କଟକ ସଦର,୩।୯ (ଡି.ଏନ.ଏ.): କିଶନନଗର ତହସିଲ ଅଧୀନ ରଟିଲୋସ୍ଥିତ ପଞ୍ଚମୁଖୀ ହନୁମାନ ମନ୍ଦିର ଗୁରୁବାର କଡା ସୁରକ୍ଷା ମଧ୍ୟରେ ଭଙ୍ଗାଯାଇଛି। ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହେବା ଆଶଙ୍କା କରି ଅତିରିକ୍ତ ଜିଲାପାଳ ପୂର୍ଣ୍ଣଚନ୍ଦ୍ର ମିଶ୍ର, ଉପଜିଲାପାଳ ପ୍ରତାପ ଚନ୍ଦ୍ର ବେଉରା, ତହସିଲଦାର ସୁଚେତା ମହାପାତ୍ର, ଅତିରିକ୍ତ ଏସ୍ପି ପ୍ରଦ୍ୟୁମ୍ନ କୁମାର ଜେନା, ଅଲେଖ ଚନ୍ଦ୍ର ପହି, ୮ ଜଣ ମାଜିଷ୍ଟ୍ରେଟ୍, ଡିଏସ୍ପି, ବିଭିନ୍ନ ଥାନାର ଅଧିକାରୀଙ୍କ ସମେତ ୧୦ ପ୍ଲାଟୁନ୍ ଫୋର୍ସ ମୁତୟନ କରାଯାଇଥିଲା। ସୂଚନାଯୋଗ୍ୟ, ରଟିଲୋ ମୌଜାର ମହାନଦୀ ପାର୍ଶ୍ୱରେ ଏହି ମନ୍ଦିର ୧୦ ବର୍ଷ ତଳେ ସରକାର ଓ ଭକ୍ତମାନଙ୍କ ଆର୍ଥିକ ସହାୟତାରେ ନିର୍ମାଣ କରାଯାଇଥିଲା। ଏହି ସମୟରେ ଉକ୍ତ କାର୍ଯ୍ୟକୁ କୌଣସି ପ୍ରଶାସନିକ ଅଧିକାରୀ ବନ୍ଦ କରିବା ପାଇଁ ଉଦ୍ୟମ କରି ନ ଥିଲେ। ବେଆଇନ ଭାବେ ନିର୍ମାଣ ହୋଇଥିବା ଏହି ମନ୍ଦିର ଭାଙ୍ଗିବା ପାଇଁ ଦିଲୀପ କୁମାର ସାମନ୍ତରାୟ ନାମକ ଜଣେ ସ୍ବେଚ୍ଛାସେବୀ ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ(ଏନ୍ଜିଟି)ରେ ପିଟିଶନ ଦାଏର କରିଥିଲେ। ୧୫ା୧୨ା୨୦୨୦ରେ ଏନ୍ଜିଟି ଏହାର ଶୁଣାଣି କରି ମନ୍ଦିର ଭାଙ୍ଗିବା ପାଇଁ କଟକ ଜିଲା ପ୍ରଶାସନକୁ ନିର୍ଦ୍ଦେଶ ଦେଇଥିଲେ। ବୁଧବାର ସକାଳେ ରଟିଲୋ ଓ କିଶୋର ନଗର ପଞ୍ଚାୟତ ଅଞ୍ଚଳରେ ୧୪୪ ଧାରା ଜାରି କରାଯାଇଥିବାବେଳେ ସନ୍ଧ୍ୟାରେ ଜିଲା ପ୍ରଶାସନ ପକ୍ଷରୁ ମନ୍ଦିର ମଧ୍ୟରୁ ପଞ୍ଚମୁଖୀ ହନୁମାନ ମୂର୍ତ୍ତିକୁ ଅନ୍ୟତ୍ର ସ୍ଥାନାନ୍ତର କରାଯାଇଥିଲା।