ମହାମାରୀ କରୋନା ସମଗ୍ର ବିଶ୍ୱରେ ଆତଙ୍କ ଖେଳାଇ ଚାଲିଛି। ବିଶେଷ କରି ୨୦୨୦ ଚିନ୍ତା, ଉଦାସୀନତା, ଏକାକୀ, ଅସୁସ୍ଥତା ଏବଂ ମୃତ୍ୟୁର ବର୍ଷ ଥିଲା କହିଲେ କିଛି ଭୁଲ ହେବ ନାହିଁ। ଏହାରି ମଧ୍ୟରେ ୧୪୯ ଦେଶକୁ ନେଇ ହୋଇଥିବା ‘ଓ୍ବାଲ୍ଡ ହାପିନେସ୍ ରିପୋର୍ଟ-୨୦୨୧’ ର ରିପୋର୍ଟ ଶୁକ୍ରବାର ପ୍ରକାଶ ପାଇଛି। ଏହି ରିପୋର୍ଟକୁ ଦେଖିଲେ ସ୍ପଷ୍ଟ ଜଣାପଡ଼ୁଛି ଯେ, କରୋନା ମଧ୍ୟ ଲେକଙ୍କ ଖୁସିର ଜୀବନରେ ସେତେଟା ପ୍ରଭାବ ପକାଇପାରି ନାହିଁ।
ୟୁନିୟନ ସଷ୍ଟେନେବୁଲ ଡେଭ୍ଲପ୍ମେଣ୍ଟ ଏବଂ ସଲ୍ୟୁଶନ ନେଟ୍ଓ୍ବାର୍କ ଦ୍ୱାରା ପ୍ରଯୋଜିତ ୧୪୯ ଦେଶକୁ ନେଇ ପ୍ରସ୍ତୁତ ଏହା ହେଉଛି ବାର୍ଷିକ ରିପୋର୍ଟ । ମୁଣ୍ଡପିଛା ଜିଡିପି, ସୁସ୍ଥ ଜୀବନ ଏବଂ ନାଗରିକଙ୍କ ମତ ଉପରେ ଏହା ଆଧାରିତ। ଏହି ସର୍ଭେରେ ଲୋକଙ୍କୁ କିଛି ପ୍ରଶ୍ନ ପଚରାଯାଇଥିଲା। ଏହି ଆଧାରରେ ୟୁରୋପୀୟ ଦେଶଗୁଡିକ ଦୁନିଆର ସବୁଠାରୁ ଖୁସି ଦେଶ ତାଲିକାରେ ପ୍ରଥମ ୯ଟି ସ୍ଥାନରେ ରହିଛି। ଏହି ତାଲିକାରେ ଫିନଲ୍ୟାଣ୍ଡ ଦୁନିଆର ସବୁଠାରୁ ଖୁସିର ଦେଶ ବୋଲି ବିବେଚିତ ହୋଇଛି। ସେହିପରି ଦ୍ୱିତୀୟରେ ଡେନମାର୍କ, ତୃତୀୟରେ ସ୍ବିଜରଲାଣ୍ଡ, ଚତୁର୍ଥରେ ଆଇସଲ୍ୟାଣ୍ଡ, ପଞ୍ଚମରେ ନେଦରଲାଣ୍ଡ, ଷଷ୍ଠରେ ଆଇସଲ୍ୟାଣ୍ଡ, ସପ୍ତମରେ ନରଓ୍ବେ, ଅଷ୍ଟମରେ ସ୍ବିଡେନ ଏବଂ ନବମରେ ଲଗଜମବର୍ଗ ରହିଛି। ନ୍ୟୁଜଲାଣ୍ଡ ଏକମାତ୍ର ଅଣୟୁରୋପୀୟ ଦେଶ ଯିଏକି ଶ୍ରେଷ୍ଠ ୧୦ ଦେଶ ମଧ୍ୟରେ ସ୍ଥାନ ପାଇଛି।
ଓ୍ବାଲ୍ଡ ହାପିନେସ୍ ରିପୋର୍ଟରେ ଫିନଲାଣ୍ଡ କ୍ରମାଗତ ୪ଥର ପ୍ରଥମ ସ୍ଥାନ ଅଧିକାର କରିଛି। ସେହିପରି ୧୪୯ ଦେଶର ଏହି ତାଲିକାରେ ଭାରତ ୧୩୯ତମ ସ୍ଥାରେ ରହିଛି। ଗତ ବର୍ଷ ଭାରତ ଏହି ତାଲିକାରେ ୧୪୦ତମ ସ୍ଥାନ ଅଧିକାର କରିଥିଲା। ସେହିପରି ଭାରତର ପଡୋଶୀ ଦେଶ ପାକିସ୍ତାନ ଏହି ତାଲିକାରେ ୧୦୫ତମ ସ୍ଥାନରେ ରହିଛି। ଭାରତଠାରୁ ପାକିସ୍ତାନ ୩୪ ସ୍ଥାନ ଆଗରେ ରହିଛି।