ଜେରୁଜେଲମ୍/ଗାଜା ସିଟି,୧୫।୧୦: ଇସ୍ରାଏଲ୍ ଉପରେ ଆକ୍ରମଣର ନେତୃତ୍ୱ ନେଉଥିବା ହମାସ୍ର ନୁଖ୍ବା ୟୁନିଟ୍ କମାଣ୍ଡର ଅଲି କାଦି ଇସ୍ରାଏଲୀ ସେନାର ଡ୍ରୋନ୍ ଆକ୍ରମଣରେ ନିହତ ହୋଇଛନ୍ତି। ଗତ ୭ ତାରିଖରେ ଅଲି ନିହତ ହୋଇଥିବା ଇସ୍ରାଏଲ୍ ଡିଫେନ୍ସ ଫୋର୍ସ (ଆଇଡିଏଫ୍ ) ଏବଂ ଆଇଏସ୍ଏ ଗୋଇନ୍ଦା ତଥ୍ୟ ଆଧାରରେ ଏହାର ବାୟୁସେନା ପକ୍ଷରୁ ଉପରୋକ୍ତ ସୂଚନା ଦିଆଯାଇଛି। ଶୁକ୍ରବାର ଆଇଡିଏଫ୍ ସ୍ଥଳଭାଗରେ ଆକ୍ରମଣ ଆରମ୍ଭ କରିବା ପୂର୍ବରୁ ଉତ୍ତର ଗାଜା ଷ୍ଟ୍ରିପ୍ରୁ ୧୦ ଲକ୍ଷ ଲୋକମାନଙ୍କୁ ଦକ୍ଷିଣ ଭାଗକୁ ପଳାଇଯିବା ପାଇଁ ନିର୍ଦ୍ଦେଶ ଦେଇଥିଲା। ବର୍ତ୍ତମାନ ସୁଦ୍ଧା ୪ ଲକ୍ଷରୁ ଊର୍ଦ୍ଧ୍ୱ ପାଲେଷ୍ଟିନୀୟ ଘରଦ୍ୱାର ଛାଡ଼ି ପଳାଇଗଲେଣି। ଗତ ୨୪ ଘଣ୍ଟା ମଧ୍ୟରେ ଇସ୍ରାଏଲୀ ସେନା ଗାଜା ଉତ୍ତର ଭାଗର ଅନେକ ଅଞ୍ଚଳରେ ଚଢ଼ାଉ ଜାରି ରଖିଛି। ଉକ୍ତ ଅଞ୍ଚଳରୁ ଆତଙ୍କବାଦୀ ଓ ଅସ୍ତ୍ରଶସ୍ତ୍ର ଖୋଜା ଚାଲିଛି। ଏଥିସହିତ ଦକ୍ଷିଣ ଇସ୍ରାଏଲରୁ ଅପହୃତ ହୋଇଥିବା ଲୋକମାନଙ୍କୁ ମଧ୍ୟ ଇସ୍ରାଏଲୀ ସେନା ଖୋଜୁଛି। ଗତ ସପ୍ତାହର ଆକ୍ରମଣ ବେଳେ ହମାସ୍ ଆତଙ୍କବାଦୀମାନେ ୧୫୦ରୁ ଊର୍ଦ୍ଧ୍ୱ ଇସ୍ରାଏଲୀ ଓ ବିଦେଶୀ ନାଗରିକଙ୍କୁ ଅପହରଣ କରିନେଇଥିଲେ।
ଗୋଟିଏ ସପ୍ତାହ ବିତିଥିବାବେଳେ ମୃତ୍ୟୁସଂଖ୍ୟା ୩,୫୦୦ ଅତିକ୍ରମ କରିଛି। ଇସ୍ରାଏଲୀ ସେନାର କ୍ରମାଗତ ଏୟାରଷ୍ଟ୍ରାଇକ୍ରେ ଗାଜା ଷ୍ଟ୍ରିପ୍ର ୭୨୪ ଶିଶୁଙ୍କ ସମେତ ୨,୨୧୫ ଜଣ ପ୍ରାଣ ହରାଇଲେଣି। ସେହିପରି ହମାସ୍ ବିଦ୍ରୋହୀଙ୍କ ଆକ୍ରମଣରେ ୧,୩୦୦ରୁ ଅଧିକ ଇସ୍ରାଏଲୀ ନିହତ ହୋଇଥିବା ଜଣାପଡ଼ିଛି। ଉକ୍ତ ଅଞ୍ଚଳରେ ହିଂସା ବଢ଼ିବା ସହ ଉତ୍ତେଜନା ମଧ୍ୟପ୍ରାଚ୍ୟର ଅନ୍ୟାନ୍ୟ ଦେଶକୁ ବ୍ୟାପିବାରେ ଲାଗିଛି। ବିଭିନ୍ନ ସହରରେ ପାଲେଷ୍ଟିନୀୟଙ୍କ ସମର୍ଥନରେ ଓ ଇସ୍ରାଏଲ୍ର ଏୟାର ଷ୍ଟ୍ରାଇକ୍କୁ ନିନ୍ଦା କରି ବିକ୍ଷୋଭ ପ୍ରଦର୍ଶନ କରାଯାଉଛି। ବେରୁଟ୍, ଇରାକ, ଇରାନ, ଜୋର୍ଡାନ ଏବଂ ବାହାରିନ୍ରେ ପାଲେଷ୍ଟାଇନ୍ ସମର୍ଥନରେ ହଜାର ହଜାର ଲୋକ ବିକ୍ଷୋଭରେ ସାମିଲ ହୋଇଛନ୍ତି। ଇସ୍ରାଏଲ୍ ବୋମା ଓ ରକେଟ ମାଡ଼ ଜାରି ରଖିଥିବାବେଳେ ଆହତମାନଙ୍କ ଚିକିତ୍ସା ଲାଗି ଗାଜା ହସ୍ପିଟାଲଗୁଡ଼ିକରେ ସମସ୍ୟା ଦେଖାଦେଇଛି। ସେଠାର ସ୍ବାସ୍ଥ୍ୟସେବା ବ୍ୟବସ୍ଥା ଏକପ୍ରକାର ଅଚଳ ହୋଇପଡ଼ିଛି।
