ଡେରାଡୁନ୍: ଏଣିକି ଜିମ୍ରେ ବ୍ୟାୟାମ କରିବେ ହାତୀ। ଉତ୍ତରାଖଣ୍ଡସ୍ଥିତ ରାଜାଜୀ ବ୍ୟାଘ୍ର ଅଭୟାରଣ୍ୟରେ ହାତୀଙ୍କ ପାଇଁ ତିଆରି ହୋଇଛି ଏକ ଜିମ୍। ଏହି ବିରାଟକାୟ ବନ୍ୟପ୍ରାଣୀମାନେ ଯେପରି ନିଜକୁ ଫିଟ୍ ରଖିପାରିବେ, ସେଥିପାଇଁ ଏହି ନିଆରା ପଦକ୍ଷେପ ନିଆଯାଇଛି। ଏଠାରେ ଏବେ ୩ଛୁଆ ହାତୀଙ୍କ ସମେତ ୬ହାତୀ ରହିଛନ୍ତି। ଏମାନେ ନିଜ ଦଳରୁ ଅଲଗା ହୋଇଛନ୍ତି କିମ୍ବା ଏମାନଙ୍କ ଉପଦ୍ରବ ଯୋଗୁ ବନ ବିଭାଗ ପକ୍ଷରୁ କାବୁ କରାଯାଇଛି। ସେହିପରି ଜଙ୍ଗଲରେ ମା’କୁ ହରାଇଥିବା ହାତୀ ମଧ୍ୟ ଏମାନଙ୍କ ମଧ୍ୟରେ ରହିଛନ୍ତି। ହାତୀମାନଙ୍କ ଦଳରେ ରହିବା ଅଭ୍ୟାସ। ଏଠାରେ ଜଙ୍ଗଲ ଭଳି ପରିବେଶ ନାହିଁ; ଯଦ୍ଦ୍ବାରା ହାତୀମାନଙ୍କ ମାନସିକ ଚାପ ବଢ଼ିପାରେ। ଏମାନଙ୍କ ବିଚରଣ ପାଇଁ ଏକ ସ୍ବାଭାବିକ ପ୍ରାକୃତିକ ପରିବେଶ ଯୋଗାଇଦେବା ପାଇଁ ଜିମ୍ ତିଆରି କରାଯାଇଛି। ଏହି ଜିମ୍ରେ ହାତୀମାନେ ଖେଳିବା ଏବଂ ନିଜକୁ ବ୍ୟସ୍ତ ରଖିବା ପାଇଁ ଛୋଟ ବଲ୍, ଝୁଲନ୍ତା ବଲ୍, ଟାୟାର ରିଙ୍ଗ୍, ଗର୍ତ୍ତରେ ଖାଦ୍ୟ ରଖି ଖୋଜିବା, ମାଟିରେ ଗାଧୋଇବା ଆଦି ବିଭିନ୍ନ ଖେଳର ବ୍ୟବସ୍ଥା ରହିଛି। ଏହାଦ୍ୱାରା ସେମାନଙ୍କ ମାନସିକ ଚାପ କମିବା ସହ ମନ ଖୁସି ରହିବ। ଏ ନେଇ ବ୍ୟାଘ୍ର ଅଭୟାରଣ୍ୟର ଭେଟେରିନାରି ଡାକ୍ତର ଆଦିତି ଶର୍ମା କହିଛନ୍ତି, ମାନସିକ ଓ ଶାରୀରିକ ସ୍ତରରେ ସୁସ୍ଥ ରହିବାକୁ ହେଲେ ହାତୀମାନେ ଖୋଲା ପରିବେଶରେ ବିଚରଣ କରିବା ଜରୁରୀ। ଏହି ଜିମ୍ରେ ଏଥିପାଇଁ ସମସ୍ତ ବ୍ୟବସ୍ଥା କରାଯାଇଛି। ଉଲ୍ଲେଖଯୋଗ୍ୟ, ଉତ୍ତରାଖଣ୍ଡରେ ଜୁନ୍ ୬ରୁ ୮ ପର୍ଯ୍ୟନ୍ତ ହାତୀ ଗଣନା କରାଯାଇଥିଲା। ୨୦୧୭ରେ ରାଜ୍ୟରେ ହାତୀଙ୍କ ସଂଖ୍ୟା ୧୮୩୯ ରହିଥିବାବେଳେ ଏହି ବର୍ଷ ଏମାନଙ୍କ ସଂଖ୍ୟା ୨୦୨୬ରେ ପହଞ୍ଚିଛି। ସରକାରୀ ତଥ୍ୟ ଅନୁଯାୟୀ, ରାଜ୍ୟରେ ୩ ବର୍ଷରେ ହାତୀଙ୍କ ସଂଖ୍ୟା ୧୦ ପ୍ରତିଶତ ବଢ଼ିଥିବା ଜଣାପଡ଼ିଛି।