ଆଇଜଲ୍: ମିଜୋରାମ ହେଉଛି ଭାରତର ସବୁଠୁ ଖୁସି ରାଜ୍ୟ। ଗୁରୁଗ୍ରାମସ୍ଥିତ ମ୍ୟାନେଜମେଣ୍ଟ ଡେଭଲପମେଣ୍ଟ ଇନ୍ଷ୍ଟିଚ୍ୟୁଟ୍ ଏକ ରିପୋର୍ଟ ଜାରି କରିଛି। ଯେଉଁଥିରେ କି ଇନ୍ଷ୍ଟିଚ୍ୟୁଟ୍ର ଷ୍ଟ୍ରାଟେଜି ପ୍ରଫେସର ରାକେଶ କେ ପିଲ୍ଲାନିଆ ତାଙ୍କର ଏହି ଅନୁଧ୍ୟାନରୁ ଜଣାଇଛନ୍ତି। ଏଥିସହ ମିଜୋରାମ ମଧ୍ୟ ଭାରତରେ ଶତପ୍ରତିଶତ ସାକ୍ଷରତା ହାସଲ କରିଥିବା ଦ୍ୱିତୀୟ ରାଜ୍ୟ। ରିପୋର୍ଟ ମୁତାବକ, ପାରିବାରିକ ସମ୍ପର୍କ, ନିଯୁକ୍ତି ପ୍ରସଙ୍ଗ, ସାମାଜିକ ପ୍ରସଙ୍ଗ, ଧର୍ମ, କୋଭିଡ୍-୧୯ର ପ୍ରଭାବ, ଶାରୀରିକ ଓ ମାନସିକ ସ୍ବାସ୍ଥ୍ୟକୁ ଭିତ୍ତି କରି ଏହି ସୂଚକାଙ୍କ ପ୍ରସ୍ତୁତ ହୋଇଛି। ମିଜୋ ସ୍କୁଲର ଜଣେ ଛାତ୍ରଙ୍କ କହିବା ଅନୁସାରେ, ତାଙ୍କ ବାପା ତ୍ୟାଗ କରିବା ପରେ ତାଙ୍କୁ ବହୁତ କଷ୍ଟ କରିବାକୁ ପଡିଥିଲା। ଏହାସତ୍ତ୍ୱେ ମଧ୍ୟ ସେ ସକାରାତ୍ମକ ଭାବନା ରଖି ପାଠପଢି ପ୍ରଶାସନିକ ସେବା ପରୀକ୍ଷା ଲାଗି ପ୍ରସ୍ତୁତି କରୁଥିବା କହିଛନ୍ତି। ଅନ୍ୟ ଜଣେ ଛାତ୍ର କହିଛନ୍ତି, ସ୍କୁଲର ଶିକ୍ଷକମାନେ ସାଙ୍ଗ ପରି। ଯେକୌଣସି ବିଷୟ ହେଉ ମଧ୍ୟ ସେମାନେ ଶିକ୍ଷୟିତ୍ରୀ ଶିକ୍ଷକଙ୍କ ସହ ଶେୟାର କରିଥାନ୍ତି। ଶିକ୍ଷକମାନେ ନିୟମିତ ତାଙ୍କର ଓ ତାଙ୍କ ଅଭିଭାବକଙ୍କ ସହ ଯୋଗାଯୋଗ ରଖିଥାନ୍ତି। ତାଙ୍କ ସମାଜରେ ଜାତିଗତ ଭେଦଭାବ ନାହିଁ। ଅଭିଭାବକମାନେ ପାଠପଢା ନେଇ ପିଲାଙ୍କ ଉପରେ କୌଣସି ଚାପ ପକାନ୍ତି ନାହିଁ। ପାଠପଢା ସରିବା ମାତ୍ରେ ସେଠାକାର ପିଲାମାନେ ଲିଙ୍ଗ ନିର୍ବିଶେଷରେ ଚାକିରି କରିଥାନ୍ତି। ତେବେ ସେଠାକାର ଯୁବବର୍ଗ କୌଣସି କାର୍ଯ୍ୟକୁ ଛୋଟ ମନେକରନ୍ତିନି।
