ଗୁରୁଗ୍ରାମ,୩୦।୧୨: ଲୋକଙ୍କ ନାମରେ ମିଛ ବଳାତ୍କାର ଅଭିଯୋଗ କରିବା ପାଇଁ ଗୁରୁଗ୍ରାମର ଜଣେ ୨୨ ବର୍ଷୀୟା ଯୁବତୀଙ୍କୁ ଗିରଫ କରାଯାଇଛି। ଅଭିଯୁକ୍ତା କଲେଜ ଛାତ୍ରୀ ପୋଲିସ ଆଗରେ ୮ ଜଣଙ୍କ ବିରୋଧରେ ମିଛ ବଳାତ୍କାର ଅଭିଯୋଗ କରିଥିବା ସ୍ବୀକାର କରିଛନ୍ତି। ତାଙ୍କୁ ଗିରଫ କରି ବୁଧବାର କୋର୍ଟରେ ହାଜର କରାଯାଇଥିଲା। କିନ୍ତୁ ଜାମିନ ନ ମିଳିବାରୁ ତାଙ୍କୁ ବିଚାରଧୀନ ହାଜତକୁ ପଠାଇ ଦିଆଯାଇଛି। ଯୁବତୀଙ୍କ ସହ ତାଙ୍କ ମା’ ଓ ନରେନ୍ଦ୍ର ଯାଦବ ନାମକ ଜଣେ ବ୍ୟକ୍ତି ଏହି ର଼୍ୟାକେଟ୍ ଚଳାଉ ଥିଲେ। ସେମାନେ ଏବେ ଫେରାର ଅଛନ୍ତି ବୋଲି ଅପରାଧ ଶାଖା ଏସିପି ପ୍ରୀତ ପାଲ ସିଂ ସାଙ୍ଗଓ୍ବାନ କହିଛନ୍ତି।
ଅଭିଯୁକ୍ତାଙ୍କ ବିରୋଧରେ ଜଣେ ସାମାଜିକ କର୍ମୀ ଅକ୍ଟୋବରରେ ପୋଲିସରେ ଅଭିଯୋଗ କରିଥିଲେ। ଘଟଣାର ତଦନ୍ତ ପାଇଁ ପୂର୍ବରୁ ଏସ୍ଆଇଟି ଗଠନ କରିବାକୁ ନିର୍ଦ୍ଦେଶ ଦେଇଥିଲେ ରାଜ୍ୟର ମହିଳା କମିଶନ।
ଗତ ମଙ୍ଗଳବାର କର୍ନାଲର ନ୍ୟୁ କଲୋନୀ ଥାନାରେ ଏକ ଅଭିଯୋଗ ଆସିଥିଲା। ଅଭିଯୋଗକାରୀ ଦର୍ଶାଇଥିଲେ ଯେ, ବିଜୟ ପାର୍କ ଅଞ୍ଚଳରେ ଭଡ଼ା ଘର ଖୋଜୁଥିବା ବେଳେ ମୋ ପୁଅ କାନ୍ଥରେ ଟୁ ଲେଟ୍ ଲାଗିଥିବା ପୋଷ୍ଟରରୁ ନମ୍ବର ନେଇ କଲ କରିଥିଲେ। ରୁମ ଦେବାକୁ ରାଜି ଥିବା କହିଥିଲେ ଜଣେ ଯୁବତୀ। ପରେ ଯୁବତୀ ଜଣକ ମୋ ପୁଅକୁ ଫୋନ କରି କଥା ହେବାର କିଛି ଦିନ ପରେ ଧମକାଉଛନ୍ତି।
ତାଙ୍କ ଅଭିଯୋଗକୁ ଆଧାର କରି ଯୁବତୀଙ୍କୁ ଗିରଫ କରିଥିଲୁ। ସେହି ଯୁବତୀ ୮ ଜଣଙ୍କ ବିରୋଧରେ ବଳାତ୍କାର ଅଭିଯୋଗ କରିଥିଲେ। ସେଥି ମଧ୍ୟରୁ ୪ଟି ଖାରଜ ହୋଇ ସାରିଥିବା ବେଳେ ୩ ମାମଲା କୋର୍ଟରେ ବିଚାରଧୀନ ଅଛି। ଅନ୍ୟ ଦୁଇଟି ମାମଲାର ତଦନ୍ତ ଚାଲିଥିବା ନ୍ୟୁ କଲୋନୀ ଥାନା ଏସ୍ଏଚ୍ଓ ରାଜେଶ କୁମାର କହିଛନ୍ତି।
