ନୂଆଦିଲ୍ଲୀ,୭ା୪(ପି.ଟି.)-ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଫ୍ରାଞ୍ଚାଇଜ୍ଗୁଡ଼ିକ ଦ୍ୱାରା ଅଲୋଡା ହୋଇପଡ଼ିଥିବା ଭାରତର ଟେଷ୍ଟ ସ୍ପେଶାଲିଷ୍ଟ ହନୁମା ବିହାରୀ ୟୁନାଇଟେଡ କିଙ୍ଗଡମ୍ (ୟୁକେ)ରେ ଖେଳାଯିବାକୁ ଥିବା ଟେଷ୍ଟ ସିରିଜ ପାଇଁ ନିଜକୁ ପ୍ରସ୍ତୁତ କରିବା ଲାଗି ଅଣ୍ଟା ଭିଡ଼ିଛନ୍ତି। ଇଂଲିଶ କାଉଣ୍ଟି ଦଳ ଓ୍ବାରଓ୍ବିକ୍ଶାୟାର ପାଇଁ ସେ ଖେଳିବା ଲାଗି ସ୍ଥିର କରିଛନ୍ତି। ଏହି ଡାହାଣହାତୀ ମିଡ୍ଲ ଅର୍ଡର ବ୍ୟାଟ୍ସମ୍ୟାନ ୟୁକେ ଅଭିମୁଖେ ଯାତ୍ରା କରିସାରିଲେଣି। ବର୍ମିଂହାମ୍ଭିତ୍ତିକ କାଉଣ୍ଟି ଦଳ ତରଫରୁ ସେ ଅତିକମ୍ରେ ତିନୋଟି ମ୍ୟାଚ ଖେଳିବେ ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଜଣେ ଅଫିସିଆଲ ସୂଚନା ଦେଇଛନ୍ତି। ବିହାରୀ ଶେଷଥର ପାଇଁ ଆଇପିଏଲ୍ ୨୦୧୯ରେ ଦିଲ୍ଲୀ କ୍ୟାପିଟାଲ୍ସ ତରଫରୁ ଖେଳିଥିଲେ। ମାତ୍ର ଜଣେ ଟେଷ୍ଟ ସ୍ପେଶାଲିଷ୍ଟର ମାନ୍ୟତା ଲାଭ କରିଥିବାରୁ କ୍ରମାଗତ ଦୁଇଟି ସିଜନରେ ତାଙ୍କ ପ୍ରତି କୌଣସି ଫ୍ରାଞ୍ଚାଇଜ୍ ଆଗ୍ରହ ପ୍ରକାଶ କରି ନ ଥିଲେ। ୨୭ ବର୍ଷୀୟ ଏହି ବ୍ୟାଟ୍ସମ୍ୟାନ ଭାରତ ତରଫରୁ ୧୨ ଟେଷ୍ଟ ଖେଳି ୩୨ରୁ ଅଧିକ ଆଭରେଜରେ ୬୨୪ରନ ସଂଗ୍ରହ କରିଛନ୍ତି। ବିହାରୀ ଶେଷଥର ପାଇଁ ଭାରତ ତରଫରୁ ଅଷ୍ଟ୍ରେଲିଆ ବିପକ୍ଷ ସିଡ୍ନୀ ଟେଷ୍ଟ ଖେଳିଥିଲେ। ହାମଷ୍ଟ୍ରିଙ୍ଗ ଇଞ୍ଜୁରି ସତ୍ତ୍ୱେ ସେ ରବିଚନ୍ଦ୍ରନ ଅଶ୍ୱିନଙ୍କ ସହ ଦୀର୍ଘ ୪ ଘଣ୍ଟା କ୍ରିଜ୍ରେ ରହିଥିଲେ। ସେ ଯଦିଓ ୨୩ ରନ କରି ଅପରାଜିତ ରହିଥିଲେ କିନ୍ତୁ ଭାରତକୁ ପରାଜୟରୁ ବଞ୍ଚାଇବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ବିହାରୀ ଏଥର ଘରୋଇ ସିଜନରେ ଟେଷ୍ଟ ଦଳର ଅଂଶବିଶେଷ ଥିଲେ। ତାଙ୍କର ଅନ୍ୟ ଟେଷ୍ଟ ସାଥୀ ଖେଳାଳିମାନେ କିନ୍ତୁ ବିଭିନ୍ନ ଆଇପିଏଲ ଟିମ୍ରୁ ଖେଳୁଛନ୍ତି। କେବଳ ଟେଷ୍ଟ ଚାମ୍ପିୟନଶିପ୍ ନୁହେଁ ପରେ ଖେଳାଯିବାକୁ ଥିବା ଇଂଲଣ୍ଡ ବିପକ୍ଷ ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜରେ ଖେଳିବା ଲାଗି ବିହାରୀଙ୍କୁ ପ୍ରସ୍ତୁତ ହେବାକୁପଡ଼ିବ। ସୂଚନାଯୋଗ୍ୟ, କିଛି ବର୍ଷ ହେଲା ବିଶେଷ କରି ଇଂଲଣ୍ଡ ଟୁର୍ ପୂର୍ବରୁ ଏହାର ଖେଳାଳିମାନଙ୍କୁ କାଉଣ୍ଟି କ୍ରିକେଟ ଖେଳିବା ଲାଗି ବିସିସିଆଇ ଉତ୍ସାହିତ କରି ଆସୁଛି।
