କେନ୍ଦୁଝର,୪ା୨(ନରେଶ ଚନ୍ଦ୍ର ପଟ୍ଟନାୟକ)ଜିଲା ପ୍ରଶାସନ ପକ୍ଷରୁ ଦିବ୍ୟାଙ୍ଗଙ୍କୁ ସ୍ବାବଲମ୍ବୀ କରିବା ପାଇଁ ବିଭିନ୍ନ ପ୍ରକାରର ସହାୟତା କରାଯାଉଛି। ସେମାନଙ୍କୁ ସୁବିଧାରେ ଯାତାୟାତ ନିମନ୍ତେ ଆବଶ୍ୟକତା ଅନୁଯାୟୀ ତିନି ଚକିଆ ସାଇକେଲ, ବ୍ୟାଟେରୀ ଚାଳିତ ସାଇକେଲ, ୩ ଚକିଆ ସ୍କୁଟି ଆଦି ଯୋଗାଇ ଦିଆଯାଉଛି। ମାତ୍ର ଏହାର ମରାମତ ବ୍ୟବସ୍ଥା କରାଯାଉ ନ ଥିବାରୁ ଅଳ୍ପ ଦିନରେ ଭାଙ୍ଗି ଘରେ ପଡ଼ୁଥିବାରୁ ଅସନ୍ତୋଷ ବୃଦ୍ଧି ପାଉଛି।
ସଦର ବ୍ଲକ୍ ଜାମୁନାଳିଆ ଗ୍ରାମର ଚନ୍ଦନ ନାୟକ(୬୦)ଙ୍କୁ ବ୍ୟାଟେରୀ ଚାଳିତ ୩ ଚକିଆ ସାଇକେଲ ମିଳିଥିଲା। ସେ କେନ୍ଦୁଝର ସହରକୁ ଚାଲି ଚାଲି ଭାର କରି ଖଲି ଚଉତି, ପତ୍ର ଆଣି ବିକ୍ରି କରୁଥିଲେ। ସାଇକେଲ ମିଳିବା ପରେ ସୁବିଧାରେ ଯାତାୟାତ କରିପାରୁଥିଲେ। ତେବେ ପେଡାଲ ନିକଟରୁ ଏକ ବୋଲଟ୍ ଖସି ପଡ଼ିବା ଫଳରେ ଟ୍ରାଇ ସାଇକେଲ ଚଳାଇବାରେ ସମସ୍ୟା ହେବାରୁ ଏକ କାଠି ଲଗାଇ ଚଳାଉଛନ୍ତି। ପ୍ରଶାସନ ପକ୍ଷରୁ ରେଞ୍ଜି ଦିଆଯାଇନି କି ସର୍ଭିସ ସୁବିଧା ମିଳୁନାହିଁ। ଗରୀବ ଶ୍ରେଣୀର ହୋଇଥିବାରୁ ତାଙ୍କ ପକ୍ଷେ ସଜାଡ଼ିବା କଷ୍ଟକର। କୌଣସି ସମୟରେ ରାସ୍ତାରେ ପେଡ଼ାଲ ଖସି ପଡ଼ିବାର ଭୟ ରହୁଥିବା ଚନ୍ଦନ କହିଛନ୍ତି। ନିୟମାନୁଯାୟୀ, ନୂଆ ସାଇକେଲ ବା ଗାଡ଼ି କିଣିଲେ କମ୍ପାନୀ କିଛି ମାସ ପର୍ଯ୍ୟନ୍ତ ଏହାର କୌଣସି ସମସ୍ୟା ଥିଲେ ସଜାଡ଼ି ଦେଇଥାନ୍ତି। କିନ୍ତୁ ଏଠାରେ ସାଇକେଲ ବା ଗାଡ଼ି ବିକି କମ୍ପାନୀ ଲାଭବାନ ହେଉଛନ୍ତି ଏବଂ ପ୍ରଶାସନ ସେସବୁ ବାଣ୍ଟି ଫଟୋ ଉଠାଇ ସଫଳତା ଦର୍ଶାଉଛନ୍ତି। ସର୍ଭିସିଂ ହେଉଛି କି ନାହିଁ ତାହାର ସମୀକ୍ଷା କରୁନାହାନ୍ତି। ଏଣୁ ବହୁ ଗରିବ ଲୋକ ଅସୁବିଧାର ସମ୍ମୁଖୀନ ହେଉଥିବାରୁ ଏ ନେଇ ପ୍ରଶାସନ ଦୃଷ୍ଟି ଦେବା ସହ ମରାମତି ବ୍ୟବସ୍ଥା କରିବାକୁ ସ୍ଥାନୀୟ ସାମାଜିକ କର୍ମୀ ଦିଲୀପ କୁମାର ସାହୁ, ପ୍ରଦିପ ମହାନ୍ତ ଦାବି କରିଛନ୍ତି। ଜିଲା ସାମାଜିକ ସୁରକ୍ଷା ଅଧିକାରୀ ବିପ୍ଳବ ସାମନ୍ତରାୟ କହିଛନ୍ତି, ନିଜେ ମରାମତି ପାଇଁ କୌଣସି ସରଞ୍ଜାମ ଦିଆଯାଏ ନାହିଁ। ତେବେ ପ୍ରତ୍ୟେକ ମାସ ବ୍ଲକ୍ସ୍ତରରେ ମରାମତି ପାଇଁ ବ୍ୟବସ୍ଥା ରହିଛି। ହିତାଧିକାରୀମାନେ ବାହାରେ ରଖୁଥିବାରୁ ବର୍ଷାରେ ଖରାପ ହେଉଛି। ନଚେତ୍ ଖରାପ ହେବ ନାହିଁ।