ନୂଆପଡ଼ା ଅଫିସ,୯।୪: ନୂଆପଡ଼ା ଜିଲା କୋମନା ବ୍ଲକ ଅନ୍ତର୍ଗତ କୁରୁମପୁରି ପଞ୍ଚାୟତ ଲିମଡିହି ଗାଁର ଏକର ଏକର ଧାନ,ପିଆଜ ଚାଷ ଅଦିନିଆ ବର୍ଷା ଓ କୁଆପଥର ମାଡ଼ରେ ନଷ୍ଟ ହୋଇଯାଇଛି। ନୂଆପଡ଼ା ଜିଲାରେ ୯୦ପ୍ରତିଶତ ଲୋକେ ଚାଷ ଉପରେ ନିର୍ଭର କରି ଖରିଫ ଓ ରବି ଋତୁରେ ଧାନ ଚାଷ ସହ ଚିନାବାଦାମ, ମୁଗ, ବିରି, ପନିପରିବା ଓ ଅନ୍ୟାନ ଚାଷ କରିଥାନ୍ତି। ଚଳିତ ରବିଋତୁରେ ଉଠାଜଳସେଚନ ପ୍ରକଳ୍ପ ଦ୍ୱାରା ଧାନ ଓ ଅନ୍ୟାନ ଚାଷ କରାଯାଇଥିଲା। ଲିମଡିହି ଗାଁରେ ଜିରା ସିଂସାହୁ ୪ ଏକର ଜମିରେ ହାଇବ୍ରିଡ୍ ଧାନ ଚାଷ କରିଥିଲେ। ସେହିପରି ନିଳାବତି ସାହୁ ୭ଏକର, ବାବୁରାମ ସାହୁ ୨ ଏକର, ଆନନ୍ଦ ରାମ ସାହୁ ୪ ଏକର,ଚୈତରାମ ସାହୁ ୪ ଏକର ୨୫ ଡିସମିଲ, କୁନୁ ସାହୁ ୩ ଏକର ୫୦ ଡିସମିଲ, ଗେନ୍ଦରାମ ସାହୁ ୩ ଏକର ଜମିରେ ହାଇବ୍ରିଡ୍ ଧାନ କରିଥିଲେ। ଅଦିନିଆ ବର୍ଷା ଓ କୁଆପଥର ମାଡରେ ଧାନ ସବୁ ଝଡ଼ିଯାଇଛି। ଗାଁର ଗୁର୍ଜୁ ମଲ୍ଲିକ ଏକ ଏକର ଜମିରେ ପିଆଜ ଚାଷ କରିଥିଲେ। ଅତ୍ୟଧିକ ବର୍ଷା ଯୋଗୁ ଚାଷ ଜମିରେ ପାଣି ଜମି ରହିବା ଦ୍ୱାର ପିଆଜ ସବୁ ନଷ୍ଟ ହେବାରେ ଲାଗିଛି। ଅଦିନିଆ ବର୍ଷା ଭାଙ୍ଗିଦେଇଛି ଚାଷୀଙ୍କ ମେରୁଦଣ୍ଡ। ଅମଳ ପୂର୍ବରୁ ଉଜୁଡି ଯାଇଛି ଧାନ ଓ ପିଆଜ ଚାଷ। ଚାଷୀ ମୁଣ୍ଡରେ ହାତ ଦେଇ ବସିଛନ୍ତି। କ୍ଷେତ ଚାରି ଆଡେ ଚାହିଲେ ସବୁଜ ସୁନ୍ଦର ଦିଶୁଥିଲା। ଚାଷୀ ଦୁଇ ପଇସା ପାଇବା ଆଶା ବାନ୍ଧିଥିଲେ। ହେଲେ ଅଦିନିଆ ବର୍ଷା ଓ କୁଆପଥର ଚାଷ ସବୁ ଉଜାଡି ଦେଲା। ଧାନ ସବୁ କେଣ୍ଡାରୁ ଝଡି ପଡିଛି। ଫସଲ ନଷ୍ଟ ହେବା ଦେଖି ଚାଷୀ ଦୁଃଖରେ ଭାଙ୍ଗି ପଡିଛନ୍ତି। କେମିତି ପରିବାର ପ୍ରତିପୋଷଣ କରିବା ସଙ୍ଗେ ଧାର କରଜ ସୁଝିବେ ସେହି ଚିନ୍ତାରେ ଚାଷୀ। କ୍ଷତି ହୋଇଥିବା ଧାନ ଚାଷ ଉପରେ ଆକଳନ କରି ଜିଲା ପ୍ରଶାସନ ତୁରନ୍ତ କ୍ଷତିପୂରଣ ଦେବା ପାଇଁ ସ୍ଥାନୀୟ ସରପଞ୍ଚ ରାୟଧର ବଘେଲ ଓ ଚାଷୀମାନେ ଦାବି କରିଛନ୍ତି। କୃଷି ଗ୍ରାମସେବକ ଚନ୍ଦ୍ରିକା ଶବରଙ୍କୁ ପଚାରିବାରୁ ଅଦିନିଆ ବର୍ଷା ଓ କୁଆପଥର ମାଡରେ ଧାନ ନଷ୍ଟ ହୋଇଛି। ଧାନ ଫସଲ ନଷ୍ଟ ଉପରେ ଆକଳନ କରି ରିପୋର୍ଟ ସରକାରଙ୍କୁ ପଠାଇ ଦେଇଛୁ ବୋଲି କହିଥିଲେ।