ନବରଙ୍ଗପୁର,୩।୭(ସଦାଶିବ ପ୍ରହରାଜ): ଡ୍ୟୁଟି ସମୟରେ ଅଫିସରେ ସମସ୍ତ କର୍ମଚାରୀଙ୍କୁ ନେଇ ଶନିବାର ଜନ୍ମଦିନ ପାଳିଥିଲେ ପାପଡାହାଣ୍ଡି ବିଡିଓ ଦିବାକର ବାଗ। ଫଳରେ ବିଭିନ୍ନ ସମସ୍ୟା ନେଇ ତାଙ୍କୁ ଦେଖା କରିବାକୁ ଆସିଥିବା ଲୋକେ ହଇରାଣ ହୋଇ ଫେରିଥିବା ଅଭିଯୋଗ ହୋଇଛି। ସୂଚନାଯୋଗ୍ୟ, ପାପଡାହାଣ୍ଡି ବିଡ଼ିଓ ବାଗଙ୍କର ଗତ ଶନିବାର ଜନ୍ମଦିନ ଥିଲା। ଏହି ଅବସରରେ ବିଡ଼ିଓ ବାଗ ଓ ସମସ୍ତ କର୍ମଚାରୀ ଡ୍ୟୁଟି ସମୟରେ ପୂର୍ବାହ୍ନ ପ୍ରାୟ ୧୧ଟା ୩୫ ମିନିଟରୁ ମଧ୍ୟାନ୍ନ ୧୨ଟା ୪୫ ମିନିଟ୍ ପର୍ଯ୍ୟନ୍ତ ପ୍ରାୟ ୧ ଘଣ୍ଟା କାଳ କାର୍ଯ୍ୟାଳୟ କନଫରେନ୍ସ ହଲରେ କେକ୍ କାଟି ଜଳଖିଆ ଖାଇ ସେଲିବ୍ରେସନ କରିଥିଲେ। ବ୍ଲକର ସମସ୍ତ କର୍ମଚାରୀ ନିଜର ସରକାରୀ କାମ ଛାଡି, ଏଥିରେ ବ୍ୟସ୍ତ ଥିଲେ l ଏହି ସମୟରେ ଦୂରଦୂରାନ୍ତରୁ ସମସ୍ୟା ନେଇ ଆସିଥିବା ଅନେକ ଲୋକ ବ୍ଲକରେ ବିଡ଼ିଓ ଓ କର୍ମଚାରୀଙ୍କୁ ଅପେକ୍ଷା କରି ବସିଥିଲେ l ସରକାରୀ କାର୍ଯ୍ୟ ସମୟରେ ୧ ଘଣ୍ଟା ଧରି ବାର୍ଥଡେ ସେଲିବ୍ରେସନ କରିବା ଏବଂ ସରକାରୀ କାର୍ଯ୍ୟରେ ଅବହେଳା କରୁଥିବା ନେଇ ବିଡିଓଙ୍କୁ ପଚାରିବାରୁ ସେ କିଛି କହିବାକୁ ମନା କରି ସିଟରୁ ଉଠି ଚାଲି ଯାଇଥିଲେ l ଅନ୍ୟପକ୍ଷରେ ବିଡ଼ିଓଙ୍କୁ ଅପେକ୍ଷା କରି ନିରାଶ ହୋଇଥିବା ଲୋକେ ଅସନ୍ତୋଷ ବ୍ୟକ୍ତ କରିବା ସହ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି l