ଭଦ୍ରକ ଅଫିସ, ୨୩ା୫ (ସ୍ବ.ପ୍ର.): ଭଦ୍ରକ ବ୍ଲକର ସାତଭଉଣି-ଚୁଡ଼ାକୁଟି ରାସ୍ତା କାମ ଅଧାପନ୍ତରିଆ ହୋଇ ରହିଛି। ଫଳରେ ଏହି ରାସ୍ତା ଏବେ ମରଣଯନ୍ତା ପାଲଟିଛି। ରାସ୍ତାରୁ ମେଟାଲଗୁଡ଼ିକ ବାହାରିଯାଇଛି। ଦୁଇଚକିଆ କିମ୍ବା ଚାରିଚକିଆ ଯାନ ଯାତାୟାତ ବେଳେ ଚକ ମେଟାଲ ଉପରେ ଚଢ଼ିଲା ସମୟରେ ମେଟାଲ ଛିଟିକି ପାଖରେ ଛିଡ଼ା ହୋଇଥିବା ମଣିଷ ଲହୁଲୁହାଣ ହେଉଛନ୍ତି। ପ୍ରକାଶ ଯେ, ଉକ୍ତ ରାସ୍ତା କାର୍ଯ୍ୟର ଟେଣ୍ଡର ନେଇଥିବା ଠିକାଦାର ୨୦୨୧-୨୨ରୁ କାମ ଆରମ୍ଭ କରିଥିଲେ। ଏପର୍ଯ୍ୟନ୍ତ ପଚାଶ ଭାଗ କାର୍ଯ୍ୟ ସରିଛି। ଯେଉଁ କାର୍ଯ୍ୟ କରାଯାଇଛି, ତାହାକୁ ମଧ୍ୟ ଅଧିକାରୀ ଯାଞ୍ଚ କିମ୍ବା ତଦାରଖ କରୁ ନ ଥିବା ସାଧାରଣରେ ଅଭିଯୋଗ ହେଉଛି। ଗତବର୍ଷ କଂକ୍ରିଟ ରାସ୍ତା ଠିକ୍ ଭାବେ କରାଯାଇ ନାହିଁ। ବଳଭଦ୍ରପୁରଠାରୁ ଆରମ୍ଭ କରାଯାଇଥିବା ମେଟାଲ କାର୍ଯ୍ୟ ଦୁଇମାସରୁ ଅଧିକ ଦିନ ହେବାରୁ ଅନୁମୋଦିତ ମେଟାଲ ସୋଲିଙ୍ଗ ସ୍ତର ଏବେ ଆଉ ମାପକୁ ଆସିବ ନାହଁି। ବିଳମ୍ବ ହେଲେ ମୂଳ ରାସ୍ତାର ଉପର ଅଂଶ ଦେଖାଯିବ। ବର୍ତ୍ତମାନ ମେଟାଲଗୁଡ଼ିକ ବାହାରିଯାଇ ଯିବାଆସିବାରେ ଅସୁବିଧା ସୃଷ୍ଟି କରୁଛି। ରାସ୍ତାର ଦୁରାବସ୍ଥା ନେଇ ଗ୍ରାମର ଜଗନ୍ନାଥ ରାୟ, ସାମାଜିକ କର୍ମୀ ନିତ୍ୟାନନ୍ଦ ବେହେରା, ସନାତନ ବେହେରା ଓ ମହେଶ୍ୱର ଲେଙ୍କା ଅସନ୍ତୋଷ ପ୍ରକାଶ କରିବା ସହ ବିଭାଗୀୟ ଅଧିକାରୀ ଏଥିପ୍ରତି ଦୃଷ୍ଟି ଦେବାକୁ ଦାବି କରିଛନ୍ତି। ଏ ସମ୍ପର୍କରେ ଗ୍ରାମ୍ୟ ଉନ୍ନୟନ ବିଭାଗ ସହ କାର୍ଯ୍ୟ ନିର୍ବାହୀ ଅଧିକାରୀ ଛତିଲାଲ ମାରାଣ୍ଡି କହିଛନ୍ତି, ୨୦୨୧ ଡିସେମ୍ବର ୧୭ରେ ଉକ୍ତ ରାସ୍ତା କାମ ଆରମ୍ଭ ହୋଇଥିଲା ବେଳେ ୨୦୨୨ ନଭେମ୍ବର ୧୬ରେ ଶେଷ ହେବା କଥା। ରାସ୍ତା କାମ ସମ୍ପୂର୍ଣ୍ଣ କରାଯାଇ ନ ଥିବାରୁ ଠିକାଦାରଙ୍କୁ ତାଗିଦା ସହ ଏ ବାବଦରେ ଉପରିସ୍ଥ ଅଧିକାରୀଙ୍କୁ ଅବଗତ କରାଯାଇଛି। ତେବେ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ।