ଖୋର୍ଦ୍ଧା,୨୬ା୬(ପ୍ରଭାତ ପାଣିଗ୍ରାହୀ): ଡିଭିଜନାଲ ରେଲୱେ ମ୍ୟାନେଜର (ଡିଆର୍ଏମ୍)ଙ୍କ ସ୍ତ୍ରୀଙ୍କୁ ଚପଲ ଖୋଲିବାକୁ କହିବାରୁ ଝାଡ଼ଖଣ୍ଡ ଧାନବାଦ ମଣ୍ଡଳ ରେଲଓ୍ବେ ହସ୍ପିଟାଲ ଆଟେଣ୍ଡାଣ୍ଟ ବସନ୍ତ ଉପାଧ୍ୟାୟଙ୍କୁ ଅର୍ଦ୍ଧନଗ୍ନ କରାଯିବା ଘଟଣାରେ ମାନବିକ ଅଧିକାର ଉଲ୍ଲଂଘନ ହୋଇଛି। ଏନେଇ ପୁରୀର ମାନବ ଅଧିକାର କର୍ମୀ ଜୟନ୍ତ ଦାଶ ଜାତୀୟ ମାନବ ଅଧିକାର କମିଶନ (ଏନ୍ଏଚ୍ଆର୍ସି)ଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି। ଡିଆର୍ଏମ୍ଙ୍କ ବିରୋଧରେ ଭାରତୀୟ ରେଲଓ୍ବେର ଏକ ତଦନ୍ତକାରୀ ଟିମ୍ ଦ୍ୱାରା ନିରପେକ୍ଷ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ ଲାଗି ସେ ନିବେଦନ କରିଛନ୍ତି। ଏହି ଘଟଣା ପରେ ବସନ୍ତ ମାନସିକ ସ୍ତରରେ ଭାଙ୍ଗିପଡ଼ିିଛନ୍ତି। ଏକ ଘରୋଇ ମେଡିକାଲରେ ତାଙ୍କର ଚିକିତ୍ସା ଚାଲିଛି। ତେଣୁ ତାଙ୍କୁ ମେଡିକାଲ ଖର୍ଚ୍ଚ ଓ ୫ଲକ୍ଷ ଟଙ୍କାର କ୍ଷତିପୂରଣ ଦିଆଯାଉ। ଏହି କ୍ଷତିପୂରଣ ଟଙ୍କା ସମ୍ପୃୃକ୍ତ ଡିଆର୍ଏମ୍ଙ୍କ ଦରମାରୁ ଭରଣା କରାଯାଉ। ଭବିଷ୍ୟତରେ ଯେପରି ଏପରି ଭୁଲ୍ର ସେ ପୁନରାବୃତ୍ତି ନ କରନ୍ତି ସେଥିପାଇଁ ତାଙ୍କ ବିରୋଧରେ କଠୋର ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ଦାଶ ତାଙ୍କ ଅଭିଯୋଗରେ ଉଲ୍ଲେଖ କରିଛନ୍ତି।
ଘଟଣାରୁ ପ୍ରକାଶ ଯେ, ଗୁରୁବାର ଡିଆର୍ଏମ୍ଙ୍କ ସ୍ତ୍ରୀ ଚିକିତ୍ସା ପାଇଁ ଡାକ୍ତରଙ୍କ ନିକଟକୁ ଯାଇଥିଲେ। ଏହି ସମୟରେ ଆଟେଣ୍ଡାଣ୍ଟ ଡ୍ୟୁଟିରେ ଥିବା ବସନ୍ତ ତାଙ୍କୁ ଚପଲ ବାହାରେ ରଖି ଯିବା ପାଇଁ କହିଥିଲେ। ଚାମ୍ବରକୁ କୌଣସି ରୋଗୀ ଆସିଲେ, ଚପଲ ବାହାରେ ରଖି ଆସିବା ପାଇଁ ପୂର୍ବରୁ ଡାକ୍ତରଙ୍କ ନିର୍ଦ୍ଦେଶ ରହିଥିଲା। ତେବେ ବସନ୍ତଙ୍କ କଥାକୁ ଏଡ଼ାଇ ଯାଇ ସେ ଚପଲ ପିନ୍ଧି ଡାକ୍ତରଙ୍କ ନିକଟକୁ ଯାଇଥିଲେ। ପରେ ଡିଆର୍ଏମ୍ ମେଡିକାଲ ମୁଖ୍ୟ ଅଧୀକ୍ଷକ (ସିଏମ୍ଏସ୍)ଙ୍କ ଦ୍ୱାରା ବସନ୍ତଙ୍କୁ ଚାମ୍ବରକୁ ଡକାଇଥିଲେ। ଡିଆର୍ଏମ୍ଙ୍କ ନିକଟରେ ଉଭୟ ବସନ୍ତ ଏବଂ ସିଏମ୍ଏସ୍ ପହଞ୍ଚିଥିଲେ। ସ୍ତ୍ରୀଙ୍କୁ ଚପଲ ଖୋଲି ଡାକ୍ତରଙ୍କ ନିକଟକୁ ଯିବା ପାଇଁ କହିବାରୁ ଡିଆର୍ଏମ୍ ବସନ୍ତଙ୍କୁ ଗାଳିଗୁଲଜ କରିଥିଲେ। ଏତିକିରେ ତାଙ୍କ ମନ ଶାନ୍ତ ହୋଇ ନ ଥିଲା। ତାଙ୍କୁ ଅର୍ଦ୍ଧନଗ୍ନ ଅବସ୍ଥାରେ ଘରକୁ ପଠାଇଥିଲେ। ଡିଆର୍ଏମ୍ଙ୍କ ଏଭଳି ବ୍ୟବହାର ନେଇ ବସନ୍ତ ମାନସିକ ସ୍ତରରେ ଭାଙ୍ଗିପଡିଥିଲେ। ତାଙ୍କୁ ପ୍ରଥମେ ଡିଭିଜନାଲ ରେଲୱେ ହସ୍ପିଟାଲରେ ଭର୍ତ୍ତି କରାଯାଇଥିଲା। ତେବେ ଅବସ୍ଥା ଗୁରୁତର ହେବାରୁ ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ଉକ୍ତ ଘଟଣା ନେଇ ଧାନବାଦ ମଣ୍ଡଳ ରେଲଓ୍ବେ ହସ୍ପିଟାଲ୍ର ଗ୍ରୁପ୍-ଡି କର୍ମଚାରୀମାନେ ଡିଆର୍ଏମ୍ଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଦାବି କରିଛନ୍ତି। ଏନେଇ ମାନବ ଅଧିକାର କର୍ମୀ ଦାଶ କହିଛନ୍ତି, ଏ କ୍ଷେତ୍ରରେ ଖୋଲାଖୋଲି ଭାବେ ମୌଳିକ ଅଧିକାରର ଉଲ୍ଲଂଘନ କରାଯାଇଛି। ଏଣୁ ସମ୍ପୃକ୍ତ ଡିଆର୍ଏମ୍ଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ହେବା ଆବଶ୍ୟକ, ଯେପରି କୌଣସି ଅଧିକାରୀ ଏଭଳି ଘଟଣା ଘଟାଇବାକୁ ସାହସ କରିବେ ନାହିଁ। ସମ୍ବିଧାନ ସମସ୍ତଙ୍କ ପାଇଁ ସମାନ। ଏଥିପ୍ରତି ରେଳ ବିଭାଗ ଯତ୍ନବାନ ହେବା ଉଚିତ। ଏହା ଏକ ଅକ୍ଷମଣୀୟ ଭୁଲ। ଏଥିଲାଗି ସମ୍ପୃକ୍ତ ଡିଆର୍ଏମ୍ ନିଃସର୍ତ୍ତ କ୍ଷମା ପ୍ରାର୍ଥନା କରିବା ଉଚିତ ବୋଲି ଦାଶ ମତବ୍ୟକ୍ତ କରିଛନ୍ତି।