ଦଶମନ୍ତପୁର,୨୬।୧୧ (ଅରବିନ୍ଦ ନାୟକ )କୋରାପୁଟ ଜିଲା ଦଶମନ୍ତପୁର ବ୍ଲକ ପିଣ୍ଡାପଦର ପଞ୍ଚାୟତ ଅଧିନରେ ଥିବା ଲୋରେଶ ଗ୍ରାମରେ ଶନିବାର ପୁଣି ଜନନୀ ଯନ୍ତ୍ରଣା ଦେଖିବାକୁ ମିଳିଛି। ଉକ୍ତ ଗ୍ରାମର ଗୁପ୍ତ ସାଉଁନ୍ତାଙ୍କ ସ୍ତ୍ରୀ ଦୀପ ସାଉଁନ୍ତାଙ୍କ ଶୁକ୍ରବାର ରାତିରେ ପ୍ରସବ ଯନ୍ତ୍ରଣା ହେବାରୁ ପରିବାର ଲୋକେ ୧୦୮ ଆମ୍ବୁଲାନ୍ସ ପାଇଁ ଫୋନ କରିଥିଲେ। ହେଲେ ଦଶମନ୍ତପୁର ଗାଁର ଚତୁଃପାର୍ଶ୍ୱରେ ବିରିମାଳି ଓ ପଟ୍ରିମାଳି ପାହାଡ଼ ଘେରି ଗାଁକୁ ପକ୍କା ରାସ୍ତା ନ ଥିବାରୁ ଆମ୍ବୁଲାନ୍ସ ଆସିପାରି ନ ଥିଲା। ଫଳରେ ପରିବାର ଲୋକେ ଗ୍ରାମବାସୀଙ୍କ ସହାୟତାରେ ଶନିବାର ସକାଳେ ଖଟିଆ କରି ଗର୍ଭବତୀଙ୍କୁ ନେବାବେଳେ ଅଧାବାଟରେ ସେ ଶିଶୁକନ୍ୟାଙ୍କୁ ଜନ୍ମ ଦେଇଥିଲେ। ସେଠାରେ ବହୁ ସମୟ ବିଶ୍ରାମ ନେବା ପରେ ମା’ ଓ ନବଜାତକକୁ ଖଟିଆରେ ବୋହି ମରିଚଗୁଡ଼ା ଗାଁ ଦେଇ ୩ ଫୁଟ ଜଳରେ ପ୍ରବାହିତ ହେଉଥିବା ଅନ୍ଧାରୀ ନଦୀ ପାର କରାଇଥିଲେ। ୧୦୮ ଆମ୍ବୁଲାନ୍ସ ନ ଆସିବାରୁ ଦଶମନ୍ତପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ନିୟୋଜିତ ଏକ ଘରୋଇ ଆମ୍ବୁଲାନ୍ସ ଯୋଗେ ନଦୀ ଆରପାରୀରୁ ଆଣି ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ।
ଲୋରେଶ ଗ୍ରାମରୁ ମରିଚଗୁଡ଼ା ଛକ ପ୍ରାୟ ୪ କିମି ଦୂର ପାହାଡିଆ ରାସ୍ତାର ଅବସ୍ଥା ଶୋଚନୀୟ। ପାହାଡ଼ିଆ ଜଙ୍ଗଲ ରାସ୍ତା ଭୟରେ ଦୀପ ସାଉଁନ୍ତାଙ୍କୁ ରାତିରେ ଚିକିତ୍ସାଳୟକୁ ଆଣି ପାରି ନ ଥିଲେ। ଶନିବାର ସକାଳୁ ସ୍ଥାନୀୟ ସରପଞ୍ଚ ନବୀନ ମୁଦୁଲିଙ୍କ ସହଯୋଗରେ ଗାଁର ସେମନ କୁଲିଶିକା ଓ ରଞ୍ଜନ ମିଣିଆକା ଗର୍ଭବତୀଙ୍କୁ ଖଟିଆରେ ବୋହି କୁସୁମ ଘାଟି ଦେଇ ଆସୁଥିଲେ। ଗାଁଠାରୁ ପ୍ରାୟ ୨ କିମି ଦୂର ସକାଳ ପ୍ରାୟ ୯ଟା ୨୫ରେ ବିରିଆମ୍ବ ଝୋଲା ଜଙ୍ଗଲ ତଳେ ଏକ ଶିଶୁକନ୍ୟା ଜନ୍ମ ଦେଇଥିଲେ। ସେଠାରୁ ମା’ ଓ ନବଜାତ ଶିଶୁଙ୍କୁ ନଦୀ ପାର କରି ଏକ ଘରୋଇ ଆମ୍ବୁଲାନ୍ସ ଯୋଗେ ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇଥିଲା।
ମରିଚଗୁଡ଼ା ଗାଁ ଛକଠାରୁ ଲୋରେସ ଗ୍ରାମକୁ ସଂଯୋଗ କରୁଥିବା ୪ କିମି ଦୂର ଯାଏ ରାସ୍ତା ନ ଥିବାରୁ ଦୀର୍ଘ ୧ ବର୍ଷ ପୂର୍ବେ ସଂପୃକ୍ତ ଗ୍ରାମର କାଳିଆ ଜାନୀଙ୍କ ସ୍ତ୍ରୀ ଚବି ମଧ୍ୟ କସୁମ ଡଙ୍ଗର ତଳେ ଏକ ଶିଶୁକନ୍ୟା ଜନ୍ମ ଦେଇଥିଲେ। ଲୋରେସ ଗ୍ରାମରେ ୩୭ ପରିବାର ବସବାସ କରୁଥିବା ବେଳେ ଗାଁକୁ ରାସ୍ତା ନ ଥିବାରୁ ସେମାନେ ବହୁ ହଇରାଣ ହେଉଥିବା ସାଧବ ମିଣିଆକା, କସାଇ ସାଉଁନ୍ତା, ଧନୁର୍ଜୟ କମାର, ଇସୁଦା ସାଉଁନ୍ତା, ପ୍ରତାପ ସାଉଁନ୍ତା ପ୍ରମୁଖ କହିଛନ୍ତି। ରାସ୍ତା ନିର୍ମାଣ ନେଇ ଅନେକ ଥର ବ୍ଲକ ପ୍ରଶାସନଠାରୁ ଆରମ୍ଭ କରି ଜିଲାପାଳ ଏବଂ ଜନ ପ୍ରତିନିଧିଙ୍କୁ ଅଭିଯୋଗ କରି ଆସୁଥିଲେ ମଧ୍ୟ କୌଣସି ସୁଫଳ ମିଳୁନି। ଏଭଳି ରୋଗୀ ଏବଂ ଗର୍ଭବତୀଙ୍କୁ ଖଟିଆରେ ବୋହି ଆଣିବା ସମୟରେ କାହାର ମୃତ୍ୟୁ ଘଟିବା ପରେ ହିଁ ପ୍ରଶାସନର କଣ ଆଖି ଖୋଲିବ କି ବୋଲି ଗ୍ରାମବାସୀ ପ୍ରଶ୍ନ ଉଠାଇଛନ୍ତି। ଅନ୍ଧାରୀ ନଦୀରେ ପୋଲ ଏବଂ ମରିଚଗୁଡ଼ା ଗାଁ ଛକଠାରୁ ପ୍ରାୟ ୪ କିମି ଦୂର ନୂତନ ରାସ୍ତା ନିର୍ମାଣ କରା ନ ଗଲେ ଆମେ ପୁଣି ଆଗାମୀ ସାଧାରଣ ନିର୍ବାଚନରେ ଭୋଟ ବର୍ଜନ କରିବୁ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି।