କାଏମା,୫ା୧୧(ଶିବପ୍ରସାଦ ମହାନ୍ତି):ଧର୍ମଶାଳା ବ୍ଲକ ଅନ୍ତର୍ଗତ ବଡ଼କାଏମା ପଞ୍ଚାୟତର ଭିନ୍ନକ୍ଷମ ସୁରେଶ ମଳିକଙ୍କ ପରିବାର ଦୁଃଖଦୁର୍ଦ୍ଦଶାରେ ଦିନ କାଟୁଛନ୍ତି। ୪୦ ବର୍ଷୀୟ ସୁରେଶଙ୍କ ପରିବାର କହିଲେ ବାପା, ମା’, ସ୍ତ୍ରୀ ଓ ପୁଅଙ୍କୁ ମିଶାଇ ୫ ଜଣ। ସେ ଜନ୍ମରୁ ଭିନ୍ନକ୍ଷମ। ତାଙ୍କ ଦୁଇ ଗୋଡ଼ ଅଚଳ। ୨ ହାତରେ ଏ ଘରରୁ ସେ ଘର ଓ ବାହାରକୁ ଯିବା ଆସିବା କରନ୍ତି। ଏହାପରେ ବି ସେ ଘରେ ବସି କାଠ ତିଆରି ସୋଫା ଚେୟାର ବୁଣାବୁଣି କରି କିଛି ରୋଜଗାର କରୁଥିଲେ। ଏବେ ଡଲପ ଓ ସୋଫାର ବହୁଳ ବ୍ୟବହାର ପାଇଁ ଚେୟାର ବ୍ୟବହାର କମିଯାଇଛି। ଫଳରେ ତାଙ୍କ କାମ ବନ୍ଦ ହୋଇଯାଇଛି। ସେ ମଧ୍ୟ ଭଲ ମୃଦଙ୍ଗ ଓ ତବଲା ବଜାଇବା ପାଇଁ ଅନେକ ସ୍ଥାନକୁ ଯାଇଥାନ୍ତି। ସେଥିରୁ ଯାହା କିଛି ଖର୍ଚ୍ଚ ମିଳେ ପରିବାର ଦୁଃଖେକଷ୍ଟେ ଚଳିଯାଉଥିଲା। ତାହା ବି ବନ୍ଦ ହୋଇଯାଇଛି।
୧୦ ବର୍ଷ ପୂର୍ବେ ପ୍ରଶାସନ ପକ୍ଷରୁ ତାଙ୍କୁ ଏକ ଟ୍ରାଇ ସାଇକଲ ମିଳିଥିଲା। ହେଲେ ଏବେ ତାହା ଭାଙ୍ଗିଗଲାଣି। ସୁରେଶଙ୍କ ବାପାଙ୍କ ବୟସ ୭୪ବର୍ଷ ହୋଇଥିବାବେଳେ ମା’ଙ୍କ ବୟସ ୬୩ ବର୍ଷ। ବାପା ସାଉଣ୍ଟି ଦିନମଜୁରିଆ ଭାବେ କାମ କରି ପରିବାର ପ୍ରତି ପୋଷଣ କରୁଥିଲେ। ଏବେ କିନ୍ତୁ କୌଣସି କାମ କରିବା ତାଙ୍କ ପକ୍ଷେ ସମ୍ଭବ ହେଉନାହିଁ। ବର୍ତ୍ତମାନ ପରିବାରରେ ରୋଜଗାର କରିବା ପାଇଁ କେହିନାହାନ୍ତି। ସୁରେଶଙ୍କ ଭତ୍ତା ୭୦୦ ଓ ବାପାଙ୍କ ଭତ୍ତା ଟଙ୍କା ୫୦୦ ମିଶି ମୋଟ୍ ୧୨୦୦ ଟଙ୍କା ଏବଂ ୧୫ କିଲୋ ଚାଉଳରେ ୫ ପ୍ରାଣୀ ଦୁଃଖକଷ୍ଟେ ଜୀବନ କାଟୁଛନ୍ତି। ପରିବାରରେ ୫ ଜଣ ଥିଲେ ବି ରାଶନ କାର୍ଡରେ ୩ ଜଣଙ୍କ ନାମ ରହିଛି। ଆଉ ୨ ଜଣ ରାଶନରୁ ବଞ୍ଚତ୍ତ ହୋଇଛନ୍ତି। କିଛିଦିନ ହେବ ସୁରେଶଙ୍କ ମା’ଉଜଳି ପରାଲିସିସ ରୋଗରେ ଆକ୍ରାନ୍ତ ହୋଇଛନ୍ତି। ହେଲେ ଟଙ୍କା ଅଭାବରୁ ତାଙ୍କର ଚିକିତ୍ସା ହୋଇ ପାରୁନାହିଁ। ସାହିପଡ଼ିଶାଙ୍କ ସହଯୋଗରେ ତାଙ୍କୁ ମେଡିକାଲ ନିଆଯାଇ ଚିକିତ୍ସା କରାଯାଇଥିଲା। ଏବେ ସେ କଟକ ବଡ଼ ମେଡିକାଲରେ ଭର୍ତ୍ତି ହୋଇଛନ୍ତି। ଏହାକୁ ନେଇ ସୁରେଶ ଦୁଃଖରେ ଭାଙ୍ଗି ପଡ଼ିଛନ୍ତି। ମା’ର ଚିକିତ୍ସା କରିପାରୁନାହାନ୍ତି ବୋଲି ସେ କହିଛନ୍ତି। ସେହିପରି ରାଶନରେ ତାଙ୍କ ସ୍ତ୍ରୀ ଜ୍ୟୋତି ଓ ପୁଅ ସ୍ବରାଜଙ୍କ ନାମ ସଂଯୋଗ ପାଇଁ ୫ ବର୍ଷ ହେବ ପ୍ରଶାସନର ଦ୍ୱାରସ୍ଥ ହୋଇଥିଲେ ମଧ୍ୟ ହତାଶ ହୋଇଛନ୍ତି। ସରକାରଙ୍କ ଯୋଜନା ଅନୁସାରେ ୬୦ବର୍ଷ ପରେ ବାର୍ଧକ୍ୟ ଭତ୍ତା ବ୍ୟବସ୍ଥା ଥିଲେ ବି ତାଙ୍କ ମା’ଏଥିରୁ ବଞ୍ଚତ୍ତ ହୋଇଛନ୍ତି। ଆଉ ଏକ ଟ୍ରାଇ ସାଇକଲ ପାଇଁ ସୁରେଶ ବହୁଥର ପ୍ରଶାସନକୁ ନିବେଦନ କରିଥିଲେ ବି କେହି ଶୁଣୁନାହାନ୍ତି। ପ୍ରଶାସିନକ ଅଧିକାରୀ କେବଳ ମିଥ୍ୟା ପ୍ରତିଶ୍ରୁତି ଦେଉଛନ୍ତି ବୋଲି ସେ କହିଛନ୍ତି। ତେଣୁ ଜିଲାପାଳ ଓ ସହୃଦୟ ବ୍ୟକ୍ତି ତାଙ୍କ ପରିବାରକୁ ସହାୟତା ଯୋଗାଇ ଦେବାକୁ ସୁରେଶ ନିବେଦନ କରିଛନ୍ତି।