ନର୍ବର୍ଗ (ଜର୍ମାନୀ),୧୨ା୧୦:ମର୍ସିଡିଜ୍ର ଲୁଇସ ହାମିଲଟନ ଏଠାରେ ରବିବାର ଅନୁଷ୍ଠିତ ଇଫେଲ୍ ଫର୍ମୁଲା ଓ୍ବାନ ଗ୍ରାଁ ପ୍ରି ମୋଟର ରେସ୍ ଜିତିଛନ୍ତି। ଏହାଦ୍ୱାରା ଫର୍ମୁଲା ଓ୍ବାନ୍ରେ ସବୁଠାରୁ ଅଧିକ ରେସ୍ ଜିତି ମାଇକେଲ ସୁମାକର କରିଥିବା ରେକର୍ଡର ସେ ସମକକ୍ଷ ହୋଇ ପାରିଛନ୍ତି। ଇଫେଲ୍ ଫର୍ମୁଲା ଓ୍ବାନ ଗ୍ରାଁ ପ୍ରିରେ ହାମିଲଟନ ତାଙ୍କ କ୍ୟାରିୟରର ୯୧ତମ ବିଜୟ ହାସଲ କରିଛନ୍ତି। ଚାମ୍ପିୟନଶିପ୍ ଟେବୁଲ୍ର ପ୍ରଥମ ସ୍ଥାନରେ ସେ ତାଙ୍କ ସ୍ଥିତିକୁ ଆହୁରି ସୁଦୃଢ଼ କରିପାରିଛନ୍ତି। ଦ୍ୱିତୀୟ ସ୍ଥାନରେ ରହିଥିବା ଟିମ୍ମେଟ୍ ଭାଲଟୋରୀ ବୋଟାସଙ୍କଠାରୁ ପଏଣ୍ଟ ବ୍ୟବଧାନ ୬୯କୁ ବୃଦ୍ଧି କରିପାରିଛନ୍ତି। ରେସ୍ ବେଳେ କାର୍ରେ ସମସ୍ୟା ଦେଖାଦେବାରୁ ଫିନ୍ଲାଣ୍ଡ ଡ୍ରାଇଭର ବୋଟାସ୍ ରେସ୍ ଅଧାରୁ ଓହରିଯାଇଥିଲେ। ତେବେ ସେ ପର୍ଯ୍ୟନ୍ତ ହାମିଲଟନଙ୍କୁ କଡ଼ା ଟକ୍କର ଦେଇ ଆସୁଥିଲେ। ରେଡ୍ ବୁଲ୍ର ମାକ୍ସ ଭର୍ଷ୍ଟାପେନ୍ ଦ୍ୱିତୀୟ ସ୍ଥାନ ଅଧିକାର କରିଥିବାବେଳେ ରେନଲ୍ଟର ଡାନିଏଲ ରିକାର୍ଡୋ ତୃତୀୟ ହୋଇଥିଲେ। ୨୦୧୬ରେ ଜଣେ କନଷ୍ଟ୍ରକ୍ଟର ଭାବେ ଫର୍ମୁଲାଓ୍ବାନକୁ ପ୍ରତ୍ୟାବର୍ତ୍ତନ କରିବା ପରେ ରିକାର୍ଡୋ ରେନଲ୍ଟକୁ ପ୍ରଥମ ପୋଡିୟମ ଫିନିସ୍ କରାଇଛନ୍ତି। ହାମିଲଟନ ଯଦି ଚଳିତ ବର୍ଷର ଅବଶିଷ୍ଟ ୬ଟି ରେସ୍ ମଧ୍ୟରୁ ତିନୋଟିରେ ବିଜୟ ହାସଲ କରନ୍ତି ତେବେ ୭ମ ଥର ବିଶ୍ୱ ଟାଇଟଲ ହାସଲ କରିବେ। ସୁମାକରଙ୍କ ଦ୍ୱାରା ପ୍ରତିଷ୍ଠା କରାଯାଇଥିବା ଅନ୍ୟ ଏକ ରେକର୍ଡର ସେ ସମକକ୍ଷ ହୋଇ ପାରିବେ। ରବିବାର ରେସ୍ରେ ୪ର୍ଥରୁ ୧୦ମ ସ୍ଥାନ ପର୍ଯ୍ୟନ୍ତ ଯଥାକ୍ରମେ ରହିଥିଲେ ସର୍ଗିଓ ପେରେଜ୍ (ରେସିଂ ପଏଣ୍ଟ), କାର୍ଲୋସ ସେଞ୍ଜ ଜୁନିୟର(ମ୍ୟାକ୍ଲରେନ), ପିଏରେ ଗାସ୍ଲି(ଆଲ୍ଫା ତାଉରି), ଚାଲର୍ସ ଲେକ୍ରେକ୍ (ଫେରାରି), ନିକୋ ହକେନ୍ବର୍ଗ (ରେସିଂ ପଏଣ୍ଟ), ରୋମେନ୍ ଗ୍ରୋସ୍ଜେଁ (ହାସ୍) ଓ ଆଣ୍ଟୋନିଓ ଗ୍ଲୋଭିଆଞ୍ଜି (ଆଲ୍ଫା ରୋମିଓ)।
