ସାଖୀର (ବାହାରିନ୍), ୨ା୧୨ (ଏପି)-କୋଭିଡ୍ ଟେଷ୍ଟରେ ୭ଥର ବିଶ୍ୱଚାମ୍ପିୟନ ଲୁଇସ୍ ହାମିଲଟନଙ୍କର ପଜିଟିଭ୍ ଆସିଛି। ମର୍ସିଡିଜ୍ ଏଏମ୍ଜି ପେଟ୍ରୋନାସ୍ ଫର୍ମୁଲା ଓ୍ବାନ ଟିମ୍ ପକ୍ଷରୁ ଏକ ବିବୃତ୍ତିରେ କୁହାଯାଇଛି। ଫଳରେ ଆସନ୍ତା ରବିବାର ହେବାକୁଥିବା ସାଖୀର ଗ୍ରାଁ ପ୍ରିରେ ସେ ଭାଗ ନେଇପାରିବେ ନାହିଁ। ଗତ ସପ୍ତାହରେ ହାମିଲଟନଙ୍କର ୩ଥର ଟେଷ୍ଟ ହୋଇଥିଲା। ତାଙ୍କର ପ୍ରତିଟି ଥର ନେଗେଟିଭ୍ ଆସିଥିଲା। ଗତ ରବିବାର ଅପରାହ୍ନରେ ବାହାରିନ୍ ଇଣ୍ଟରନ୍ୟାଶନାଲ ସର୍କିଟରେ ତାଙ୍କର କୋଭିଡ୍ ଟେଷ୍ଟ ହୋଇଥିଲା, ଯେଉଁଠାରେ ସେ ଗ୍ରାଁ ପ୍ରି ଜିତିଥିଲେ। କିନ୍ତୁ ସୋମବାର ସକାଳେ ଶଯ୍ୟାତ୍ୟାଗ ପରେ ତାଙ୍କ ନିକଟରେ ସାମାନ୍ୟ ଲକ୍ଷଣ ପ୍ରକାଶ ପାଇଥିଲା। ବାହାରିନ୍ରେ ପହଞ୍ଚତ୍ବା ପୂର୍ବରୁ ହାମିଲ୍ଟନ ଜଣଙ୍କ ସଂସ୍ପର୍ଶରେ ଆସିଥିଲେ। ତାଙ୍କର ଟେଷ୍ଟ ହେବାରୁ ସେ ପଜିଟିଭ ବୋଲି ଜଣାପଡ଼ିଥିଲେ। ଫଳରେ ହାମିଲଟନଙ୍କର ଆଉଥରେ ଟେଷ୍ଟ କରାଯାଇଥିଲା ଏବଂ ତାଙ୍କର ପଜିଟିଭ ଆସିଥିଲା। ବାହାରିନ୍ ସ୍ବାସ୍ଥ୍ୟ ପ୍ରୋଟୋକଲ ଅନୁସାରେ ବର୍ତ୍ତମାନ ହାମିଲଟନ ଆଇସାଲେଶନରେ ଅଛନ୍ତି। ଫର୍ମୁଲା ଓ୍ବାନ ଡ୍ରାଇଭରଙ୍କ ନିକଟରେ ସାମାନ୍ୟ ଲକ୍ଷଣ ଦେଖାଦେଇଥିଲେ ମଧ୍ୟ ତାଙ୍କ ସ୍ବାସ୍ଥ୍ୟାବସ୍ଥା ଭଲ ରହିଛି ଏବଂ ସେ ଫିଟ୍ ଅଛନ୍ତି। ବାହାରିନ୍ରେ ଆଉ ଏକ ରେସ୍ ଆସନ୍ତା ରବିବାର ସାଖୀର ଶର୍ଟର ସର୍କିଟରେ ହେବ। ଆବୁଧାବିରେ ୧୭ତମ ରେସ୍ ସହ ସିଜନ ଶେଷ ହେବ।