ଢେଙ୍କିକୋଟ,୧୪ା୧୨(ନୀଳମଣି ମଣ୍ଡଳ)କେନ୍ଦୁଝର ଜିଲା ଘଟଗାଁ ତହସିଲ ଅନ୍ତର୍ଗତ ଢେଙ୍କିକୋଟ ରାଜସ୍ବ ନିରୀକ୍ଷକ (ଆର୍ଆଇ ଅଫିସ)ଙ୍କ କାର୍ଯ୍ୟାଳୟ ଅବ୍ୟବସ୍ଥା ଘେରରେ ଚାଲିଛି। କାର୍ଯ୍ୟାଳୟ ମାସକୁ ଅଧା ଦିନ ବନ୍ଦ ରହୁଥିବାରୁ ଛାତ୍ରୀଛାତ୍ର ସମେତ ବହୁ ଆଦିବାସୀ ଚାଷୀ, ବୃଦ୍ଧାବୃଦ୍ଧ, ଭୂମିହୀନ ଜନସାଧାରଣ ବିଭିନ୍ନ ସାର୍ଟିଫିକେଟ ପାଇଁ ଅସୁବିଧା ଭୋଗୁଛନ୍ତି। ଚତୁଃପାର୍ଶ୍ୱରେ ପାଚେରି ନ ଥିବାରୁ ଅସାମାଜିକ କାର୍ଯ୍ୟକଳାପ ବଢ଼ୁଛି। ସମସ୍ୟା ଦୀର୍ଘଦିନ ହେବ ଲାଗି ରହିଥିବା ବେଳେ ଏଥିପ୍ରତି ଗୁରୁତ୍ୱ ଦିଆଯାଉ ନ ଥିବାରୁ ଅସନ୍ତୋଷ ବୃଦ୍ଧି ପାଉଛି।
ପ୍ରକାଶ ଯେ, ଢେଙ୍କିକୋଟ ଆରଆଇ ଅଧୀନରେ ଢେଙ୍କିକୋଟ, ଖଣ୍ଟଘର ଓ ମନୋହରପୁର ୩ ପଞ୍ଚାୟତର ୧୬ ଗ୍ରାମ ରହିଛି। ବିଶେଷତଃ ଜାତିଗତ ପ୍ରମାଣପତ୍ର, ଇନ୍କମ ସାର୍ଟିଫିକେଟ, ବୃଦ୍ଧାବୃଦ୍ଧ ଭତ୍ତା ଫର୍ମ ପୂରଣ, ବିଭିନ୍ନ ପ୍ରକାର ସାର୍ଟିଫିକେଟ ପାଇଁ ଜନସାଧାରଣ ଏଠାକୁ ଦୈନିକ ଆସିଥାନ୍ତି। ମାତ୍ର ମାସର ଅଧା ଦିନ କାର୍ଯ୍ୟାଳୟରେ ତାଲା ଝୁଲୁଥିବାରୁ ଲୋକେ ନିରାଶ ହୋଇ ଫେରିବାକୁ ବାଧ୍ୟ ହେଉଛନ୍ତି। କାର୍ଯ୍ୟାଳୟଟି ଏକ ହୁଡ଼ି ତଳେ ହୋଇଥିବା ବେଳେ ଏଠାକୁ ରାସ୍ତା ନ ଥିବା ଓ ସୂଚନା ଫଳକ ମଧ୍ୟ ଲଗାଯାଇ ନ ଥିବାରୁ ଜନସାଧାରଣ କାର୍ଯ୍ୟାଳୟ ନିକଟରେ ପହଞ୍ଚତ୍ବା କଷ୍ଟକର ହେଉଛି। ଏ ସମ୍ପର୍କରେ ଆରଆଇ ସନ୍ତୋଷ ସାହୁ କହିଛନ୍ତି, କେନ୍ଦ୍ର ସରକାରଙ୍କ ବିଭିନ୍ନ ଯୋଜନା, ଟ୍ରେନିଂ, ମିଟିଂ ଓ ଜନସାଧାରଣଙ୍କ ଜମି ଚିହ୍ନଟ ଆଦି କାର୍ଯ୍ୟରେ ମାସର ଅଧା ଦିନ ଚାଲିଯାଉଛି। ଏଠାରେ ଜଣେ ପିଅନଙ୍କୁ ମଧ୍ୟ ନିଯୁକ୍ତି ଦିଆଯାଇନାହିଁ। ସରକାରଙ୍କ ତରଫରୁ ମିଳିଥିବା ଏକ ପୁରୁଣା ଲାପ୍ଟପ୍ ଅଧା ଭାଙ୍ଗିଯାଇଛି। ସେଥିରେ କାମ କଲାବେଳେ ବନ୍ଦ ହୋଇଯାଉଛି। ଅଫିସ ଚାରିପଟେ ସୁରକ୍ଷା ପାଚେରି ନାହିଁ। ଫଳରେ କାର୍ଯ୍ୟାଳୟ ଅସୁରକ୍ଷିତ ଅବସ୍ଥାରେ ରହିଛି। ଗତ ୨୦୧୧ରେ ଲୋକମାନେ ଉତ୍ତ୍ୟକ୍ତ ହୋଇ କାର୍ଯ୍ୟାଳୟରେ ନିଆଁ ଲଗାଇ ସମସ୍ତ କାଗଜପତ୍ର, ଆସବାବପତ୍ର ପୋଡ଼ି ଦେଇଥିଲେ। ଘଟଗାଁ ତହସିଲଦାର ଶରତ ଚନ୍ଦ୍ର ଗିରି, ଅତିରିକ୍ତ ତହସିଲଦାର ଶକୁନ୍ତଳା ହଁାସଦାଙ୍କୁ ଯୋଗାଯୋଗ କରାଯାଇଥିଲେ ହେଁ କୌଣସି ଉତ୍ତର ମିଳିପାରିନାହିଁ। କେନ୍ଦୁଝର ଜିଲାପାଳ ଦୃଷ୍ଟି ଦେଇ ଏଠାରେ ଆଉ ଜଣେ ଅତିରିକ୍ତ ଆର୍ଆଇ ଏବଂ ଜଣେ ପିଅନ ନିଯୁକ୍ତ କରିବା ପାଇଁ ଢେଙ୍କିକୋଟ ବିକାଶ ମଞ୍ଚ ସଭାପତି ପ୍ରଫେସର ଯୁଗୋଳ କିଶୋର ଦାସ, ବଣିକ ସଂଘର ସଭାପତି ରାଜକିଶୋର ସାହୁ ସମେତ ଜନସାଧାରଣ ଦାବି କରିଛନ୍ତି।