ଭୁବନେଶ୍ୱର, ୨୮।୧୨(କ୍ରୀଡ଼ା ପ୍ରତିନିଧି)- କରୋନା ମହାମାରୀ ଜନିତ ବ୍ରେକ୍ ପରେ ରାଜ୍ୟର ପ୍ରଥମ ଟେନିସ ଟୁର୍ନାମେଣ୍ଟ ମେଣ୍ଢାଶାଳସ୍ଥିତ ଗୁରୁକୁଳ ଟେନିସ ରିସର୍ଟରେ ଅନୁଷ୍ଠିତ ହୋଇଯାଇଛି। ଶନିବାର ଓ ରବିବାର ୨ ଦିନ ଧରି ଗୁରୁକୁଳ ଟେନିସ ଚାମ୍ପିୟନଶିପ୍ ୧୫ ଓ ୧୯ ବର୍ଷରୁ କମ୍ ବର୍ଗରେ ଖେଳା ଯାଇଥିଲା। ଭୁବନେଶ୍ୱରର ପ୍ରତିଭା ସମ୍ପନ୍ନ ଖେଳାଳି ଦେବାଶିଷ ସାହୁ ଉଭୟ ବର୍ଗରେ ଚାମ୍ପିୟନ ହୋଇ ଦ୍ୱିମୁକୁଟ ହାସଲ କରିଛନ୍ତି। ସେ ୧୫ ବର୍ଷରୁ କମ୍ ଫାଇନାଲରେ ୬-୩, ୬-୪ରେ ଶୁଭ୍ରନିଲ ବର୍ମନ ଏବଂ ୧୯ ବର୍ଷରୁ କମ୍ ଫାଇନାଲରେ ୪-୬, ୭-୬(୭/୫), ୬-୩ ସେଟ୍ରେ ସଂଗ୍ରାମ କୁମାର ପାତ୍ରଙ୍କୁ ପରାସ୍ତ କରିଥିଲେ। ଉଭୟ ବିଭାଗର ଚାମ୍ପିୟନଙ୍କୁ ୧୫୦୦ ଏବଂ ରନର୍ସଅପ୍ଙ୍କୁ ୧୦୦୦ଟଙ୍କାର ଅର୍ଥରାଶି ସହ ପ୍ରମାଣପତ୍ର ପ୍ରଦାନ କରାଯାଇଥିଲା। ଓଡ଼ିଶା ଟେନିସ ଇତିହାସରେ ପ୍ରଥମଥର ପାଇଁ ମେଣ୍ଢାଶାଳ ଗ୍ରାମର ବିଶିଷ୍ଟ ଚାଷୀ ଅଭିନ ବେହେରାଙ୍କୁ ମୁଖ୍ୟ ଅତିଥି କରାଯାଇଥିଲା। ଅନ୍ୟ ଅତିଥିଙ୍କ ମଧ୍ୟରେ ରାଜ୍ୟର ପ୍ରଥମ ଏଟିପି ର଼୍ୟାଙ୍କ୍ପ୍ରାପ୍ତ ଟେନିସ ଖେଳାଳି ଚିନ୍ମୟ ପ୍ରଧାନ ଏବଂ ସିନିୟର ଖେଳାଳି ବିବେକ ତିବରଓ୍ବାଲ ଉପସ୍ଥିତ ଥିଲେ। ଟୁର୍ନାମେଣ୍ଟ ରେଫରି ସନ୍ତୋଷ କୁମାର ମଲିକ କାର୍ଯ୍ୟକ୍ରମ ପରିଚାଳନା କରିଥିଲେ।