ଡେରାଡୁନ୍,୧୩।୩: କରୋନା ପରେ ଏବେ ‘ଇନ୍ଫ୍ଲୁଏଞ୍ଜା-ଏ’ର ସବ୍ଭାରିଆଣ୍ଟ ଏଚ୍୩ଏନ୍୨ ସାରା ଦେଶରେ ଚିନ୍ତା ବଢ଼ାଇଛି। ଚାରିଧାମ ଯାତ୍ରା ଆରମ୍ଭ ହେବା ପୂର୍ବରୁ ଏହାକୁ ନେଇ ଉତ୍ତରାଖଣ୍ଡ ରାଜ୍ୟ ସରକାର ଚିନ୍ତା ପ୍ରକଟ କରିବା ସହ ସତର୍କତା ଅବଲମ୍ବନ କରିଛନ୍ତି। ଇତିମଧ୍ୟରେ ପର୍ଯ୍ୟଟନ ମନ୍ତ୍ରୀ ସତ୍ୟପାଲ ମହାରାଜ ଏନେଇ ଏକ ବିବୃତ୍ତି ଜାରି କରିଛନ୍ତି। ସେ କହିଛନ୍ତି, ଏଚ୍୩ଏନ୍୨ ଭାଇରସ୍ ଭୟ ଦିନକୁ ଦିନ ବଢ଼ିବାରେ ଲାଗିଛି। ତେଣୁ ଏହାକୁ ରୋକିବା ପାଇଁ କେତେକ ପଦକ୍ଷେପ ଗ୍ରହଣ କରାଯାଇଛି। ଯାତ୍ରା ସମୟରେ ପ୍ରତ୍ୟେକ ବ୍ୟକ୍ତି ମାସ୍କ ଲଗାଇବା ସହ ସାନିଟାଇଜର ବ୍ୟବହାର କରିବେ। ସରକାରଙ୍କ ଦ୍ୱାରା ଜାରି କରାଯାଇଥିବା ସମସ୍ତ ଗାଇଡ୍ଲାଇନ୍ ମାନିବାକୁ ବାଧ୍ୟତାମୂଳକ ବୋଲି ଉକ୍ତ ବିବୃତ୍ତିରେ କୁହାଯାଇଛି। ଏଥିସହ ରାଜ୍ୟର ସମସ୍ତ ଜନସାଧାରଣଙ୍କ ସମେତ ଉତ୍ତରାଖଣ୍ଡ ଆସୁଥିବା ସମସ୍ତ ପର୍ଯ୍ୟଟକଙ୍କୁ ମଧ୍ୟ ସତ୍ୟପାଲ ମହାରାଜ ଅନୁରୋଧ କରିଛନ୍ତି କି, ପ୍ରତ୍ୟେକ ବ୍ୟକ୍ତି ମାସ୍କ ଲଗାଇବା ସହ ଗାଇଡ୍ଲାଇନ୍କୁ ପାଳନ କରନ୍ତୁ। ବର୍ତ୍ତମାନ ପର୍ଯ୍ୟନ୍ତ କେଦାରନାଥ ଏବଂ ବଦ୍ରିନାଥ ଯାତ୍ରା ପାଇଁ ୨୬୭୪୩୪ ଯାତ୍ରୀ ନିଜର ନାମ ପଞ୍ଜିକରଣ କରାଇସାରିଛନ୍ତି। ଚଳିତ ବର୍ଷ ବହୁ ସଂଖ୍ୟାରେ ଶ୍ରଦ୍ଧାଳୁ ଯାତ୍ରାରେ ସାମିଲ ହେବା ନେଇ ଆଶା କରାଯାଉଛି। ଏହାକୁ ଦୃଷ୍ଟିରେ ରଖି ରାଜ୍ୟସରକାର ସମସ୍ତ ପ୍ରକାରର ପଦକ୍ଷେପ ଆପଣାଉଛନ୍ତି। ସୂଚନାଯୋଗ୍ୟ, ଚାରିଧାମ ଯାତ୍ରା ଏପ୍ରିଲ ୨୨ରୁ ଆରମ୍ଭ ହେଉଛି। କେଦାରନାଥ ଧାମ କବାଟ ଏପ୍ରିଲ ୨୫ରେ ଖୋଲିବାକୁ ଥିବା ବେଳେ ବଦ୍ରିନାଥ କବାଟ ଏପ୍ରିଲ ୨୭ରେ ଖୋଲିବ ବୋଲି ଜଣାପଡ଼ିଛି।
