ଭୁବନେଶ୍ବର, ୨୩ା୮(ବ୍ୟୁରୋ):ବିଜେଡି ୨୦୨୪ ନିର୍ବାଚନକୁ ଦୃଷ୍ଟିରେ ରଖି ଆଗକୁ ଦଳର କାର୍ଯ୍ୟକ୍ରମ ନେଇ ଯୋଜନା ଆରମ୍ଭ କରିଛି। ପ୍ରଥମେ ବରିଷ୍ଠ ପର୍ଯ୍ୟବେକ୍ଷକ, ବିଜୁ ଯୁବ ଜନତା ଦଳ ତାଲିକା ଏବଂ ସୋମବାର ବିଜୁ ଛାତ୍ର ଜନତା ଦଳର ସାଙ୍ଗଠନିକ ପୁନର୍ଗଠନ କରାଯାଇଛି। ଏପରିସ୍ଥଳେ ବିଜେଡି ବିଧାୟକ ଏବଂ ମନ୍ତ୍ରୀମାନଙ୍କୁ ନେଇ ଆସନ୍ତା ୨୮ରେ ଏକ ସମ୍ମିଳନୀ କରିବାକୁ ଯାଉଛି। ସକାଳ ୮ଟାରେ ସମ୍ମିଳନୀ କଳିଙ୍ଗ ଷ୍ଟାଡିୟମଠାରେ ଅନୁଷ୍ଠିତ ହେବ। କେବଳ ବିଧାୟକ ଏବଂ ମନ୍ତ୍ରୀଙ୍କ ବ୍ୟତୀତ ଅନ୍ୟ କାହାରିକୁ ବୈଠକରେ ସାମିଲ କରାଯିବ ନାହିଁ ବୋଲି ଜଣାପଡିଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ବୈଠକରେ ଅଧ୍ୟକ୍ଷତା କରିବା ସହ ବିଧାୟକ, ମନ୍ତ୍ରୀଙ୍କଠାରୁ କିଛି ପ୍ରସ୍ତାବ ନେବେ ଆଉ ସେ କିଛି ଦେବେ। ସମସ୍ତ ବିଧାନସଭା ନିର୍ବାଚନମଣ୍ଡଳୀରେ ବିଧାୟକ, ମନ୍ତ୍ରୀମାନେ କିପରି ଉନ୍ନୟନମୂଳକ କାର୍ଯ୍ୟ ଆଗକୁ ନେଇପାରିବେ, ପ୍ରଶାସନିକ ଅଧିକାରୀଙ୍କ ସହ କିପରି ଉତ୍ତମ ସମନ୍ବୟ ରହିବ ସେନେଇ ଆଲୋଚନା ହେବ। ଏହାସହ ସମସ୍ତ ବିଧାୟକ ନିଜ ନିର୍ବାଚନମଣ୍ଡଳୀରେ କରିଥିବା ସକ୍ରିୟ ସଦସ୍ୟତାର ପୁନଃ ଯାଞ୍ଚ ହେବ। ଏହାର କାଗଜପତ୍ର ପୁଣିଥରେ ଦାଖଲ କରିବାକୁ କୁହାଯାଇଛି। ଏଥିସହ ଯୁବ ଏବଂ ଛାତ୍ରନେତାଙ୍କୁ କିଭଳି ଅଧିକ ସୁଦୃଢ କରିହେବ ସେନେଇ ଆଲୋଚନା ହେବ। ଏଥିରେ କୋଅପରେଟିଭ ବ୍ୟାଙ୍କ ନିର୍ବାଚନ ସମ୍ପର୍କରେ ମଧ୍ୟ ଆଲୋଚନା ହେବ ବୋଲି ଜାଣିବାକୁ ମିଳିଛି।
