ଖୋର୍ଦ୍ଧା ଅଫିସ,୨୮।୨: ଗୁରୁଜଙ୍ଗ ଗୁଳିକାଣ୍ଡର ମୁଖ୍ୟ ଅଭିଯୁକ୍ତ କୁମାରବସ୍ତ ଗ୍ରାମର ଦୀପୁ ଓରଫ ଦୀପକ କୁମାର ପ୍ରଧାନଙ୍କୁ ଖୋର୍ଦ୍ଧା ଆଦର୍ଶ ଥାନା ପୋଲିସ ଶନିବାର ଗିରଫ କରିଛି। ତାଙ୍କଠାରୁ ଗୋଟିଏ ପିସ୍ତଲ ଓ ୨ଟି ଜୀବନ୍ତ ଗୁଳି ଜବତ ହୋଇଛି। ଦୀପୁଙ୍କ ନାମରେ ପୂର୍ବରୁ ଖୋର୍ଦ୍ଧା ଆଦର୍ଶ ଥାନାରେ ୬ ଏବଂ ଭୁବନେଶ୍ୱର ଏସ୍ଟିଏଫ୍ ଥାନାରେ ଗୋଟିଏ ଆପରାଧିକ ମାମଲା ରହିଛି। ଉକ୍ତ ଘଟଣାରେ ପୋଲିସ ପୂର୍ବରୁ ୪ଜଣଙ୍କୁ ଗିରଫ କରିବା ସହ ସେମାନଙ୍କଠାରୁ ଅପରାଧରେ ବ୍ୟବହୃତ ୭ଟି ବାଇକ ଜବତ କରିଥିଲା। ଦୀପୁ ଗ୍ୟାଙ୍ଗ ସୃଷ୍ଟି କରି ନିଜ ଅଞ୍ଚଳରେ ଆତଙ୍କରାଜ ଚଳାଇଥିଲେ। ଗୁଳିକାଣ୍ଡ ପରଠାରୁ ସେ ଫେରାର ଥିଲେ। ତାଙ୍କୁ ଧରିବା ଲାଗି ଟାଉନ ଥାନା ଅଧିକାରୀ ଉମାଶଙ୍କର ସିଂଙ୍କ ନେତୃତ୍ୱରେ ଏକ ଟିମ୍ ତଦନ୍ତ ଚଳାଇଥିଲା। ଏହି ଟିମ୍ ଦୀପୁଙ୍କ ଗତିବିଧି ଉପରେ ନଜର ରଖିଥିଲା। ଅଢେଇ ମାସର ଲୁଚକାଳି ଖେଳ ପରେ ଶେଷରେ ପୋଲିସ ଫିଲ୍ମ ଷ୍ଟାଇଲରେ ଅଭିଯୁକ୍ତ ଦୀପୁଙ୍କୁ ତାଙ୍କ ନିଜ ଗ୍ରାମ କୁମାରବସ୍ତରୁ ଧରିବାରେ ସଫଳ ହୋଇଛି। ଶନିବାର ଖୋର୍ଦ୍ଧା ଟାଉନ ଥାନା ପରିସରରେ ଆୟୋଜିତ ଖବରଦାତା ସମ୍ମିଳନୀରେ ସଦର ଏସ୍ଡିପିଓ ସୁଶୀଲ କୁମାର ମିଶ୍ର ଏହି ସୂଚନା ଦେଇଛନ୍ତି। ଏହି ଅବସରରେ ଥାନାଧିକାରୀ ସିଂ ଉପସ୍ଥିତ ଥିଲେ।
ପୋଲିସ ସୂଚନା ଅନୁଯାୟୀ, ଗତ ଡିସେମ୍ବର ୮ତାରିଖରେ ଗୁରୁଜଙ୍ଗ ମଝି ସାହିର ସନ୍ତୋଷ କୁମାର ସାହୁଙ୍କ ଘରେ ବିବାହ କାର୍ଯ୍ୟକ୍ରମ ଚାଲିଥିଲା। ସମ୍ପର୍କୀୟମାନଙ୍କୁ ନେବା ପାଇଁ ଏକ ବୋଲେରୋ ଘର ଆଗରେ ରହିଥିଲା। ସେମାନେ ଯିବାକୁ ବାହାରିବା ବେଳକୁ ବୋଲେରୋ ଆଗରେ ଏକ ବାଇକ୍ ରହିଥିବା ସନ୍ତୋଷ ଦେଖିବାକୁ ପାଇଥିଲେ। ସେ ବାଇକ ସାଇଡ୍ କରିବାକୁ ସମ୍ପୃକ୍ତ ଚାଳକଙ୍କୁ କହିଥିଲେ। ଏଥିରେ ବାଇକ ଚାଳକ ରାଗି ଯାଇ ତାଙ୍କର ଅନ୍ୟ ୪ଜଣ ସମର୍ଥକଙ୍କୁ ଘଟଣାସ୍ଥଳକୁ ଡାକିଥିଲେ। ସେଠାରେ ଉତ୍ତେଜନା ପ୍ରକାଶ ପାଇବା ଦେଖି ସନ୍ତୋଷଙ୍କର ଜଣେ ସମ୍ପର୍କୀୟ ତାଙ୍କୁ ଉଦ୍ଧାର କରିବାକୁ ଚେଷ୍ଟା କରିଥିଲେ। ତେବେ ଏହି ସମୟରେ ଦୀପୁ ଏକ ପିସ୍ତଲ ବାହାର କରି ସନ୍ତୋଷଙ୍କ ଉପରକୁ ଗୁଳି ଚଳାଇଥିଲେ। ସନ୍ତୋଷ କୌଶଳ କ୍ରମେ ବର୍ତ୍ତିଯିବା ସତ୍ତ୍ୱେ ଆହତ ହୋଇଥିଲେ। ଗୁଳିଟି ଘର କବାଟରେ ବାଜିଥିଲା। ଦୀପୁ ପୁଣି ବ୍ଲାଙ୍କ୍ ଫାୟାରିଂ କରି ସ୍ଥାନୀୟ ଲୋକଙ୍କୁ ଡରାଇ ସେଠାରୁ ଫେରାର ହୋଇଯାଇଥିଲେ। ସନ୍ତୋଷଙ୍କ ଅଭିଯୋଗ କ୍ରମେ ଥାନାରେ ଦଫା ୩୪୧, ୩୨୩, ୩୨୫, ୩୦୭, ୫୦୬, ୩୪ ଆଇପିସି, ୨୫-୨୭ ଆର୍ମ୍ସ ଆକ୍ଟରେ ଏକ କେସ୍ (ନଂ. ୪୪୨/୨୦) ରୁଜୁ କରି ପୋଲିସ ତଦନ୍ତ ଜାରି ରଖିଥିଲା।