ନୂଆଦିଲ୍ଲୀ, ୮ା୭ (ପି.ଟି.): ଭାରତର ପୂର୍ବତନ କ୍ରିକେଟ ଅଧିନାୟକ ମହେନ୍ଦ୍ର ସିଂ ଧୋନୀ ଶୁକ୍ରବାର ୪୨ ବର୍ଷରେ ପଦାର୍ପଣ କରିଛନ୍ତି। ଏଥିପାଇଁ ସଚିନ ତେନ୍ଦୁଲକର, ହରଭଜନ ସିଂ ଓ ବୀରେନ୍ଦ୍ର ସେହ୍ବାଗ ଭଳି ଭାରତୀୟ କିମ୍ବଦନ୍ତୀଙ୍କ ସମେତ ସମଗ୍ର ବିଶ୍ୱର ଅଗ୍ରଣୀ କ୍ରିକେଟରମାନେ ଧୋନୀଙ୍କୁ ଶୁଭେଚ୍ଛା ଜଣାଇଛନ୍ତି। ତେନ୍ଦୁଲକର ଚେନ୍ନାଇ ସୁପର କିଙ୍ଗ୍ସ ଅଧିନାୟକଙ୍କ ସହ ତାଙ୍କର ଏକ ଫଟୋ ଶେୟାର କରିଛନ୍ତି। ‘ମେ ୟୁ ଅଲ୍ଓ୍ବେଜ ଫ୍ଲାଏ ଲାଇକ୍ ଇଓର ହେଲିକପ୍ଟର ଶଟ୍, ହାପି ବାର୍ଥ ଡେ, ଏମ୍ଏସ୍!’। ଧୋନୀ ତାଙ୍କର ଏହି ଟ୍ରେଡ୍ମାର୍କ ଶଟ୍ ସହାୟତାରେ ଦୁଇ ଦଶନ୍ଧିର ପ୍ରଫେସନାଲ କ୍ୟାରିିୟରରେ ଭାରତ ଏବଂ ଆଇପିଏଲ୍ ଦଳ ସିଏସ୍କେକୁ ବହୁ ବିଜୟ ଆଣି ଦେଇଛନ୍ତି। ସେହ୍ବାଗ ତାଙ୍କ ସାଥୀ ଖେଳାଳି ଧୋନୀଙ୍କ ସହ ବିତେଇ ଥିବା କିଛି ଶ୍ରେଷ୍ଠ ମୁହୂର୍ତ୍ତ ଶେୟାର କରିଛନ୍ତି। ସେ ଲେଖିଛନ୍ତି, ସୂର୍ଯ୍ୟଠାକୁରଙ୍କ ଦିବ୍ୟ ରଥକୁ ୭ ଘୋଡ଼ା ଟାଣି ଥାନ୍ତି। ଋଗ୍ବେଦକୁ ୭ ଭାଗରେ ବିଭକ୍ତ କରାଯାଇଛି। ବିଭାଘର ବେଳେ ୭ଫେରା ଲଗାଇବାକୁ ପଡ଼ିଥାଏ। ବିଶ୍ୱରେ ୭ଟି ଆଶ୍ଚର୍ଯ୍ୟ ରହିଛି। ଧୋନୀଙ୍କ ଜନ୍ମ ବର୍ଷ ୭ମ ମାସରେ ଏବଂ ୭ ତାରିଖରେ। ବାସ୍ତବିକ ସେ ଜଣେ ମହାନ୍ ବ୍ୟକ୍ତି। ବିହାରର ରାଞ୍ଚତ୍ରେ ଜନ୍ମଗ୍ରହଣ କରିଥିବା ଧୋନୀ ୨୦୦୫ରେ ଶ୍ରୀଲଙ୍କା ବିପକ୍ଷରେ ତାଙ୍କ ଟେଷ୍ଟ ପଦାର୍ପଣ କରିଥିଲେ। ସେ ତାଙ୍କ କ୍ୟାରିୟର ଶେଷ ଟେଷ୍ଟ ମ୍ୟାଚ ୨୦୧୪ ଡିସେମ୍ବରରେ ଅଷ୍ଟ୍ରେଲିଆ ବିପକ୍ଷରେ ଖେଳିଥିଲେ। ଧୋନୀଙ୍କ ନେତୃତ୍ୱରେ ଟିମ୍ ଇଣ୍ଡିଆ ୨୦୦୭ରେ ଟି୨୦ ବିଶ୍ୱକପ୍, ନିଜ ଦେଶରେ ୨୦୧୧ ବିଶ୍ୱକପ୍ ଏବଂ ୨୦୧୩ ଚାମ୍ପିୟନ୍ସ ଟ୍ରଫି ହାତେଇ ପାରିଛି। ନିକଟରେ ତାଙ୍କ ନେତୃତ୍ୱରେ ଚେନ୍ନାଇ ସୁପର କିଙ୍ଗ୍ସ ୫ମ ଥର ଆଇପିଏଲ୍ ଟାଇଟଲ ଜିତିଥିଲା। ପୂର୍ବତନ ସ୍ପିନର ହରଭଜନ ସିଂ ଟୁଇଟ କରି ଧୋନୀଙ୍କୁ ‘ହାପି ବାର୍ଥଡେ ବାହୁବଳି’ କହିଛନ୍ତି। ଭବିଷ୍ୟତ ମଙ୍ଗଳମୟ ହେଉ। ଆଗକୁ ମଧ୍ୟ ଅନ୍ୟ ପାଇଁ ପ୍ରେରଣା ହୋଇ ରହିଥାନ୍ତୁ। ଅଲିମ୍ପିକ ବ୍ରୋଞ୍ଜ ପଦକ ବିଜେତା କୁସ୍ତିଯୋଦ୍ଧା ଯୋଗେଶ୍ୱର ଧୋନୀଙ୍କୁ ଜଣେ ମହାନ୍ ବ୍ୟକ୍ତିତ୍ୱ ବୋଲି କହିଛନ୍ତି। ଧୋନୀଙ୍କ ସିଏସ୍କେ ଟିମ୍ମେଟ୍ ରବୀନ୍ଦ୍ର ଜାଡେଜା କିମ୍ବଦନ୍ତୀ ଉଇକେଟକିପରଙ୍କୁ ତାଙ୍କ ପଥପ୍ରଦର୍ଶକ ବୋଲି କହିଛନ୍ତି। ଭାରତର ପୂର୍ବତନ ମହିଳା ପେସ୍ ବୋଲର ଝୁଲଣ ଗୋସ୍ବାମୀ କହିଛନ୍ତି, ହାପି ବାର୍ଥଡେ୍ କ୍ୟାପଟେନ କୁଲ୍, ପଡ଼ିଆ ହେଉ ଅବା ପଡ଼ିଆ ବାହାରେ ଧୋନୀ ଖେଳାଳିମାନଙ୍କ ପାଇଁ ପ୍ରେରଣାର ଉତ୍ସ ହୋଇ ରହିଛନ୍ତି। ଭାରତୀୟ ବ୍ୟାଟର ଚେତେଶ୍ୱର ପୂଜାରା ମଧ୍ୟ ଧୋନୀଙ୍କୁ ଜନ୍ମଦିନ ଶୁଭେଚ୍ଛା ଜଣାଇଛନ୍ତି। ଉଇକେଟକିପର ବ୍ୟାଟରଙ୍କ ଭବିଷ୍ୟତର ଶୁଭକାମନା କରିଛନ୍ତି।