ଟାରୋବା (ଓ୍ବେଷ୍ଟଇଣ୍ଡିଜ), ୨୪ା୮ (ପି.ଟି.)-ଗୁୟାନା ଆମାଜନ ଓ୍ବାରିୟର୍ସ କ୍ୟାରିବିୟନ ପ୍ରିମିୟର ଲିଗ୍ (ସିପିଏଲ୍) ଇତିହାସରେ ସବୁଠାରୁ କମ୍ ରନ୍ ବିଜୟ ଲକ୍ଷ୍ୟ ଧାର୍ଯ୍ୟ କରିଥିଲେ ହେଁ ଜାମାଇକା ତଲାଓ୍ବାସ୍ ବିପକ୍ଷରେ ୧୪ରନରେ ବିଜୟ ହାସଲ କରିଛି। ବ୍ରେଣ୍ଡନ କିଙ୍ଗ୍ (୨୯ରନ) ଓ ଚନ୍ଦ୍ରପଲ୍ ହେମରାଜ (୨୧ରନ) ଓପନିଂ ପାର୍ଟନରଶିପ୍ରେ ୫.୪ ଓଭରରେ ୫୬ ରନ ଯୋଗ କରି ପ୍ରଥମେ ବ୍ୟାଟିଂ କରିଥିବା ଓ୍ବାରିୟର୍ସକୁ ଭଲ ଆରମ୍ଭ ଦେଇଥିଲେ। ମାତ୍ର ପରେ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ଓ୍ବାରିୟର୍ସ ୧୯.୧ ଓଭରରେ ୧୧୮ରନ କରି ଅଲଆଉଟ ହୋଇଯାଇଥିଲା। ତଲାଓ୍ବାସ ତରଫରୁ ମୁଜିବୁର ରହମନ ଓ କାର୍ଲୋସ ବ୍ରାଥଓ୍ବେଟ୍ ତିନୋଟି ଲେଖାଏଁ ଉଇକେଟ କରିଥିବାବେଳେ ସନ୍ଦୀପ ଲାମିଚାନେ ୨ ଉଇକେଟ ସଫଳତା ପାଇଥିଲେ। ୧୧୯ ରନର ବିଜୟ ଲକ୍ଷ୍ୟ ପିଛା କରିବାକୁ ଯାଇ ତଲଓ୍ବାସ୍ର ଦୁଇ ଓପନର କୌଣସି ରନ ସଂଗ୍ରହ ନ କରି ପ୍ୟାଭିଲିୟନ ଫେରିଥିଲେ। ୧୩ତମ ଓଭର ବେଳକୁ ମାତ୍ର ୪୮ରନରେ ବ୍ୟାଟିଂ ଲାଇନ୍ ଅପ୍ର ଅଧା ବ୍ୟାଟ୍ସମ୍ୟାନ ଆଉଟ ହୋଇଯାଇଥିଲେ। ଆନ୍ଦ୍ରେ ରସେଲ ଏକ ବିସ୍ଫୋରକ ଇନିଂସ ଖେଳିଥିଲେ ହେଁ ଦଳକୁ ଜିତାଇପାରି ନ ଥିଲେ। ସେ ୪ ଚୌକା ଓ ୫ ଛକା ସହିତ ୩୭ ବଲ୍ରେ ୫୨ରନ କରି ଅପରାଜିତ ରହିଥିଲେ। ତଲାଓ୍ବାସ ଦଳ ୨୦ ଓଭରରେ ୭ ଉଇକେଟ ବିନିମୟରେ ୧୦୪ ରନ କରିପାରିଥିଲା।
