ନୂଆଦିଲ୍ଲୀ, ୨୬ା୯ (ପି.ଟି.)-ସିଜନ ୨୦୧୯-୨୦ ପାଇଁ ଭାରତୀୟ ପୁରୁଷ ଦଳ ଗୋଲକିପର ଗୁର୍ପ୍ରୀତ୍ ସିଂ ସାନ୍ଧୁ ଏବଂ ମହିଳା ଦଳ ମିଡ୍ଫିଲ୍ଡର ସଞ୍ଜୁ ପ୍ଲେୟର ଅଫ୍ ଦି ଇୟର ବିବେଚିତ ହୋଇଥିବା ସର୍ବଭାରତୀୟ ଫୁଟ୍ବଲ ମହାସଂଘ (ଏଆଇଏଫ୍ଏଫ୍) ଶୁକ୍ରବାର ଘୋଷଣା କରିଛି। ଗୁରପ୍ରୀତ୍ ପ୍ରଥମ ଥର ପାଇଁ ଏହି ପୁରସ୍କାର ଲାଭ କରିଛନ୍ତି। ୨୦୦୯ରେ ସୁବ୍ରତ ପଲ୍ଙ୍କ ପରେ ଏଆଇଏଫ୍ଏଫ୍ ପ୍ଲେୟର ଅଫ୍ ଦି ଇୟର ପୁରସ୍କାର ଲାଭ କରିବାରେ ସେ ଦ୍ୱିତୀୟ ଗୋଲକିପର। ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍) ଏବଂ ଆଇ-ଲିଗ୍ କ୍ଲବ କୋଚ୍ମାନଙ୍କ ଭୋଟ୍ ଭିତ୍ତିରେ ଗୁରପ୍ରୀତ ପୁରସ୍କାର ଲାଭ କରିବା ଲାଗି ବିବେଚିତ ହୋଇଥିଲେ। ଗୁର୍ପ୍ରୀତ ତାଙ୍କ ପ୍ରତିକ୍ରିୟାରେ କହିଛନ୍ତି, ଛେତ୍ରୀ ଭାଇ (ସୁନୀଲ ଛେତ୍ରୀ) ଏହି ପୁରସ୍କାର ଅନେକଥର ଜିତିଛନ୍ତି। ତାଙ୍କୁ ଏହି ପୁରସ୍କାର ମିଳିବାର ସୌଭାଗ୍ୟ କେବେ ମିଳିବ ସେଥିପାଇଁ ତାଙ୍କ ମନରେ ଉତ୍କଣ୍ଠା ରହିଥିଲା। ଏହି ପୁରସ୍କାର ଜିତିବା କ୍ଷେତ୍ରରେ ଏଆଇଏଫ୍ଏଫ୍ ସମେତ ଯେଉଁମାନଙ୍କର ଭୂମିକା ରହିଛି, ସେମାନଙ୍କୁ ସେ ଧନ୍ୟବାଦ ଦେବାକୁ ଚାହିଁବେ। ଦୋହାଠାରେ ଏସିଆନ ଚାମ୍ପିୟନ କାତାର ବିପକ୍ଷ ମ୍ୟାଚ ଡ୍ର ରଖିବାରେ ଗୁର୍ପ୍ରୀତଙ୍କର ବିଶେଷ ଭୂମିକା ରହିଥିଲା। ପ୍ରଭାବୀ ପ୍ରଦର୍ଶନ ପାଇଁ ଗତ ଇଣ୍ଡିଆନ ସୁପର ଲିଗ୍ ସଂସ୍କରଣରେ ସେ ଗୋଲଡେନ୍ ଗ୍ଲୋଭ୍ ଜିତିଥିଲେ। ୨୮ବର୍ଷୀୟ ଏହି ଗୋଲ୍କିପର ଗତବର୍ଷ ଅର୍ଜୁନ ପୁରସ୍କାର ଲାଭ କରିଥିଲେ। ଅନ୍ୟପକ୍ଷରେ ଗତ ସିଜନରେ ଉଚ୍ଚକୋଟରର ପ୍ରଦର୍ଶନ ପାଇଁ ଜାତୀୟ ମହିଳା ଦଳ ମିଡ୍ଫିଲ୍ଡର ସଞ୍ଜୁ ଏଥର ପୁରସ୍କାର ପାଇବା ପାଇଁ ହକ୍ ଦାର ହୋଇଛନ୍ତି। ରନତ୍ବାଳା ଦେବୀ ୨୦୧୯-୨୦ ବର୍ଷର ଇମର୍ଜିଂ ଓମେନ୍ସ ଫୁଟ୍ବଲର ଅପ୍ ଦି ଇୟର ପୁରସ୍କାର ଜିତିଛନ୍ତି। ଏଆଇଏଫ୍ଏଫ୍ ବୈଷୟିକ ନିର୍ଦ୍ଦେଶକ ଇସାକ୍ ଦୋରୁଙ୍କ ସହ ପରାମର୍ଶ ପରେ ମୁଖ୍ୟ କୋଚ୍ ମେମୋଲ୍ ରକି ଉଭୟ ବିଜେତାଙ୍କୁ ମନୋନୀତ କରିଥିଲେ। ସଞ୍ଜୁ କହିଛନ୍ତି, ବ୍ୟକ୍ତିଗତ ଦୃଷ୍ଟିରୁ ମୋ ପାଇଁ ଏହା ଏକ ବଡ଼ ମାଇଲଖୁଣ୍ଟ। ଗତ କିଛିବର୍ଷ ହେଲା ମୁଁ ଯେଉଁ କଠିନ ପରିଶ୍ରମ କରି ଆସିଛି ଏହା ହେଉଛି ତାହାର ଏକ ପ୍ରମାଣ।