ନବରଙ୍ଗପୁର,୧୧।୧(ବି.ପ୍ର.): ନବରଙ୍ଗପୁର ଜିଲ୍ଲାରେ ଥିବା ଓଡିଶା ଆଦର୍ଶ ବିଦ୍ୟାଳୟଗୁଡିକରେ ଖାଲିଥିବା ଶିକ୍ଷକ ପଦବୀ ପୁରଣ ନେଇ ତାଲିକା ପ୍ରସ୍ତୁତି ଓ ନିଯୁକ୍ତି ନେଇ ପୁଣି ଥରେ ଅଡୁଆ ବଢ଼ିବାରେ ଲାଗିଛିବ ବିଜ୍ଞାପନ ତାଲିକାରେ ଶିକ୍ଷକ ପଦବୀ ନ ଥାଇ ଟିଜିଟି ବିଜ୍ଞାନ ଶିକ୍ଷୟିତ୍ରୀ ନିଯୁକ୍ତି ଚଞ୍ଚକତା ଧରାପଡିବା ପରେ ପଦବୀକୁ ପ୍ରତ୍ୟାହୃତ ପାଇଁ ଚିଠି କରିଦିଆଗଲା । ଏବେ ପୁଣି ଆଉ ଏକ ଘଟଣା ପଦାରେ ପଡ଼ିଲାଣି। ଆବଶ୍ୟକ ଶିକ୍ଷୟିତ୍ରୀ ଶିକ୍ଷକ ନିଯୁକ୍ତି ପାଇଁ ତାଲିକା କରାଗଲା। ପ୍ରସ୍ତୁତି ବିଜ୍ଞାପନ ବାହାର କରାଯାଇ ଅଧା ନିଯୁକ୍ତି ଦିଆଗଲା ଓ ଅଧା ଛଡାଗଲା ବୋଲି ଅଭିଯୋଗ ହେଉଛି। ଆଶାୟୀ ଶିକ୍ଷକମାନେ କରିଥିବା ଅଭିଯୋଗ ଅନୁଯାୟୀ ଓଡ଼ିଶା ଆଦର୍ଶ ବିଦ୍ୟାଳୟ ଗୁଡିକରେ କଳା, ବିଜ୍ଞାନ, କ୍ରୀଡ଼ା, ହିନ୍ଦି, ସଂସ୍କୃତ, ମ୍ୟୁଜିକ ଓ କଳା ବିଭାଗର ଶିକ୍ଷକ ପଦବୀ ପୂରଣ ନେଇ ଏକ ଯୋଗ୍ୟ ତାଲିକା ପ୍ରସ୍ତୁତ କରିବା ପାଇଁ ଗତ ମେ ମାସରେ ବିଜ୍ଞାପନ ବାହାର କରାଯାଇଥିଲା। ଆଶାୟୀ ଶିକ୍ଷକମାନେ ଜୁନ୍ ମାସରେ ଆବେଦନ କରିଥିଲେ। ଆବେଦନ କରିଥିବା ସମସ୍ତ ଶିକ୍ଷକଙ୍କ ପ୍ରମାଣପତ୍ର ଯାଞ୍ଚ କରାଯାଇଥିଲା। ଡିସେମ୍ବର ୧୩ରେ ଉଭୟ ପିଜିଟି ଓ ଟିଜିଟି ବର୍ଗର କେବଳ କଳା, ବିଜ୍ଞାନ ଓ ସଂସ୍କୃତ ବିଭାଗର ୩୭ ଜଣ ଶିକ୍ଷକଙ୍କୁ ମୌଖିକ ପରୀକ୍ଷା ପାଇଁ ଡକାଯାଇ ଏକ ଯୋଗ୍ୟ ତାଲିକା ପ୍ରସ୍ତୁତ କରାଯାଇଥିଲା। ସେଥି ମଧ୍ୟରୁ ଯୋଗ୍ୟ ଶିକ୍ଷକଙ୍କୁ ବିଭିନ୍ନ ଆଦର୍ଶ ବିଦ୍ୟାଳୟକୁ ଖାଲିଥିବା ପଦବୀ ଅନୁଯାୟୀ ପଠାଯାଇଥିଲା। କିନ୍ତୁ ଆର୍ଟସ, ମ୍ୟୁଜିକ, କ୍ରୀଡ଼ା ଓ ହିନ୍ଦୀ ଶିକ୍ଷକମାନଙ୍କୁ ମୌଖିକ ପରୀକ୍ଷା ପାଇଁ ଡକାଗଲା ନାହିଁକି ନିଯୁକ୍ତି ଦିଆଗଲା ନାହିଁ ବୋଲି ଆଶାୟୀ ଶିକ୍ଷକମାନେ ଅଭିଯୋଗ କରିଛନ୍ତି। ଏ ନେଇ ଜିଲ୍ଲା ଶିକ୍ଷାଧିକାରୀ କାର୍ଯ୍ୟାଳୟରେ ବାରମ୍ବାର ଜଣାଉଥିଲେ ମଧ୍ୟ କୌଣସି ସନ୍ତୋଷ ଜନକ ଉତ୍ତର ମିଳୁନାହିଁ ବୋଲି କହିଛନ୍ତି। ଏ ନେଇ ଜିଲା ଶିକ୍ଷା ଅଧିକାରୀଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି ଏହା ପୁରାପୁରି ଅସ୍ଥାୟୀ ଓ ସାମୟିକ ପଦବୀ। ଖାଲିଥିବା ଶିକ୍ଷକ ପଦବୀ ଏବେ ସିଧା ସଳଖ ସ୍କୁଲ ପକ୍ଷରୁ ନିୟୋଜିତ କରିବେ। ଆଶାୟୀମାନେ ସେହି ସ୍କୁଲରେ ଆବେଦନ କରିବେ ବୋଲି କହିଥିଲେ। ଯାହା ଫଳରେ ଏବେ ଆବେଦନ କରିଥିବା ହିନ୍ଦୀ, ଆର୍ଟସ, ମ୍ୟୁଜିକ, କ୍ରୀଡ଼ା ଆଶାୟୀ ଶିକ୍ଷକଙ୍କ ମହଲରେ ଅସନ୍ତୋଷ ବିବାରେ ଲାଗିଛି।