ରାୟଗଡ଼ା ଅଫିସ,୨।୪: ରାୟଗଡ଼ା ସହରର ସାଇପ୍ରିୟା ନଗର ତୃତୀୟ ଲାଇନରେ ଶୁକ୍ରବାର ବିଳମ୍ବିତ ରାତିରେ ବଡ଼ ଧରଣର ଡକାୟତି ହୋଇଛି। ରେଳବାଇରେ ଗୁଡ୍ସ ଟ୍ରେନ ଗାର୍ଡ ଭାବେ କାର୍ଯ୍ୟରତ ଏମ୍. ଭେଙ୍କେଟରାଓଙ୍କ ଘରେ ୮ ଜଣିଆ ଏକ ଡକାୟତି ଗ୍ୟାଙ୍ଗ ପଶି ଲୁଟି ନେଇଛନ୍ତି। ରାତିଅଧରେ ଘରର ଝରକା ଓ ଲୁହା ଗ୍ରୀଲ ଭାଙ୍ଗି ୨୦ ଭରି ସୁନା ଗହଣା ସହ ଦେଢ଼ କେଜିର ଏକ ରୁପାହାଣ୍ଡି ଓ ନଗଦ ୩୦ ହଜାର ଟଙ୍କା ଏବଂ ମୋବାଇଲ ନେଇଯାଇଛନ୍ତି। ଭେଙ୍କେଟରାଓ, ତାଙ୍କ ସ୍ତ୍ରୀ ଭବାନୀ ଓ ୨ ପୁଅ ଶୋଇଥିବା ବେଳେ ଦୁର୍ବୃତ୍ତମାନେ ସମସ୍ତଙ୍କୁ ନିଦରୁ ଉଠାଇ ହାତ ଗୋଡ଼ ବାନ୍ଧି ଘରେ ଥିବା ସୁନା ଅଳଙ୍କାର ଓ ନଗଦ ଟଙ୍କା ମାଗିଥିଲେ। ମାରଣାସ୍ତ୍ର ଧରି ସୁନା ଅଳଙ୍କାର ନ ଦେଲେ ୨ ପୁଅଙ୍କୁ ଜୀବନରେ ମାରିଦେବାକୁ ଧମକ ଦେବାରୁ ଭୟରେ ସମସ୍ତ ଅଳଙ୍କାର ଓ ନଗଦ ଟଙ୍କା ଭେଙ୍କେଟରାଓ ଦେଇଥିଲେ। ସେମାନେ ଚାଲିଯିବା ପରେ ଭେଙ୍କେଟରାଓ ଘଟଣା ସମ୍ପର୍କରେ ରାୟଗଡା ଥାନାରେ ଅଭିଯୋଗ କରିଥିଲେ। ଥାନା ଅଧିକାରୀ ରଶ୍ମିରଞ୍ଜନ ପ୍ରଧାନ, ଏସ୍.ଆଇ. ଶିବ ଶଙ୍କର ସାହୁ, ସାଇଣ୍ଟିଫିକ୍ ଟିମ୍ ଓ ଡଗ୍ସ୍କ୍ବାଡ୍ ପହଞ୍ଚିି ତଦନ୍ତ ଆରମ୍ଭ କରିଛନ୍ତି। ଅନୁସନ୍ଧାନୀ କୁକୁର ରେଳ ଟ୍ରାକ୍କୁ ଯାଇଥିବା ବେଳେ ସେଠାରୁ ଭେଙ୍କେଟରାଓଙ୍କ ଦୁଇଟି ମୋବାଇଲ ପୋଲିସକୁ ମିଳିଥିଲା।