାଖୋଜି କରିଥିଲେ। ପରେ ତାଙ୍କୁ ପିସ୍ତଲ ଦେଖାଇ ଭୟଭୀତ କରି ୭୧୫୦ ଟଙ୍କା ଲୁଟି ନେଇଥିଲେ। କିଛି ଲୋକ ଜାଣିପାରି ପାଟିତୁଣ୍ଡ କରିବା ସହି ତାଙ୍କୁ ଘେରାଉ କରି ଲହୁଣୀପଡ଼ା ପୋଲିସକୁ ଖବର ଦେଇଥିଲେ। ଖବରପାଇ ଲହୁଣୀପଡ଼ା ଥାନା ଅଧିକାରୀ ବିଜୟ ବିହାରୀ ପୋଲିସ ଫୋର୍ସ ସହ ହାଟରେ ପହଞ୍ଚି ତଦନ୍ତ ଆରମ୍ଭ କରିଥିଲେ। ପରେ ପୋଲିସ ଧରି ଥାନାକୁ ନେଇଥିଲେ। ପରେ ସେମାନଙ୍କୁ କୋର୍ଟ ଚାଲାଣ କରାଯାଇଛି।